1 Mu likabila lya Benjamine pakibha na mundo jhumo jhuna ilebhe mbwe na jwamanyikine hake jwakemitwa Kishi. Jwenio Kishi akibha mwana jwa Abiele, tatemundo akibha Zelo, jwapapitwe na Bekolati, mwana jwa Afiya, jwa likabila lya Benjamine. 2 Kishi akibha na mwana munalome jwakemitwa Sauli. Jwenio akibha kangombo jwa lembulembu hake, akibha jhe jwalandina nako pakate jha Akaichilahele, akibha ntandamaho kuliku Akaichilahele bhange.

3 Lichiko limo maponda gha Kishi, tate mundo Sauli, ngaghahobhalila. Yene Kishi ngannobholela Sauli mwana mundo, "Muntole jhumo jwa akatumiche nnyende nako makapalahe maponda." 4 Ngabhapaliya kukilambo cha itombe ya Efulaimo na chehemo jha Shalisha nambo bhakaghakolii jhe. Helahela ngabhahikita ku kilambo chiitombe yane Shalimo, hele bhakaghakoli jhe kwenio. Ngabhajhendilila kwapalaha kukilambo cha Akabenjamine helahela bhakaghawe jhe kwenio. 5 Pibhahikita kukilambo cha Sufu, Sauli ngannobholila jhola jwalongohina nako, "Hika tukelebhuke ukajha anda nai jhe tate gwango naleka kughahwachi maponda, nabhaha ngolongonde kutuhwachi twenga."

6 Ntumiche jhola ngajhangwila, "Denda pandina, pamuche ghongo abhii mundo jwa Bhambo Chapanga jwajhokanikilwa hake na kila chalonge kibhe chakaka. Ngohe tunnyendelele pange ahoto kutulobholela mwanja gwito tujhingilila kojhe."

7 Sauli ngankonyita ntumiche jwake, "Anda tunnyendelile natumpela nike? Dola chakulya mulihako lito kijhomwike na kibhii jhe kilebhe chochoha chukumpela mundo jwenio jwa Chapanga. Bho tukwete nike?"

8 Ntumiche jhola ngannyangwila kabhele Sauli, "Dola, ngwete chente jhimo njokombe jha madine gha feza ncheche jha mbijha. Nanimpela jwenio mundo jwa Chapanga kupala atulobholele tujhingilila ndela ghane mwanja gwito." 9 Makacho bhando bhuku Ichilahele anda mundo ajhenda kukonyekeya nhwalo kwa Chapanga ilonge naha, "Tijha kwa mundo jwalondola. Nhwalo mundo jwakemwa nnondole machiko ghanga, kipinde chenio akemitwa nnondola." 10 Sauli ngannyangwila ntumiche jwake, "Chakaka nnongi maha, ajha, tijhende." Yene ngabhajhenda ku muche gwatamita mundo jhola jwa Chapanga. 11 Pibhahowika kitombe kujhenda kubomane, ngabhakongina na achikabhale bhibhajhenda kuteka mache kukilibha, ngabhakonyita achikabhale bheniya, "Bho, nnondola abhii pa bomane?" 12 Achikabhale bhala ngabhajhangwila, "Abhile." Abhii nnonge jhino, anda nnyombihine namunkolela. Ajhingii pabomane pito deleno, nhwalo bhando nabhapiya litambiko, kwenio kukitombe. 13 Papa tu pumpakujhingii pabomane, namunkolela kabula anajhenda jhe chehemo jhu kujhinamila kukitombe, kupala kulyegha. Bhando nabhalya jhe ade papakuhika, nhwalo ipalwa atumbula kuipe mota yakutambikila, ndi bhala bhibhalalikwe nabhalya pamonga na bhando bhibhabhii pena. Yene, nhobhokane ngohe, namkolela chaa jhenje. 14 Sauli na ntumiche gwake ngabhajhenda pa bomane, pibhajhingila pa bomane ngabhamweina Chamwele, akahumila ku bomane ahika kubhabhile, akijhendila pi kitombe pu kujhinamila.

15 Bhahe, lichiko limo, kabula jhu kuhika Sauli pabomane, Bhambo Chapanga akannobholile Chamwele nhwalo gwa Sauli. 16 "Kilabho, kipinde ngita chenje, naninetela mundo kuhumii mu kilambo cha likabila lya Benjamine, namwenga namumpakaya mahuta kubhehe kilongoche jwa bhando bhango bhuku Ichilahele. Jwenio nabhaghombola bhando bhango kuhumii kwa Akafilichite, nhwalo nighawene mang'ahe gha bhando bhango, na kulela kwabhe nikujhohine." 17 Chamwele pakongina tu na Sauli, Bhambo Chapanga ngannobholila, "Jhonjo ndi jhola mundo jhuninnobholila jwapakwalongocha bhando bhango Akaichilahele." 18 Sauli nganheghelila Chamwele palitangala lya muche nu kunnobholela, "Chonde unangiye nyumba jha jwalola mihalo jha bhando nukwalobholela."

19 Chamwele nganyangwila, "Ne ndi jwanilola. Nnongolele kujhenda chehemo jhukujhinamila, nhwalo deleno nanyakila pamonga na nenga na kilabho lukela machwale ghino ghoha naninnyangula. 20 Nkoto kubhehe na kiholo kwa maponda ghino ghighahobhalile machiko matato ghighapetite, ghabhonikine njwe. Nambo ghane jhola jhubhampai hake Akaichilahele, bho, mwe ndeka na nyumba jha tate gwino?"

21 Sauli ngajhangwila, "Nenga jwa likabila lya Benjamine, likabila lichokombe kupeta makabila ghoha gha ku Ichilahele. Na mu likabila lyoha lya Akabenjamine, akalongo bhango ndi bhachokombe hake. Kwanike unnobholele kilebhe ngita chenio?"

22 Peniya, Chamwele ngampelika Sauli na ntumiche jwake pa udamo, ngabhabheka chehemo jha ichima, kwenio akaghene bhibhalalikwe bhakibha bhatamita, pakibha na akaghene bhibhahikii makome matato. 23 Chamwele ngannobholila mundo jwateleka, "Deta kipande cha unoho ghola ghunimpila, jhela jhinnobholila miibheka pakanjika." 24 Jwateleka jhola ngajhenda kutola libhondo lyoha, nu kubheka nnonge jha Sauli. Ndi Chamwele ngannobholila Sauli, "Dola chenje ndi chikibhekitwe ku nhwalo gwino. Memena nyama jhenje ibhekitwe kunhwalo gwino, kupala mmemena pamonga na akaghene."

Yene Sauli ngalila pamonga na Chamwele lichiko lyenio.

25 Pibhahelila kubhoke chehemo jhukujhinamila pikitombe nukubhujha kubomane, Chamwele ngannenganikiya Sauli pukugholoka pa dale,

26 na jwenie ngagholwika kwenio.

Sauli ngajhimwika, jwenio na Chamwele ngabhabhokita nukujhenda kundela. 27 Pubhahikita pujhomoke muche, Chamwele ngannobholila Sauli, "Munobholele kangombo jwenio alongelela nnonge jhito." Kangombo pabhokita Chamwele ngajhendilila kulonge, "Dendela kandina ne naninchimulila ghala ghalongila Chapanga."