1 Bhahe, Lichanduko lya Bhambo Chapanga pulikibha litamite mu kilambo cha Akafilichite kwa myehe chaba, 2 Akafilichite ngabhakemita akapiya matambiko bha Dagoni na bhibhalondola na kwakonya, "Bho, natutenda bhole na Lichanduko lende lya Bhambo Chapanga? Tulobholela, natubhujhicha bhole kola kulikibha?"

3 Bheniya ngabhajhangwila, "Anda mibhujhicha Lichanduko lya Chapanga jwa Ichilahele mangabhujhicha jhe changa kilebhe. Nambo mmujhicha na litambiko lya kupepulila malemwa, na mangota nanama mpepula malemwa gwino. Na mangota nambangatuka kilebhe chikintei nchwapulilwe changa kotoka."

4 Bhando ngabhakonyita, "Natupeleka litambiko ghane?"

Bheniya ngabhajhangwila, "Inyagho nhwano ya chaabo ibhii ngita mapute, na inyagho nhwano ya chaabo jhiibhi ngita makule, kila chimo kilangii kilongoche jhumo jwa Akafilichite, nhwalo ulwalo ghoghogho ghunwalita ndi ghubhalalitwa ilongoche ino."

5 Ntendekeya inyagho ya mapute na inyagho ya makule ghighahangabhana kila kilebhe mu kilambo chino. Na mangota munyokonikiye Chapanga jwa Akaichilahele, pange naleka kunchwapula mangota na ichapanga ino na kilambo chino. 6 Kilebhe ghane mibhehe na lighoho ngita bhando bhuku Michile na munahota nkolongwa Falao? Bho, Chapanga pabhachwapwila kanonowa aka Michile bhakalekekii jhe Akaichilahele bhabhoke, nabheniya ngabhabhokita? 7 Ngohe, nnenganikiya mutuka nhyono jhihutwa na ng'ombi na ng'ombi bhabhele bhibhapapite na bhangakongwa lingolengole. Makongelela mutuka jhihutwa na ng'ombi yenio, nambo matohe ghabhe madindila mukibhajha. 8 Ntolangana Lichanduko lya Bhambo Chapanga na mulibheka mumutuka yenio jhukuhutwa. Mupele jha Lichanduko lyenio, mmekangana inyagho ya chaabo yenio imimpelekela ngita litambiko lya kupepulila malemwa gwino. Peniya, ileka ng'ombi ijhende kwokwoha kuipala kulipeleka. 9 Nambo mwilolekeya anda mutuka jhenio ipelekwa chomola mu kilambo chuku Bete shemeshi, peniya natumanya kubhehe jwatuletii ulwalo gwenio gwa matumbo ndi Chapanga jwa Akaichilahele. Nambo anda lipelekwa jhe kwenio, bhahe, natumanya kubhehe Bhambo Chapanga jhe jwatuchwapwile, nambo ndi malwalo ngita malwalo ghange.

10 Ngabhateila ngita chibhalaghilwa, ngabhatoila ng'ombi ibhele ijhongecha nu kwakonga mu mutuka jhenio jhukuhutwa, na matohe ghabhe ngabhadindila mukibhajha. 11 Ngabhalibhekita Lichanduko lya Bhambo Chapanga lela mu mutuka jhenio pamonga na kichanduko cha inyagho hela ya chaabo ya makule na hela ya mapute. 12 Peniya, ng'ombi yenio ngaijhahwila chomola ku muche gwa Bete shemeshi changa lyangatika lubhoko lwa ngejha hilu lwalelo, ipetita kumeta ndela jhoha. Ilongoche ya Akafilichite ngabhakengima unyuma ng'ombi yenio ade kumpaka gwa ku Bete shemeshi.

13 Bhando bhuku Bete shemeshi bhakibha bhahunita ngano yabhe mu lulambo. Pibhajhinwila miho ghabhe ngabhalibhona Lichanduko lya Bhambo Chapanga, ngabhahangina hake. 14 Mutuka jhenio jhihutwa na ng'ombi ngaijhawila ade kunng'onda gwa Yochuwa, nkola muche jwa ku Bete shemeshi, ngalijhemita papa, pahina na lighanga likolongwa. Bhando ngabhaihangabhina mutuka yenio, na mbau yake ngabhatumila kuikomelekela ng'ombi yenio ngita litambiko lya kukomelekelwa kwa Bhambo Chapanga. 15 Akalabhe ngabhalihulwiya lichanduko lya Bhambo Chapanga, pamonga na lela lichanduko lya inyagho ya chaabo nukwibheka ilebhe yenio pa lighanga likolongwa. Lichiko lyenio bhando bhuku Bete shemeshi ngabhapiya matambiko ghu kukomelekelwa mbwe, nu matambiko ghange. 16 Akanahota akakolongwa nhwano bhala bha Akafilichite pibhalolita gheniya, ngabhakelewika ku Ekiloni, lichiko lele.

17 Akafilichite ngabhaipelika inyagho yenio nhwano ya chaabo ya mapute kwa Bhambo Chapanga, kupala ibhaha litambiko li kupepulila malemwa gwabhe, kila kinyagho chimo kunhwalo jha muche ghumo, yane muche gwa Ashidodi na muche gwa Gacha na muche gwa Ashikilone na muche gwa Gati na muche gwa Ekiloni. 18 Helehela ngabhapelika inyagho nhwano ya makule gha chaabo tela na echabo jha miche jhoha jhilongwichwa na akanahota akakolongwa nhwano ya Akafilichite. Miche yenio ikibha na maboma pamonga na chenda yangatindikiwa mapamanda. Lindalabho lela likolongwa munng'onda gwa Yochuwa jhuku Bete Shemeshi ndi chehemo libhapelika Lichanduko lya Bhambo Chapanga ndi ukombocho gwa kilebhe chenio ade deleno.

19 Nambo Bhambo Chapanga ngabhakomita akolo kilambo chabine bha muche gwa ku Bete shemeshi, ku nhwalo bhakalingulii nkate jha lichanduko lya Lilaghano. Bhando ngabhalelita kunhwalo gwa Bhambo Chapanga abhakomite bhando ngoo pakate jhabhe.

20 Peniya, akolo muche bhuku Bete shemeshi ngabhakonyita, "Bho, meneke jwahoto kujhema nnonge jha Bhambo Chapanga, Chapanga jhonjo jwa nyahinyahi? Lichanduko nalijhenda kwa ghane kupala libhoka pamba?" 21 Peniya, ngabhatumita bhando kujhenda ku Kiliate yealimo kukulonge, "Akafilichite bhalibhujhiche Lichanduko lya Lilaghano lya Bhambo Chapanga. Nhwikengane mulitole."