1 "Bhahe, Chamwele ngajhomwika, Akaichilahele bhoha ngabhakonganika pamonga kulela malelo. Ngabhanchika kajhake kwenio ku Lama."

Pighapetita gheniya, Daude ngajhenda ku njenga jhuku Palane.

2 Pakibha na mundo jhumo kubomane jhuku Maone, kwenio ku Palane, jwenio akibha achuluchila ilebhe yake kwenio ku Kalimeli. Mundo jwenio akibha na mambelele elufo itato na mbuhe elufo jhimo Kwenio ku Kalimeli nu kwaheketa mangoma. 3 Mundo jwenio akemitwa Nabale na nhwana mundo akemitwa, Abigaeli. Abigaeli akibha mwikeghe jhuna malango na lembulembu hake. Nambo Nabale akibha na mwojho nnyundapahu na jwanganandela, kabhele akibha jwa lukolo lwa Kalebo.

4 Bhahe, Daude pakibha kunjenga ngajhoina kubhehe Nabale ahekita mangoma mambelele kwenio ku Kalimeli. 5 Daude ngatumita ingombo kome, ngabhalobholila, "Nnyendengane kwa Nabale kwenio ku Kalimeli, mukannobholele malobhe ghango." 6 Munnobholela malobhe ghanga. Uteeke ubhaha na mwenga, na ubhaha kwa akalongo bhino na yoha yubhii nayo. 7 Nyoine kubhehe miheketa mangoma mambelele ghino. Mbala umanye kubhehe akalucha bhino bhakibha pamonga na twenga, twenga twakabhengwite jhe na kipinde choha chibhakibha ku Kalimeli, kibhii jhe kilebhe chochoha chikihobhite. 8 Anda makonyite akatumiche bhino nabhannobholela. Ngohe, matendela ghambone bhando bhango, nhwalo tuhikite kipinde chu unyagho. Chonde mapele kilebhe chochoha chunkwete akatumiche bhino, na nenga mwana gwino Daude.

9 Bhahe, ingombo ya Daude ngabhajhahwila nu kunnobholela Nabale ngita chibhalaghalikilwe na Daude. Peniya, ngabhalendelila ujhangulo gwa Nabale. 10 Peniya, Nabale ngabhajhanguu akatumiche bha Daude, "Daude ndi meneke? Mwana jwa Yese ndi meneke?" machiko ghanga bhabhii akatumiche bhamahele bhatila akanahota bhabhe. 11 Bho, ndole mabumunda ghango na mache ghango na nyama yanachinjile bhando bhango, bhibhaheketa mangoma gha mambelele ghango, nukwapee bhando nangamanya kubhahumila?

12 Bhahe, ingombo ya Daude ngabhakelehwika nukunnobholela Daude ghala ghibhajhangulilwe na Nabale. 13 Peniya, Daude ngabhalobholila bhando bhake, "Kila mundo akikonga upanga gwake pakibhuno!" Kila mundo ngatenda yene na Daude ngabheka upanga gwake hele, bhando miya ncheche ngabhankengima Daude na bhando miya ibhele ngabhahighilika na mihigho.

14 Kangombo jhumo jwa Nabale ngannobholila Abigaeli, nhwana mundo Nabale, "Daude akatumite ingombo yake kuhumii kunjenga kupala kunnyambucha munahota gwito. Nambo jwenie ate kwaligha. 15 Nambo bhando abha bhakibha bhambone hake kwito, bhakatutendii jhe kibhoho, kipinde choha chitukibha nabho kwenio ku njenga, kibhii jhe kilebhe chito chochoha chituhobhiye. 16 Bheniya bhatulondita muhe na kilo, kipinde choha chitukibha kukulucha mambelele ghito. 17 Ngohe, nhwachila nhwalo ghongo na nhwaghula chukuhenga. Kilebhe chenje kihoto kuleta ngondo kwa munahota gwito na kwa akalongo mundo bhoha. Nabale ndi mundo jwanganandela na abhii jhe jwannyokanikiya jhojhoha."

18 Abigaeli ngajhombotika, ngatoila mabumunda miya ibhele, na mahako gha mambendela mabhele ghigatwelii divaye, na nyama jha mambelele nhwano ghighalenganikilwe mbone na ndolotolo kilo kome na chaba na ihagho miya jhimo ya chabibo nyomo na mabumunda gha tine miya ibhele, ilebhe yenio yoha ngakwelicha muliponda. 19 Ngabhalobholila akatumiche bhake, "Nnongohe ndela! Ne naninkengamila." Nambo Abigaeli akannobholii jhe unganamundo.

20 Pakibha ahelila, kongo ahobhokii liponda lyake nu kuhelela pu lulambo lwa kitombe, ngabhapwitikilina pwitu na Daude, na bhando bhake bhikijhenda upande gwahumi jwene. 21 Bhahe, Daude akibha akihwachii jwene, "Nenga nikibha nondita ilebhe yoha ya Nabale, na kibhii jhe kilebhe chake chochoha chikihobhite. Bho, naha ndi chanepa?" 22 Chapanga na angome nenga anda kilabho lukela nanyenda jhe kwakoma akanalome bhake bhoha.

