1 Lichiko limo, Yonasani mwana jwa munahota nkolongwa Sauli ngannobholila ntumiche jwake jwangheng'eghela chilaha, "Hika, tijha kwiye ku kighono cha Akafilichite." Nambo Yonasani akannobholii jhe tate mundo. 2 Sauli akibha akabhekite kighono chake kwenio ku Migilone, pahe jha nkongo gwa nkongamanga, panja jha muche gwa Gibeya, akibha pamonga na akakomana ngondo miya chita. 3 Panakate jhabhe akibha Abiya, mwana jwa Ahitobu nnongo mundo Ikabodi mwana jwa Finehasi, nchoko mundo Ele, mpiya litambiko jwa Bhambo Chapanga, kwenio ku Shilo, jwahwalita kichibao chu upiya litambiko. Bhando bhakamanyiti jhe kubhehe Yonasani abhokite.

4 Mukijhomboko chenio cha Mikimashi, Yonasani chapata apete kuhika kukighono cha Akafilichite, pakibha na mandalabho mabhele ghighanyenyike, upande ghongo na upande ghonge. Lindalabho limo likemitwa Bosesi na lenge likemitwa Sene. 5 Lindalabho limo lyakibha kachikachine lilolikiya ku muche gwa Mikimashi na ghonge gwakibha kuchine lilolikiya muche gwa ku Geba.

6 Yonasani ngannobholila kangombo jhola jwang'eghela chilaha, "Tijha, tijhomboka upande ghuubhele gwa mukighono cha bhando bhala bhangammanya Bhambo Chapanga. Pange jhe Bhambo Chapanga natutangatila kuhotola ngondo, nhwalo kibhii jhe chikihoto kunhibhikiya Bhambo Chapanga kukombola ibha kwa bhamahele amu bhando bhandina."

7 Kangombo jwenio ngannyangwila Yonasani, "Tenda chochoha chimipala kutenda, nenga mii pamonga na mwenga kwa chochoha chimpa kutenda." 8 Yonasani ngalongila, "Bhahe, hika natujhomboka kwajhende bhala bhando kupala bhatubhone. 9 Anda bhatulobholii mutulendele, ade bhahike pamba patubhi natujhema papa, na hilu natwakengama jhe. 10 Nambo anda bhalongii twakengame bhahe, natwakengamila, kilebhe chenio nakibhaha nginyililo kubhehe Bhambo Chapanga atutei twahotole."

11 Bhahe, ngabhapitila nnonge jha liboma lya Akafilichite. Akafilichite pubhahwehina ngabhalongila, "Dola, Akaebulaniya bhipita mu mabhomba mubhakajhobhite." 12 Akafilichite bhibhakibha mu liboma ngabhankemita Yonasani na ntumiche jwake, "Hikangana kongo kwito, na twenga natunhina unyagho." Yonasani ngannobholila kangombo jhola jwa ng'eghila chilaha, "Ngengamila, Bhambo Chapanga atutei Akaichilahele twahotole."

13 Bhahe, Yonasani ngakwelita kwa mabhoko na magholo ghake, kongo akengimwa na kangombo jhola jwa ng'eghila chilaha. Yonasani ngabhajhingilila Akafilichite kukwagwiya pahe kongo kangombo jhola ngakengima unyuma kwakoma. 14 Mulijhingililo lyukutumbula, Yonasani na kangombo jwake nng'egha chilaha jhola, ngabhakomita bhando ngita makome mabhele, mu chehemo lilihikii nucho heka. 15 Mu kilambo choha cha Akafilichite ngabhabhila nikiholo, akakomana ngondo mu ighono na bhubhabhii mu mighonda na mu maboma na ata bhala bhibhajhingilii chenda amu miche kwa makakala, bhene hele ngabhalendima. Bhando bha kilambo chenio ngabhajhogwipa hake, kwa kiholo chikitumitwe na Bhambo Chapanga.

