1 Machiko matato nnonge, Daude na bhando bhake ngabhahikita ku Sikilage. Ngabhakolela Akameleke bhaujhingilile muche gwa upande gwa kuchine jha Yuda na muche gwa Sikilage nu kutiniya mwotu. 2 Ngabhapukila akakeghe na bhando bhoha bhibhakibha pa bomane peniya, bhakolo kwa akachoko. Bhoha bhakapukile ngabhabhokita nabho, nambo bhakankomite jhe mundo jhojhoha, bhoha ngabhaighalila ghome. 3 Daude na bhando bhake pibhahikita ku bomane ngabhaukolila muche gwabhe uhangabhinwe nu utiniwe mwotu na Akaameleke, na akaana bhabhe na yana yabhe inalome na ikeghe yoha ipukilwe. 4 Peniya, Daude na bhando bhake bhoha ngabhagwiya kilelo, ngabhalelita ade mahituhitu. 5 Akaana bhoha bha Daude, Ainoamo kuhumii ku Yezileele na Abigaeli nahwela jwa Nabale, ngabhapukilwa kwa makakala.

6 Daude akibha na malola makolongwa, nhwalo bhando bhake bhakibha na lipyanda mu uhuke yabhe kukuhobheya yana yabhe, yene, ngabhayengila kumbula maghanga. Nambo Daude ngakilekila mwojho kukunhobholela Bhambo Chapanga, Chapanga jwake. 7 Daude ngannobholila mpiya litambiko Abiatale mwana jwa Ahimeleke, "Nnetele kichubao cha mpiya litambiko, Na jwenie ngampelikila." 8 Daude ngankonyita Bhambo Chapanga, "Bho, bhando abha nakengame? Bho, chanakamula?"

Bhambo Chapanga ngannyanguu, "Bhakengame nhwalo namakolela nu kwaghombola bhibhapukilwe kwa makakala." 9 Bhahe, Daude ngabhokita na bhando bhake miya chita bhakibha nabho. Pubhahikita kukipela chuku Besole, na akakomana ngondo bhange bha Daude ngabhahighilika peniya. 10 Nambo Daude ngajhendelela kwakengama bhando bheniya, abhii na bhando miya ncheche, akakomana ngondo miya ibhele ngabhaighilika peniya, nhwalo bhakatotokii hake, ngabhalepelila kujhomboka kipela chenio. 11 Akakomana ngondo bhala bhibhakibha na Daude ngabhankolila mundo jhumo, Mmichile ku njenga, na bheniya ngabhantoila nu kumpeleka kwa Daude. Ngabhampila libumunda na mache mundo jwenio. 12 Helehela ngabhampila kipande cha libumunda lya tine na ikonyo ibhele ya chabibo nyomo, pajhomolila kulyegha makakala ngaghabhujhilina. Ku nhwalo akali jhe hilu kunywe chochoha kwa kipinde cha machiko matato, kilo na muhe. 13 Daude ngankonyita, "Munahota gwino ndi ghane? Mihumii kojhe?" Na jwenie nganyangula,

Ne Namichile. Ntumiche jwa Mmeleke jhumo. "Munahota jwango annekita unyuma machiko matato ghighapetite, ku nhwalo ndeila kulwalwa."

14 Twenga tukaijhingilii chehemo jha ku njenga upande gwa kuchine mwa kilambo cha Akakelete, na chehemo jha Yuda pamonga na chehemo jha kuchine jhibhatama lukolo lwa Kalebo, na ngatukomelikiya muche gwa ku Sikilagi kwa mwotu.

15 Daude ngankonyita, "Bho, mihoto kumbeleka kwa nchambe gwenio?" Kangombo jwenio ngannyangwila, "Anda unnapile kwa Bhambo Chapanga kubhehe naungoma jhe hilu naumbeleka jhe kwa munahota gwango."

16 Kangombo jhola ngannongocha Daude ade pukibha nchambe gwenio. Pubhahikita kwenio ngabhakolila bhando bheniya bhapechengine kila chehemo, nhwalo bhakibha bhakinomenekeya nu kunywe nu kukihanga, kunhwalo ilebhe yabhakatoile ikibha yamahena hake kuhumii kukilambo cha Akafilichite na kuhumii kukilambo chuku Yuda.

17 Daude ngakomina nabho kutumbulii lukela ade lichiko lilikengime kimiye. Abhii jhe munalome jhojhoha jwakahighilike, nambo akangombo miya ncheche bhibhahobhokii ngamiya nu kutila. 18 Daude ngaghombwila kila kilebhe chibhakapukile Akaameleke, pamonga na akaanamundo bhoha bhabhele. 19 Kibhii jhe chochoha chikihobhite. Daude ghabhaghombwila akakolo na bhandina, yana inalome na ikeghe na yoha itoilwa na Akaameleke. 20 Daude ngabhujhicha michambe jhoha jha mambelele na ng'ombi, na bhando bhake ngabhahakalila nnonge inyama yenio, kukulonge, "Henge ndi inyama ya Daude!"

21 Peniya, Daude ngabhapetila bhala bhando miya ibhele bhibhahighilike pakipela cha Besole, nhwalo bhibhakibha bhatotokile. Bhando bheniya pibhamweina Daude pamo na bhala bhibhakibha pamonga na jwenie, ngabhajhenda kumpokela. Na jwenie pibhabhandikila bhando bheniya ngabhanyambucha kukuhangana. 22 Pa nchambe ghola gwa Daude, pakibha na akatumiche bhinamilomo na bhanganandela panakate jhabhe, ngabhalongila, "Natwape jhe kilebhe chochoha chitukighombwile nhwalo bhakajhahwii jhe pamonga na twenga. Nambo bhatola akaanamundo na yana yabhe bhajhende."

23 Daude ngabhalobholila, "Nai jhe akalongo bhango." Mihoto jhe kutenda yene kwa chela chatupii Bhambo Chapanga. Atulondita mbone nu kututenda twahotole nchambe ghola ghuhikita kutujhingilila. 24 Abhii jhe mundo jhojhoha jwapakujheketelana na mangota! Jhola jwajhendite ku ngondo na jhola jwahighilike kulonda mihigho jhito, bhoha nabhapata chehemo jhiilengana na nnyake. 25 Kubhoke lichiko lyenio, Daude ngatenda kilebhe kubhehe malaghalikilo na lilaghalikilo kwa kilambo chuku Ichilahele ade deleno.

26 Daude pahikita ku Sikilagi, ngabhapelikila akakochemundo bhibhakibha ighogholo bhuku Yuda, chehemo jha ilebhe, kukulonge, "Napelekela hupo kubhoke mu ilebhe ya akamakoko bha Bhambo Chapanga." 27 Hupo jhenio ikibha ku nhwalo gwa ilongoche yuku Beteli na ilongoche ibhii upande gwa kuchine mwa Lamoti na ilongoche bhibhatama ku Yatili, 28 ilongoche yuku Aloeli na ilongoche yuku Sifumoti na ilongoche yuku Eshitemoa, 29 na ilongoche yuku Lakali na ilongoche yuku miche jha Akayelameeli na ilongoche yuku miche jha Akakeni, 30 na ilongoche yuku muche gwaku Holima na ilongoche yuku muche gwa Bolashani na ilongoche yuku muche gwa Ataki, 31 na ilongoche yuku muche gwa Hebiloni. Helahela Daude ngabhapelikila ilongoche yoha yatyangila jwenio na bhando bhake pibhajhahwila kujhobha.