23 Peniya, Abigaeli pammonita Daude ngajhombeteka kuhuluka pa liponda lyake, ngatamita makilikite kukuichimu Daude. 24 Ngagwelila mu magholo gha Daude nu kunnobholela, "Munahota gwango, lilemwa lyoha libhaha panane jhango. Chonde, nijhopa nongele na mwenga ne nantumiche gwino. Nijhopa nnyokanikiye chela chalonge ntumiche gwino. 25 Manganhwachii jhe Nabale mundo jwanganandela, ngita chilibhi liina lyake na jwene ndi hele chabhii. Jwenie akemwa Nabale, na chakaka jwenie apumbumwike. Munahota gwango, akatumiche bhino pimatumita ne nakamwendeka. 26 Ngohe, munahota gwango, nilapii kwa Bhambo Chapanga jwabhii ghome, ngita hela chummii ghome, kukubhehe Bhambo Chapanga anhibhilikiye nkoto kulepecha kukukoma bhando, bhaleka makoko bhino na bhala bhibhanhwachii mabhoho bhabhaha mandindilima ngita Nabale. 27 Munahota gwango, ninyopa mpokele hupo jhenje jhaninnetile, na mapele akatumiche bhino bhibhalongohana na mwenga. 28 Chonde, unekekeye nenga kwa lilemwa lyatei ntumiche gwino, Bhambo Chapanga, nampela mwe akalongo bhibhabhii nganganga, nhwalo munahota gwango mwenga mikomana ngondo ya Bhambo Chapanga. Kipinde choha cha ughome gwino lyangankole jhe libhoho lyolyoha. 29 Anda bhapitii bhando bhapakumpukila nu kupala kunkoma, Bhambo Chapanga, Chapanga gwino, nankombola. Nambo ughome gwa akamakoko bhino nautaghilwa okwe ngita mundo chatagha lighanga kwa ngumbelo. 30 Bhambo Chapanga papakuntendela ghambone ngita channaghile nu kunhaghula kubhehe munahota nkolongwa jwa ku Ichilahele, 31 mwe namma jhe ngolongonde hilu kuhadabulwa mwojho, kukujhita myahe jhangamalemwa kwa kukilepechela. Nambo, Bhambo Chapanga papakulenganikiya mambu gheniya ninnyopa manahaota bhango, ungomboke ne nantumiche gwino."

32 Daude ngannobholila Abiagaele, "Alumbalilwe Bhambo Chapanga, Chapanga jwa ku Ichilahele, jwantumite kukongana na nenga deleno. 33 Chapanga ampe mota kwa malango ghino ghambone kwa kunhibhilikiya ngoto kukoma nu kulepechela ne namwete. 34 Chakaka Bhambo Chapanga, Chapanga jwa ku Ichilahele anhibhilikiye nkoto kummengwa, anda nukuhika jhe kajhombe kukongana na nenga, chakaka abhii jhe ata munalome jhumo jwa ku Nabale angahighii ghome ade kilabho lukela." 35 Bhahe, Daude ngapokela ilebhe yoha yaletite Abigaeli, ngananobholila, "Nnyenda ku uteeke kajhino. Dola, nighajhokanikiye ghoha ghulongile na majhopo ghino nighapokii."

36 Peniya, Abigaeli ngakelebhuka kwa Nabale, ngakolila unyagho nkolongwa ngita ghu unahota nkolongwa pakajhake. Nabale ngahanganii hake mwojho, nhwalo akalobhii hake lichiko lyenio. Bhahe, Abigaeli akannobholii jhe kilebhe ade lukela. 37 Abigaeli pajhimwika lukela pamweina ughembe uhengwite umuto, ngannobholila ungana mundo ghoha ghighapitii, na papapena mwojho gwa Nabale ngaulekita kundundandunda, ngabhila ngita lighanga. 38 Pighapetita machiko kome, Bhambo Chapanga ngatoila ughome gwa Nabale.

39 Daude pajhoina Nabale ajhomwike, ngalongila, "Alumbalilwe Bhambo Chapanga, jwanepechile kwa Nabale kukunigha, na Bhambo Chapanga amambiye nenga natumiche gwake kutenda malemwa. Bhambo Chapanga, anhadabwii Nabale ku uhakaho gwake." Peniya, Daude ngatumita bhando kupala antolele Abigaeli.

40 Akatumiche bha Daude ngabhajhenda ade ku Kalimeli kwa Abigaeli, nu kunnobholela, "Daude atulaghile tuhike kunnobholela kubhehe apakuntolela."

41 Abigaeli ngajhemita nukutama makilikite nnonge jhabhe, ngalongila, "Nenga na ntumiche tugha, nyekatile kuntumikila na kugholola magholo gha akatumiche bha munahota gwango. 42 Abigaeli ngatenda kajhombe, ngajhinwika nu kuhobhekela pi liponda lyake, ngalongohina na akatumiche bhake akakeghe nhwano, ngajhenda na akatumiche bha Daude na jwenie ngabhila nhwana gwa Daude.

43 "Kabhele Daude ngantolila Ainoamo kuhumii ku Yezileele. Yene, bhoha bhabhele ngabhabhila akahanamundo. 44 Kipinde chenio, Sauli akantolanikiche kamwale jwake Mikale, jwakibha nhwana gwa Daude, kwa Paliti mwana jwa Laishi, kuhumii ku muche gwa Galemo.