16 Akakomana ngondo bha Sauli bhibhakibha kwenio ku Gibeya jha Benjamine ngabhabhona akakomana ngondo bha Akafilichite bhamahele bhabhoghanike bhatilita kongo na kola. 17 Sauli ngabhalobholila bhando bhalongohina nabho, "Ajha mukibhalange kupala tumanye achighane bhanyogholwike pakate jhito." Mukibhalange, ngabhamanya kubhehe Yonasani na ng'egha chilaha jwake bhabhii jhe. 18 Sauli ngannobholila mpiya litambiko Ahiya, "Deta pamba Lichanduko lya Bhambo Chapanga." Kipinde chenio Lichanduko lya Lilaghano lya Bhambo Chapanga, likibha kwa Akaichilahele. 19 Kipinde Sauli pajhendilila kulonge na mpiya litambiko, lihangambwela mu kighono cha Akafilichite ngaichocha nu kuchochekeya hake, yene Sauli ngannobholila mpiya litambiko Ahiya, "Deka, nkoto kutenda kilebhe chochoha." 20 Peniya, Sauli na bhando bhake ngabhakilenganikiya kukomana ngondo na Akafilichite. Nambo ngabhakolila Akafilichite bhabhoghanike nu kukomana kwa upanga bhene kwa bhene. 21 Akaebulaniya bhala bhibhakibha upande gwa Akafilichite na bhibhajhenda nabho kwenio kukighono, ngabhaghalambwika nu kukilomba na Akaichilahele bhibhakibha pamonga na Sauli na Yonasani. 22 Akaichilahele bhoha bhibhakibha bhakihiite mu kilambo cha itombe ya Efulaimo, pubhajhoina kubhehe Akafilichite bhatilite, na bheniya hele ngabhakengamila nu kwabula. 23 Yene, ndi Bhambo Chapanga chibhatangatila Akaichilahele bhahotole lichiko lyenie. Na ngondo ngijhendilila ade ku Bete aveni.

24 Lichiko lela Akaichilahele ngabhang'ahika hake, nhwalo Sauli akalapanikii bhando kukulonge, "Jhuna likoto mundo jhojhoha jwapakulye lyobha nukutipika jhe, na kabula ninalepechela jhe akamakoko bhango" Yene, lichiko lyenio abhii jhe mundo jhojhoha jwakapaite chochoha. 25 Akakomana ngondo bhoha pubhajhingila mulitogholo, ngabhukolila bhuche ujhenii kila chehemo. 26 Pamonga na bhuche gwenio kundonyeka kila chehemo, abhii jhe nkomana ngondo jhojhoha jwakapaite bhuche gwenio kukujhoghopa kilapo chibhalapichwa. 27 Nambo Yonasani akajhoini jhe kipinde tate mundo pabhalapicha bhando. Bhahe, ngahatambwila luyato lwake nukuchwiya mulihegha lya bhuche, ngachopita bhuche gwenio. Peniya, ngakijhoa kubhehe na makakala. 28 Nkomana ngondo jhumo ngannobholila, "Tate gwino akabhalapanikii bhando changa jhoghopa kukulonge, ‘Abhaha na likoto mundo jhojhoha jwapakulye deleno.’ " Ndi nhwalo bhando bhabhii chwapu na njala.

29 Yonasani ngajhangwila, "Tate gwango abhang'ahicha bhando. Ne ngwete makakala, nhwalo ghu kuchopa bhuche ghongo gwandina. 30 Ngaibhii mbone akakomana ngondo bhito ngabhalii kandina kuhumii muilebhe yibhaipukile kwa makakala kuhumii kwa akamakoko bhabhe, ngabhabhii na makakala na Akafilichite twe ngabhakomitwe."

31 Lichiko lyenio, Akaichilahele ngabhabulita Akafilichite kubhoke ku Mikimashi ade ku Aiyalone. Kipinde chenio Akaichilahele bhabhii bheya kwa njala. 32 Bhahe, ngabhaibhutukila ilebhe yibhapukile kwa makakala kwa Akafilichite, ngabhatoila matohe gha mambelele na makambako gha ng'ombi na matohe gha ng'ombi, ngabhachinjita, ngabhalila nyama pamonga na myahe. 33 Nkomana ngondo jhumo ngannobholila Sauli, "Dola, bhando bhitenda uhakaho palonge jha Bhambo Chapanga kukumemena nyama jhina myahe."

Sauli ngabhalobholila bhando, "Mangota ntwekwii uhobholelo. Milibhilimbiya lighanga likolongwa lihika pamba pa mi nenga kajhombe."

34 Peniya, Sauli ngabhalobholila bhando, "Nnyendengane makalobholele bhando bhoha bhaleta ng'ombi na mambelele ghabhe pamba, machinjila pamba na mumemena. Mangatenda jhe uhakaho palonge jha Bhambo Chapanga, kukulye nyama jhina myahe." Yene uhwiko ghola bhando bhoha ngapelika ngombi yabhe nu kwichinjii peniya. 35 Ndi Sauli nganchengila Bhambo Chapanga chehemo jhukupiikiya litambiko. Jhenio ndi ikibha chehemo jhukutumbula jhukupiikiya matambiko, Sauli jhakanchengi Bhambo Chapanga.

