1 Chamwele ngabhalobholila Akaichilahele bhoha, "Nyokanikii kila kilebhe chumunobholila na nenga ninhimike munahota nkolongwa pakate jhino annongoche. 2 Ngohe, nkwete munahota nkolongwa jwa kunnongocha. Nambo nenga ng'ogholwike na mii na uliya, na yana yango ibhii pamba pamonga na mangota. Mii kilongoche gwino kuhumii muungombo ade deleno. 3 Nyemite pamba anda ndei kilebhe chochocha kibhoho bhahe, nnongela nnonge jha Bhambo Chapanga, na nnonge jha munahota nkolongwa gwake. Bho, ngwatwii ng'ombi likambako amu liponda lya mundo jhojhoha? Bho, nimponjite kilebhe mundo jhojhoha? Bho, ning'ahite mundo jhojhoha? Bho, mbokii chwinda kwa mundo jhojhoha, kupala nhadabula changa palwa? Anda ndehi yene, na nenga nanimmujhichila."

4 Bhando ngabhannyangwila, "Kibhii jhe chimitukolwii amu kutung'ahicha, hilu kutola chochoha kwa mundo jhojhoha."

5 Chamwele ngajhangwila, "Bhambo Chapanga ndi jwalola nu kujhoha kuhumii kwino na munahota nkolongwa gwake, kubhehe umwene kubhehe ngwetii jhe malemwa."

Bheniya ngabhalongila, "Bhambo Chapanga ndi jwalola nu kujhoha." 6 Chamwele ngajhendilila kulonge, Bhambo Chapanga ndi jwanhagwila Mucha na Alone, nukwabhoha akahokobhino ku kilambo chuku Michile. 7 Ngohe nnyemangana papa, kupala nenga na mangota tuhadabulwa nnonge jha Bhambo Chapanga, na nenga naninkombocha matendwa ghake gha ikangacho ghateila kupala ankombola mangota na akahokobhino. 8 Kipinde Yakobo, na akalongo mundo pubhajhahwila ku Michile, na Akamichile pibhang'ahita akahoko bhino, na akahoko bhino ngabhannelila Bhambo Chapanga abhatangatile, na jwenie ngabhatumita Mucha na Alone, kwabhoha Akahoko bhino ku kilambo chuku Michile, nu kwatenda ntamangane pi kilambo chenje. 9 Nambo bhando ngabhannibhilila Bhambo Chapanga, Chapanga gwabhe, yene Bhambo Chapanga ngabhalekita akamakoko bhabhe bhabhabule, Sisela nkolo jwa akakomana ngondo jwaka Hazole na helahela muulongoche gwa Akafilichite, nu kwa munahota nkolongwa jwa ku Moabo, jwakomina na akahokobhino nu kwahotola. 10 Akahokobhino ngabhannelila Bhambo Chapanga kukulonge, "Tutei uhakaho, tunnekite Bhambo Chapanga nu kutumikii ichapanga Mabaale na Maashitolote. Mutughombole kuhumii mu mabhoko gha akamakoko bhito, na twenga natunyinamila." 11 Ndi Bhambo Chapanga pantumita Yelubaale, liina lenge akemitwa Gideone, na nnonge ngantumita Bedane na Yefuta na pukujhomolela ngandumita nenga Chamwele. Kila jhumo pakate jhito ngankombwila kubhoke kwa akamakoko ghino kila upande, na mangota ngantama ku uteeke. 12 Nambo pumumweina Nahashi munahota nkolongwa jwa Akaamone papalita kuhika kwajhingilila, ngamunkanita Bhambo Chapanga jwabhii munahota nkolongwa gwino, ngaunobholila, "Tumpala munahota nkolongwa ndi jwapakutulongocha."

13 Ngohe, jhonjo pamba ndi munahota nkolongwa jwa mikihaghulile, jhola jhumunnyopita Bhambo Chapanga, na jwenie ampelingine. 14 Anda munnyinamii Bhambo Chapanga nu kunnyokonikiya Chapanga, changaijhewa mihilo jhake, mangota pamonga na munahota nkolongwa gwino jwannongocha anda munkengame Bhambo Chapanga, Chapanga gwino, bhahe, kila kilebhe nakinnyendela telatela. 15 Nambo anda nannyokanikii jhe Bhambo Chapanga nu kuikana mihilo jhake, jwenie nakomana na mangota ngita chakomina na akahoko bhino. 16 Ngohe, ntama nuu nukulolekeya kilebhe kikolongwa chapakutenda Bhambo Chapanga nnonge jhino. 17 Bho, chenje kilangache jhe? Nambo nenga naninnyopa Bhambo Chapanga, aleta nnindimilo gwa mbamba na hula, na mangota nammanya nu kukulola kubhehe uhakaho ghunteii nnonge jha Bhambo Chapanga, kwa kukijhope munahota nkolongwa ntei lilemwa likolongwa.

18 Peniya, Chamwele ngannyopa Bhambo Chapanga, na lichiko lele Bhambo Chapanga ngaletita hula na milindimilo jha mbamba. Yene, bhando bhoha bhuku Ichilahele ngabhannyogwipa hake Bhambo Chapanga pamonga na Chamwele. 19 Bhando bhoha ngabhannobholila Chamwele, "Chonde, munnyope Bhambo Chapanga, Chapanga gwino, kunhwalo gwa akatumiche bhino, kupala tukoto kuwe, kunhwalo tujhonjikike uhakaho gwito kukupala munahota nkolongwa."

20 Chamwele ngajhangwila, "Mangajhoghopa jhe, pamonga nukutenda uhakaho ghongo, manganneka jhe Bhambo Chapanga, nambo muntumikila kwa mwojho gwino gwoha. 21 Mangaijhinamii jhe ichapanga henge, jhangahoto kuntangatila na hilu kunkombola, nhwalo jhenio ndi jhuwange. 22 Bhambo Chapanga alongi nannekangana jhe nhwalo mangota ndi bhando bhake jwenie bhabhahagwile, mme mabhando bhake jwenie. 23 Kwa nenga nileka jhe kunnyopela kwa Bhambo Chapanga, nileka jhe kwajhopela, anda nekite kutenda yene, tela nukutenda uhakaho kwa Bhambo Chapanga. Nanyendelela kummola ndela jhambone na chiipalwa kuikengama. 24 Nambo mangota munnyokanikiya Bhambo Chapanga nu kuntumikii kukuhobholeka na mwojho gwino gwoha. Nkomboka ilebhe hela ikolongwa yantendii Bhambo Chapanga. 25 Nambo anda nnyendilii kutenda uhakaho, nankomelekelwa mangota pamonga na munahota nkolongwa gwino."