1 Bhahe, Hana ngajhopita nu kulonge,

"Mwojho gwango nhwanganii Bhambo Chapanga.

Ninnomba Bhambo Chapanga jwabhii makakala ghango.

Naheka akamakoko bhango,

nhwalo Bhambo Chapanga andangatile."

2 Abhii jhe jwabhii nyahinyahi ngita Bhambo Chapanga,

abhii jhe jhojhoha jwabhii ngita jwenie,

abhii jhe jwahoto kutulonda ngita Bhambo Chapanga gwito.

3 Nkoto kukikweya,

nkoto kulonge kwa ngandango.

Ku nhwalo Bhambo Chapanga ndi jwaimanya.

Jwenie ughapema matendwa ghoha gha bhando.

4 Mbinde jha akakomana ngondo bhina makakala, imetukine.

Na bhaleghelaho bhabhii na makakala.

5 Bhala bhibhabhila na yakulya mbwe makacho, ngohe bhihenga mahengo kupala bhapata chakulya.

Nambo bhala bhibhabhila na njala, ngohe bhihangani kujhukuta

Mwikeghe ntonga apapite yana chaba,

Nambo majhe jhuna yana mbwe,

ahighilike changa mwana.

6 Bhambo Chapanga ikoma nu kuyokecha,

jwenie ubhahuluwa pahe ade kukilambo cha bhando bibhawile,

na kabhele uyokecha.

7 Bhambo Chapanga utenda bhange kubhehe akahocho, na bhange kubhehe bhina ilebhe mbwe.

Bhange ubhahuluwa na bhange ubhajhinula.

8 Ujhinula akahocho kuhumii mulutukunda,

na ubhajhinula bhina malola kubhoke mumaliho,

kupala abhatamicha pamonga na ilongoche,

nu kwabheka mu igoda ya ichima.

Nhwalo, michinge jha nnema ndi jha Bhambo Chapanga,

na panane jhake abhekite nnema.

9 "Jwenie ulonda ughome gwa bhando bhake bhibhahobholeka,

nambo ughome gwa bhanganandela uuleke mulubhendo.

Nhwalo, mundo ipata jhe kuhotolo kwa makakala ghake.

10 Akamakoko bha Bhambo Chapanga nabhakomelekelwa pulutu.

Kuhumii kunane kwa Chapanga, nabhabula kwa mbamba.

Bhambo Chapanga nauhadabula nnema gwoha,

nampela makalala munahota nkolongwa jwake,

jwenie naujhinula uhotolo gwa jwakihaghulile."

11 Peniya, Elikana ngakelehwika ukajha kwenio ku Lama. Nambo mwana Chamwele, ngahighilika kuntumikii Bhambo Chapanga pahe jhu ulongoche gwa mpiya litambiko Ele, kwenio ku Shilo.

12 Yana inalome ya mpiya litambiko Ele ikibha yanganandela hake, bhakanyokonikii jhe Bhambo Chapanga, 13 na hilu ilebhe yiipalwa bhando kwapela akapiya matambiko. Kila mundo pakibha abhoita litambiko lyake, kongo nyama ikabhela, ntumiche jwa mpiya litambiko ngahikita na kilebhe chukujhipuli likolo, china mino matato, 14 ngakihomika kilebhe chenio chukujhipulii likolo mukiteleko chenio, nyama jhojhoha jhiipakujhokolwa mwenio na kilebhe chenio, chaibha jha mpiya litambiko. Akaichilahele bhoha bhibhajhahwila kwenio ku Shilo kupiya matambiko ghabhe, ngabhatendilwa yene. 15 Kuchocha kwa gheniya, mahuta nukujhocha jhe, ntumiche jwa mpiya litambiko uhika nu kunnobholela mundo jwapiya litambiko lyenio, "Mpiikiye mpiya litambiko nyama jhu kubanika, nhwalo jwenie napokela jhe nyama jhino jhukututuwa, nambo jhibhii mbehe."

16 Anda mundo jwenio annyangwii, "Dendela hote nnyoche mahuta, peniya, nantola chochoha chimipala," peniya, ntumiche jwa mpiya litambiko unnyanguu, "Nai jhe, mbela ngohengohe. Anda jhe chandola kwa makakala."

17 Uhakaho ghongo gwa ingombo yenio ya mpiya litambiko Ele, ukibha nkolongwa hake nnonge jha Bhambo Chapanga. Nhwalo ingombo yenio ikapuchite matambiko gha Bhambo Chapanga.

18 Kipinde chenio, Chamwele ngajhendilila kuntumikii Bhambo Chapanga, kongo awalite kichubao kinhuo. 19 Kila chaka majhemundo ngampumila likanjo lichokombe, nu kumpelekela pajhenda na nnganamundo kupiya litambiko lya kila chaka. 20 Mpiya litambiko Ele kila chaka ngampila mota Elikana na nhwanamundo, kukulonge,

"Bhambo Chapanga ampela yana henge kwa mwikeghe jhonjo, kupala bhatola pwache jha jhola jhumpile Bhambo Chapanga."