36 Peniya, Sauli ngabhalobholila akakomana ngondo, "Tijhangana takengame Akafilichite kilo, tukajhingilila, nukwapoka ilebhe yabhe ade pukuchegha natunneki jhe mundo jhojhoha abhehe ghome." Akakomana ngondo ngabhannobholila

"Ntenda chela chimikibhona chamaha kwino." Nambo mpiya litambiko Ahiya ngalongila, "Tunkonye hote Bhambo Chapanga."

37 Bhahe, Sauli ngankonyita Bhambo Chapanga, "Bho, nhelele kululambo nakajhingilile Akafilichite? Bho, namututangatila kwahotola bheniya?" Nambo Bhambo Chapanga akajhangwi jhe lichiko lyenio. 38 Sauli ngalongila, "Nhwikengane pamba mangota ilongoche ya akakomana ngondo, tumanye uhakaho ghane ghututei deleno. 39 Nilapii kwa Bhambo Chapanga jwabhii ghome na jwaikombola Ichilahele, ata abhehe mwanango Yonasani ipalwa akomwa." Nambo abhii jhe mundo jwajhangwi. 40 Sauli ngabhalobholila Akaichilahele bhoha, "Mangota nnyemangana koloko, nenga na mwanango Yonasani tujhema kongo." Na bheniya ngabhalongila,

"Ntenda chela chimikibhona chamaha kwino." 41 Sauli ngannyopita Bhambo Chapanga kukulonge, "Mwe Bhambo Chapanga, Chapanga jhuku Ichilahele, kwanike unyangwi jhe ne nantumiche gwino? Mwe ma Bhambo Chapanga jhuku Ichilahele anda lilemwa ndehi nenga amu kwa mwanango Yonasani, bhahe, ntemulana kwa lighanga lya Ulimu. Nambo anda lilemwa lyenio libhii kwa bhando bhino bhuku Ichilahele, ntemulana kwa lighanga lya Sumimu." Yonasani na Sauli ngalyagwelila lilemo nambo bhando ngabhabhila njelembo. 42 Sauli ngalongila, "Ntende kihumbuhumbu nnobhole pakate jhango na mwanango Yonasani." Kihumbuhumbu nnobhole ngakimgwelila Yonasani. 43 Ndi Sauli ngannobholila Yonasani, "Unobholele kilebhe chinteile."

Yonasani ngajhangwila, nakapaite bhuche gwandina tugha kwa nkongoche gwango, mii pamba imbalwa ngomwa.

44 Sauli ngalongila, "Bhambo Chapanga angoma nenga anda Yonasani nakomwa jhe."

45 Nambo akakomana ngondo ngabhannobholila Sauli, "Kwanike Yonasani akomwe, anda abhatangatii Akaichilahele kwabula akamakoko bhito? Kilebhe chenio changapitii jhe. Tulapii kwa Bhambo Chapanga jwabhii ghome ata lijhunjo lya umuto gwake naligwelila jhe pahe. Nhwalo kilebhe chatei deleno, atei kukutangatilwa na Bhambo Chapanga" Yene akakomana ngondo ngabhankombwila Yonasani akoto kukomwa.

46 Peniya, Sauli ngalekita kwakengamila Akafilichite, na bheniya Akafilichite ngabhakelehwika mu kilambo chabhe.

47 Sauli pakibha munahota nkolongwa jhuku Ichilahele, ngabulina na akamakoko bhake bha kila upande. Ngabulina na Akamoabo na Akamone na Akaedomu na akanahota akakolongwa bhuku Soba na Akafilichite. Kila pakomina ngondo, ngabhahotwila. 48 Ngakomina changajhoghopa, na kwahotola Akameleke. Ngabhakombwila Akaichilahele kubhoke kwa bhando bhoha bhibhakomina nako.

49 Yana inalome ya Sauli bhakibha Yonasani na Ishivi na Malike shuwa. Helehela akibha na yana ikeghe ibhele, nchikana jhukutumbula akemitwa Melabu na unung'una akemitwa Mikale. 50 Nhwana mundo akemitwa Ahinoamo, mwana jwa Ahimaache. Nkomana ngondo jwa Sauli akemitwa Abineli, mwana jwa Neli, tatemundo unung'una jwa Sauli. 51 Tatemundo Sauli akemitwa Kishi, na tatemundo Abineli akemitwa Neli, mwana jwa Abiele.

52 Machiko ghoha gha ughome gwake Sauli, pakibha na ngondo ngolongwa pakate jha Akafilichite na Akaichilahele, na kila kipinde Sauli pamweina mundo jhojhoha jhuna makakala amu jwangajhoghopa, ngantoila nukuntenda kubhehe nkomana ngondo jwake.