1 Kipinde chenio, mwana Chamwele pantumikila Bhambo Chapanga pahe jha ulongoche gwa Ele, malobhe kuhumii kwa Bhambo Chapanga ghakibha ghandina tugha na helahela Chapanga ngabhalangiya bhando bhake ilebhe yandina tugha. 2 Mu kipinde chenio, mpiya litambiko Ele akibha aghogholwike hake ade miho ghake ghalolita jhe maha, lichiko limo uhiko akibha agholwike mu chumbe chake, 3 na Chamwele akagholwike mu Nyumba jha Bhambo Chapanga, pahina na lichanduko lya lilaghano lya Bhambo Chapanga. Na lumule lwa Bhambo Chapanga lwakahimike jhe, ku nhwalo pakachii mbone jhe. 4 Peniya, Bhambo Chapanga ngankemita Chamwele,

Na Chamwele, ngajhangwila, "Ne pamba." 5 Peniya, Chamwele ngajhahwila kajhombe kwa Ele nu kunnobholela "Ne pamba, nhwalo undekungema."

Nambo Ele ngannobholila, "Ne ninkemiti jhe. Nyenda makagholoke." Chamwele ngajhahwila kugholoka.

6 Bhambo Chapanga ngankemita kabhele, "Chamwele!" Chamwele ngajhimwika ngannyendila Ele nuku nnobholela, "Nhikite, nhwalo undekungema."

Nambo Ele ngannobholela, "Ninkemiti jhe mwanango, nnyende makagholoke." Chamwele ngajhahwila kugholoka. 7 Kipinde chenio, Chamwele akammanyite jhe Bhambo Chapanga, hilu Bhambo Chapanga akalongi jhe na jwenie.

8 Bhambo Chapanga ngankemita Chamwele mala jhu utato. Chamwele ngajhimwika, ngannyendila Ele nukunnobholela, "Nhikite, nhwalo undekungema." Peniya, Ele ngang'amwiya kubhehe Bhambo Chapanga ndi jwankemita Chamwele.

9 Kuyene Ele ngannobholela Chamwele, "Jhenda makagholoke, anda ankemite kabhele, munnobholela naha, ‘Dongela, Bhambo Chapanga, ne ntumiche gwino ninyokonikiya.’ " Yene Chamwele ngajhahwila kugholoka.

10 Ndi Bhambo Chapanga ngahikita nu kujhema peniya, ngankemita Chamwele ngita chukutumbula, "Chamwele! Chamwele!"

Chamwele ngajhangwila, "Dongela, mwe Bhambo, ne ntumiche gwino ninnyokonikiya." 11 Peniya, Bhambo Chapanga ngannobholila Chamwele, "Dola, mbala kutenda kilebhe ku muche gwa ku Ichilahele, kila mundo jwapakujhoha nachituka hake. 12 Lichiko lyenio nanenganikiya ghala ghoha ghinnongila chanintendela Ele na nyumba jhake, kuhumii pukutumbula ade upehekelo, chanintendela. 13 Ku nhwalo ninnobholile njwe kubhehe nanihadabula nyumba jhake machiko ghoha ghangapeta, kunhwalo gwa uhakaho gwaumanye, ghubhatei yana yake inalome kukunigha nenga na jwenie ngalekita kwaibhilikiya. 14 Yene, nilapanikiya nyumba jha Ele, kubhehe uhakaho gwabhe naupepulilwa ng'o ku litambiko lya kukomelekeya amu kwa litambiko lenge."

15 Chamwele ngagholwika pala ade lukela, peniya, ngajhimwika nukudinduu milyango jha Nyumba jha Bhambo Chapanga. Nambo Chamwele ngajhogwipa kunnobholela Ele maloto ghala. 16 Ata yene Ele ngankemita Chamwele, "Chamwele mwanango."

Jwenie ngajhangwila, "Ena, munahota!" 17 Ele ngankonyita, "Bho, Bhambo Chapanga annobholii nike? Unobholele hotuhotu manganhiya jhe, channobholile. Anda mihiya channobholile, Bhambo Chapanga nanchwapula chiipalwa." 18 Bhahe, Chamwele ngannobholila Ele ghoha ghalobholilwe, changa nhiya chochoha. Peniya Ele ngalongila, "Jwenie ndi Bhambo Chapanga, na ahenge chela jwenie chakibhona chambone."

19 Chamwele ngajhendilila kukola na Bhambo Chapanga ngabhila pamonga na jwenie, na ghoha ngaghatendika ngita chalongila Chamwele. 20 Bhando bhoha kukilambo chuku Ichilahele, kuhumii ku Dane, upande gwa kachikachine, ade ku Beel sheba, upande gwa kuchine, ngabhamanyita kubhehe Chamwele ndi nnondole jwa Bhambo Chapanga. 21 Bhambo Chapanga ngachochita kukilangiya kwenio ku Shilo. Kwenio ngampitila Chamwele nukulonge nako. Na jwenie Chamwele palongila kilebhe, Akaichilahele bhoha ngabhannyokanikiya.