Peniya, ngabhakelewika kajhabhe. 21 Bhambo Chapanga ngammonila kiya Hana, na jwenie ngapatita yana henge itato inalome na ikeghe ibhena. Na jwenie Chamwele ngajhendelila kukola nnonge jha Bhambo Chapanga.

22 Kipinde chenio Ele akibha aghogholwike hake. Na jwenie ngajhoina malobhe ghoha yana yake ibhatendila Akaichilahele bhoha. Helehela chibhagholwika na akakeghe bhibhahengita mahengo pa chehemo jha kujhingilila mu lihema lya Kukonganikila, 23 Ele ngabhakonyita, "Kilebhe ghane mitenda ilebhe ngita yenehe? Nhwalo nyoine kubhokee kwa bhando bhoha, panane jha itendwa ino yanganandela yimihenga. 24 Mangatenda jhe yene mayanango, nhwalo malobhe ghenia ghoha ghinijhoha kuhumii kwa bhando bha Bhambo Chapanga, ghanganandela. 25 Mundo anda annemwii nnyake, ahoto kujhopelwa kwa Chapanga, kupala Chapanga annekekeye. Nambo mundo anda annemwii Bhambo Chapanga, ghane jwahoto kunnyopela alekekelwe?"

Nambo yana yenio ikannyokonikii jhe tate gwabhe, ku nhwalo Bhambo Chapanga akapangite njwe kwakomelekeya. 26 Na kangombo Chamwele ngajhendilila kukola, ngachochita kupalwa na Bhambo Chapanga na bhando helahela.

27 Lichiko limo, mundo jwa Chapanga nganyendila Ele nukunnobholela, Bhambo Chapanga ilonge naha, Bho, nakakilangi jhe hotuhotu kwa nyumba jha Alune na ighogholo ino, pibhakibha akabhanda bha Falao, kukilambo chuku Michile. 28 Pakate jha makabila gha Akaichilahele, Alune na akalongomundo ngabhahaghulilwa kubhehe akapiya matambiko bhango bhandumikile, bhandumikile pa chehemo jhu kupiikiya matambiko, bhatutukiye ubane nukuhwala kichubao nnonge jhango. Helahela nganapila matambiko ghango hokolo gwino Alone, matambiko ghango ghipiitwe kwa mwotu na Akaichilahele. 29 Ku nhwalo ghane mikola wiho mu matambiko ghango gha nalaghalakii bhando bhanetele? Kilebhe ghane miijhokonikii yana ino kuliku nenga kwa kukikendecha mabhene kukulye chehemo jhambone jha kila matambiko ghinipelwa na bhando bhango bhuku Ichilahele? 30 Kuyene, Bhambo Chapanga, Chapanga jhuku Ichilahele, ilonge naha, nakalaghile kubhehe nyumba jhino na nyumba jha tate gwino, niika nnonge jhango kundumikila machiko ghoha ghangapeta. Nambo ngohe, Bhambo Chapanga ilonge naha, Kilebhe chenio ngohe kipechwike! Bhala bhibhanyokonikiya nane hele nanajhokonikiya na bhala bhibhambucha nane hele chanapuchwa. 31 Dola, machiko ghabhandikile chanakoma ingombo inalome yoha munyumba jhino na mulukolo lwino, napabhe jhe na munalome jhojhoha mulukolo lwino, jwapakutama ade aghogholoke. 32 Nunkola kiholo namakolela ajhino wiho kwa mota yoha yanipakwape Akaichilahele, nambo abhii jhe mundo jhojhoha pakate jha munyumba jhino jwapakulama ade mughogholo. 33 Jhumo pakate jha ibhelukwa ino nahighilika, na jwenio nandumikila ngita mpiya litambiko, nambo nanintenda kubhehe jwangalola na kuhobhoya kihobholelo na ibheluko ino nabhakomwa ku ukokotoko. 34 Na chenje nakibhaha nginyililo jha uchakaka kwino ghala ghighapakwakole yana ino inalome Hofini na Finehasi, bhoha bhabhele nabhakomwa lichiko limo. 35 Peniya, nanihaghula mpiya litambiko jhonge jwahobholeka kwango, jwapakuhenga telatela, ghala ghinipala ahenge. Nanimpela kibheluko chikibhii nganganga, jwenie natumikila machiko ghoha nnonge jha munahota nkolongwa gwango jhuninhagwile. 36 Jhojhoha jwapakuhighala munyumba jhino, nanyendela mpiya litambiko jwenio nukunnyopa madine gha feza amu kipande cha libumunda, nu kunnobholela, "Chonde umeke mulihengo lya kwatangatila akapiya matambiko, kupala mbate kilebhe chukulyegha."