1 Peniya, munahota nkolongwa Nahashe jwa Akaamone, pamonga na akakomana ngondo bhake, ngajhenda kujhobhela muche gwa Yabeshi gileadi. Akolo muche bhuku Yabeshi gileadi ngabhannobholila Nahashi, "Tutende majheketelano na twenga, na twenga natuntumikila." 2 Nambo Nahashi, ngabhalobholila, "Nandenda majheketelano na mangota kwa nhwilo ghumo, kila mundo naninkolopola liho limo lyu ulelo, yene nanatenda Akachilahele bhoha nanapechelecha."

3 Ilongoche yuku Yabeshi ngabhannobholila, "Tunnyopa machiko chaba, kupala twatume bhando mu kilambo choha chuku Ichilahele. Anda apitii jhe mundo jhojhoha jhu kutughombola, tabhete natupomowa mu kindendeke kwino."

4 Bhando bhala pubhahikita ku Gibeya, ku muche gwatama Sauli, ngabhachimulila bhando malobhe ghenio na bhando bhoha ngabhalelita kanonowa. 5 Kipinde chenio Sauli ahumita kunng'onda, kongo ahakita mankambako ghake, jwenie ngakonyita, "Bho, chakolii ni bhando bhamba? Kwanike bhilela?" Ngibhannobholila malobhe ghibhalongila bhando bhaku Yabeshi. 6 Sauli pajhohina kilebhe chenio, uhuke gwa Chapanga ngunhikila kwa makakala, na ngabhila nalilaka hake. 7 Sauli ngatoila makambako mabhele gha ng'ombi ngaghahanjina ipandeipande, ngatuma bhando bhaipeteche yoha mu kilambo choha chuku Ichilahele kukulonge, "Mundo jhojhoha jwapakuleka kunkengama Sauli na Chamwele ku ngondo, makambako ghake naghahekitwa helenaha."

Kiholo cha Bhambo Chapanga, ijhakwajhingilila Akaichilahele, kunhwalo Bhambo Chapanga ngahotwi kutenda yene. Yene, bhando bhoha ngabhabhoka kwa pamonga. 8 Sauli pibhakonganicha Akaichilahele kwenio ku Bezeki, ngabhabhila bhando lake itato kubhoke ku Ichilahele na kuhumii ku Yuda bhakibha bhando elufo makome matato. 9 Sauli ngabhalobholila bhando bhala bhibhahikita kubhoke ku Yebeche, "Malobholela bhando bhuku Yabeshi gileadi, ‘Kilabho, lyobha nukubhangu jhe, nankombolelwa.’" Bhando bhala ngibhajhenda kwalobholela bhando bhuku Yabeche malobhe ghenio, nabheniya ngibhahangina hake. 10 Yene, bhando bha muche gwa Yabeshi ngabhannobholila Nahashi, "Kilabho natubhaha pahe jha kindendeke gwino, na mwenga namututendela chochoha chimipala." 11 Lichiko lilikengima kilo, Sauli ngaghabhina bhando muibhogha itato. Kipinde cha chamo jha putepute, ngabhajhingila mu kighono cha Akaamone nukwachinja ade muhe. Bhala bhibhahighilika ngabhapechingina, bhakahotwii jhe ata kukongana bhando bhabhele pamonga.

12 Ndi Akaichilahele ngabhannobholila Chamwele, "Bhabhiko bhala bhibhalongila Sauli ihoto jhe kubhehe munahota nkolongwa gwito? Tuletela pamba bheniya na twenga natwakoma."

13 Nambo Sauli ngabhalobholila, "Abhii jhe mundo jwapa kukomwa deleno, kunhwalo mu lichiko lende lya deleno, Bhambo Chapanga aghombwii aka Ichilahele." 14 Ndi Chamwele ngabhalobholila bhando, "Hika, tijhangana ku Giligali, na kwenio natuntangacha Sauli kubhehe munahota nkolongwa jhuku Ichilahele." 15 Yene, bhando bhoha ngabhajhenda ku Giligali, pubhahikita kwenio, ngabhantangicha Sauli kubhehe munahota nkolongwa, chehemo jhu kunnyinamii Bhambo Chapanga. Peniya, ngabhampiikiya Bhambo Chapanga matambiko ghu uteeke. Sauli na bhando bhoha bhuku Ichilahele, ngabhahangina hake.