1 Akafilichite pubhalipukila kwa makakala Lichanduko lya Lilaghano lya Bhambo Chapanga, ngabhaligheghita kuhumii ku muche gwa Ebenezeli ngabhalipelika ade kumuche gwabhe gwa Ashidodi. 2 Peniya, ngabhalijhingicha Lichanduko lya Lilaghano lya Bhambo Chapanga munyumba jha kichapanga gwabhe jwakemitwa Dagoni nukulibheka pahina jha kichapanga Dagoni. 3 Lichiko lilikengime putepute, bhando bhuku Ashidodi pibhajhimwika ngabhakihweina kichapanga cha Dagoni kigwile mangukama nnonge jha Lichanduko lya Lilaghano lya Bhambo Chapanga. Ngabhakijhinwila kabhele kichapanga chabhe cha Dagoni nukukibheka chehemo jhake pikikibha. 4 Nambo lichiko lilikengima lukela, pibhajhimwika, ngabhakihweina kichapanga cha Dagoni kigwii mangukama nnonge jha Lichanduko lya Lilaghano lya Bhambo Chapanga! Muto na magholo na mabhoko gha kichapanga chenio ghametukine, nukugholoka mu heke jha nnyango. Kiwiliwili tu ndi chikihighilile mu kichapanga chenio. 5 Ndi nhwalo ade deleno akapiya matambiko bha Dagoni na bhando bhoha bhuku Ashidodi, pibhajhingii mu nyumba jha Dagoni kunyinamila, bhilebhete jhe kikolamino cha jha nyumba jhenio ade deleno kwenio ku Ashidodi.

6 Bhambo Chapanga ngabhachwapwila hake bhando bhuku Ashidodi na bhando bha pahina jhabhe, ku kwalete ulwalo gwa mapute. 7 Bhando bhuku Ashidodi pighaweine ilebhe yenio, ngabhalongila, "Bhambo Chapanga jwa Akaichilahele atuchwapuu hake twenga pamonga na Chapanga gwito Dagoni. Ngohe, Lichanduko lya Lilaghano lya Bhambo Chapanga lihoto jhe kutama kwito." 8 Bhahe, ngabhakemita ilongoche bhoha bha Akafilichite na kwakonya, "Bho, natutenda bho na Lichanduko lende lya Chapanga jwa Akaichilahele?"

Bheniya ngabhajhangwila, "Lichanduko lyenio lya Chapanga jwa Akaichilahele milipeleka ku Gati." Bhahe, na bheniya ngabhalipeleka ku muche gwa ku Gati.

9 Nambo pibhalihamichila lichanduko lyenio ku Gati, Bhambo Chapanga ngauchwapwila muche gwenio, ngabhatweliya kiholo, na ngabhachwapwila akanalome bha muche gwenio, ingombo kwa ighogholo, ku kwalete mapute. 10 Bhahe, ngabhalipelika Lichanduko lyenio lya Bhambo Chapanga ku muche gwa Ekiloni. Nambo Lichanduko lyenio pilihikita kwenio, bhando bha muche gwenio, ngabhalelita kanonowa kukulonge, "Bhatuletii Lichanduko lya Bhambo Chapanga jwa Akaichilahele, kupala kutukoma twenga na bhando bhito." 11 Peniya, ngabhakemita kabhele ilongoche ya Akafilichite nukulonge, "Milibhujhiche Lichanduko lya Bhambo Chapanga jwa Akaichilahele kwatoila, kupala likoto kutukoma twenga pamonga na bhando bhito." Bhalongila yene ku nhwalo pakibha na kiholo kikolongwa pa muche gwoha, nhwalo Bhambo Chapanga abhachwapwila hake. 12 Bhando bhamahele ngabhawila, na ata bhibhahighilike, ngabhalalitwa mapute nukulela kwabhe ngakujhokonikika kwa ichapanga yabhe, kupala kwatangatila.