1 Sauli ngannobholila Yonasani mwana mundo na akatumiche bhake bhoha panane jha mpangu gwake ghu kunkoma Daude. Nambo Yonasani, ngampalita hake Daude. 2 Jwenie ngannobholila Daude, "Tate gwango apakunkoma, yene, mma miho. Kilabho lukela, nnyobha pi kijhobho. 3 Nenga nahika na tate gwango kwenio ku nng'onda nu kujhema pahina na pumpakujhobha na nanongela nako kunhwalo gwino, na peniya chaninobholela kila kilebhe chimbakuhumbula kuhumii kwake."

4 Yonasani ngannumbilila Daude nnonge jha tate mundo kukulonge, "Nkoto kuntende ubhoho ntumiche jwino Daude, nhwalo jwenie kibhii jhe kibhoho chochoha chantendii, machiko ghoha itendwa yake yoha yakibha yambone pantumikila. 5 Pankomita Goliate Mfilichite, akajhogwipe jhe kuwe, na Bhambo Chapanga ngabhapila Akaichilahele uhotolo nkolongwa ata mwenga punnolita kilebhe chenio nguhanganila hake. Kunhwalo ghane mpala kutenda uhakaho kwa mundo ngita Daude, kwa kunkoma changalilemwa?"

6 Sauli ngannyokanikiya Yonasani, mwana mundo, peniya, ngalapila, "Nilapii kwa Bhambo Chapanga jwabhii ghome, ninkoma jhe Daude." 7 Bhahe, Yonasani ngankemita Daude nu kunnobholela malobhe ghenio ghoha. Peniya, Yonasani ngampelika Daude kwa Sauli, na jwenie Daude ngantumikila munahota nkolongwa Sauli ngita makacho.

8 Pughapetita gheniya, ngondo ngaipitila kabhele pakate jha Akafilichite na Akaichilahele. Daude ngabhokita nu kukomana nabho ngabhakomita Akafilichite hoko na bhibhahighilika ngabhatilita.

9 Peniya, uhuke mmoho ghulekekilwe kuhumii kwa Bhambo Chapanga ngaujhingilila Sauli pakibha atamite kajhake, mulibhoko lyake akibha akamwii nkowa, kipinde Daude ahonita kinube. 10 Sauli ngajhighita kunnyundukula Daude kwa nkowa gwenio, nambo Daude ngajhepita nkowa gwa Sauli na nkowa gwenio ngaujhundwikila mulipamanda. Daude ngatilita nu kughomboka kilo jhenio.

11 Kilo jhenio, Sauli ngatumita akatumiche bhake bhakanninge Daude kajhake, kupala kilabho lukela ankome. Mikale ngannobholila Daude ungana mundo, anda mikighombwii jhe deleno, kilabho lukela nabhankoma. 12 Bhahe, Mikale nganhulwiya Daude nngana mundo kupete palidilicha, jwenio ngabhokita nu kutila. 13 Mikale ngatoila kinyagho ngakighonika pakindanda na pamuto gwa kinyagho chenio ngawalicha mangoma gha mbuhe. Peniya, ngakiyekita kwa libulangete. 14 Sauli patumita bhando kunkamuu Daude, Mikale ngabhalobholila Daude itenda kulwalwa. 15 Bhahe, Sauli ngabhalaghila kabhele bhakelebhuke kuntola Daude kukulonge, "Munneta pamba Daude ata atenda kulwalwa kupala ninkome." 16 Akatumiche bheniya pibhajhingila nkate mwa Daude, ngabhakikolela kinyagho pakindanda chenio na mutwe gwake kibhekitwe mangoma gha mbuhe. 17 Sauli ngankonyita Mikale, mwana mundo, "Kwanike undei kungolowa? Kilebhe ghane munnekite likoko lyango atile?"

Jwenie Mikale ngajhangwila, "Anobholila, nangoma anda nakunneka jhe ajhende." 18 Daude panyogholwika, ngajhenda ku Lama kwa Chamwele. Nganchimulila malobhe ghoha ghantendii Sauli. Bhahe, Chamwele na Daude ngabhabhokita nu kujhenda kutama ku muche ghuku Nayote. 19 Malobhe gheniya nganhikilila Sauli, kubhehe Daude abhii ku Nayote, kwenio ku Lama. 20 Peniya, Sauli ngabhatuma akatumiche bhakankamuu Daude. Nambo pibhaliweina lilongo lya akalondole bhikilondola na Chamwele ndi kilongoche jwa lilongo lyenio, uhuke gwa Bhambo Chapanga ujhakwahikilila akatumiche bheniya bha Sauli, bheniya hele ngabhatumbwila kulondola. 21 Sauli palobholilwa malobhe gheniya, ngatumita akatumiche bhange, bheniya ngabhatumbwila tulondola. Sauli ngatumita akatumiche bhange mala jhutato, bheniya hele ngabhatumbwila kulondola. 22 Peniya, ngajhenda jwene ku Lama. Pahikita kukilibha kikolongwa chikibhii ku Seku, ngankolila mundo jhumo nukunkonya, "Bho, Chamwele na Daude bhabhiko?" Mundo jwenio ngannyangwila, "Bhabhii ku Nayote, kwenio ku Lama." 23 Bhahe, Sauli ngajhahwila ku Nayote, kwenio ku Lama. Uhuke gwa Chapanga ngaunhikilila pakibha mundela, jwenie ngatumbwila kulondola ade pahikita ku Nayote. 24 Ngahulita ngobho yake ngalondwila nnonge jha Chamwele. Ngaighilika makengele muhe na kilo, lichiko lela. Yene, bhando ngabhakonyina, "Bho, Sauli ndi jhumo jwa milondole?"