1 Pakibha na mundo jhumo jwatamita ku Lama, kukilambo cha itombe yuku Efulaimo, jwakemitwa Elikana jwa likabila lya Efulaimo. Elikana jwapapitwe na Yelohamo na Yelohamo, jwapapitwe na Eliho na Eliho jwapapitwe na Tohu na Tohu jwapapitwe Sufu. 2 Jwenio Elikana akibha na matala, jhumo akemitwa Hana na jhonge akemitwa Penina. Penina akapapite yana, nambo Hana akapapite jhe yana. 3 Kila chaka Elikana ngakwelita kujhenda kunnyinamii Bhambo Chapanga jhuna Makakala ghoha nu kumpiikiya litambiko kwenio ku shilo. Kipinde chenio, yana ibhele inalome ya Ele, Holifine na Finehase, ndi bhakibha akapiya matambiko bha Bhambo Chapanga. 4 Kila kipinde Elikana papiita litambiko, ngampila Penina nhwanamundo lipungo limo lya nyama pamonga na yana mundo yoha ikeghe na inalome. 5 Nambo Elikana nganchochikiya Hana lipungo limo likolongwa nhwalo akampahi hake, pamonga nu kubhehe Bhambo Chapanga akampii jhe mota ya yana. 6 Ku nhwalo Bhambo Chapanga akantehi ntonga Hana, Penina mwikeghe nnyake akibha namilomo, kupala anchimwicha. 7 Mihalo jhenio ngaijhendilila kila chaka. Kila kipinde Hana pajhendita ku Nyumba jha Bhambo Chapanga, Penina ngantendila chanake Hana ade ngalelita nu kukana kulye chochoha. 8 Elikana Unganamundo, ngankonyita, "Nike chimilela? Nike chimikana kulyegha? Nike mmii ngolongonde kumwojho gwino? Bho, ne jwamaha jhe kwino kuliku yana kome inalome?"

9 Lichiko limo, pubhajhomolila kulye nu kunywelekeya pa Nyumba jha Bhambo Chapanga, kwenio ku Shilo, Hana ngajhemita. Kipinde chenio, mpiya litambiko Ele akibha atamite mu kigoda chake pahina na lifelemo lya nnyango gwa Nyumba jha Bhambo Chapanga. 10 Hana kwa lipyanda hake, ngalelita nu kunnyopa Bhambo Chapanga.

11 Hana ngabhekita nachile kukulonge, "Mwe ma Bhambo Chapanga jhuna Makakala ghoha, ngaulingulila ling'ahe lya ntumiche gwino nukunkomboka, changa kunyehwa nantumiche gwino, nukumbe mwana munalome, chanimpela mwenga mwana jwenio, abhehe jwino kwa machiko ghoha gha ughome gwake, hilu majhunjo ghake naghachekulwa jhe." 12 Hana ngajhendilila kunnyopa Bhambo Chapanga na mpiya litambiko Ele ngalolekiya nnomo gwake. 13 Hana akibha anyopita Bhambo Chapanga kinunokinuno nnomo gwake ubhonikina ukinakina, nambo lilobhe lyake lyakajhokonikike jhe. Yene Ele ngahambwika Hana ate kulobhela. 14 Ndi Ele ngankonyita "Bho, nanyendelela kulobhela ade digha? Nneke kunywe divaye."

15 Nambo, Hana ngannyangwila, "Nahi jhe manahota bhango! Ne namukeghe jhuna lipyanda hake, nenywi jhe divaye hilu kulobhela, nambo ne mbihita ghighabhii umwojho gwango nnonge jha Bhambo Chapanga. 16 Manganhwachii jhe nenga kubhehe ndi mwikeghe jwanganandela. Kwa kipinde choha chenio nighalonge malola ghango na mang'ahe ghango."

17 Peniya, Ele ngalongila, "Nnyenda ku uteeke, na Bhambo Chapanga jwa Ichilahele ampe chela chunnyopite."

18 Hana ngalongila, "Na nenga ntumiche gwino nijhopa ungoto kunhwachii ghanganandela nnonge jhino." Bhahe, ngabhokita nukujhenda kulye na akibha jhe nu ungolongonde kabhele.

19 Lichiko lilikengima, ngabhajhimwika putepute, Elikana na akalongo mundo ngabhanyinamila Bhambo Chapanga, nukukelebhuka kajhabhe kwenio ku Lama. Elikana ngagholwika na nhwana mundo Hana, na Bhambo Chapanga ngankombwika. 20 Yene, Hana ngagheghita ndumbo, nukupapa mwana munalome. Hana ngantinita liina mwana jwenio Chamwele, ngalongila kubhehe, "Nhwalo nikanyopite kuhumii kwa Bhambo Chapanga."

21 Elikana na nyumba jhoha ngabhahowika kabhele kujhenda ku shilo, nu kumpiikiya Bhambo Chapanga litambiko jha chaka nu kutimicha nachile jhake. 22 Nambo mwanja gwenio Hana akajhahwii jhe. Nhwalo akannobholii ungana mundo kubhehe, "Nijhenda jhe nenga hilu mwana gwango ade papakulekechwa kujhonga, peniya, ndi pambakumpeleka nnonge jha Bhambo Chapanga, na jwenie natama kwenio machiko ghoha ghangapeta."

23 Elikana ungana mundo ngannyangwila, "Ntenda chumibhona chamaha. Nnendela ade pumpa kunnekecha kujhonga. Bhambo Chapanga antangatile kutimicha nachile jhino." Bhahe, Hana ngahighilika ukajha kunnela mwanamundo ade pannekicha kujhonga.

24 Pannekicha tu kujhonga, ngalongohina nako nukumpeleka mu Nyumba jha Bhambo Chapanga, kwenio ku Shilo, kongo akibha na litohe lya ng'ombi lya nkambako lya yaka itato na kilo ticha ya ukobha na lihako lya limbendela lya divaye. 25 Pubhajhomolila kunchinja ng'ombi jwenio, ngabhampelika mwana Chamwele kwa mpiya litambiko Ele. 26 Hana ngannobholila Ele, "Chakaka ngita chimitama mwe manahota gwango, ne ndi jhola mwikeghe jwakajhemite nnonge jhino, akinyopita Bhambo Chapanga. 27 Nakannyopite ambele mwana jhonjo, na Bhambo nganyangwila chela chininyopite. 28 Ku nhwalo gwenio, nimpela Bhambo Chapanga mwana jhonjo, kipinde choha chapakubhehe ghome, abhekitwe kwa lihengo lya Bhambo Chapanga."

Peniya, ngabhanyinamila Bhambo Chapanga kwenio ku Shilo.