1 Chamwele pakibha aghogholwike, ngaitenda yana yake inalome kubhehe akakenga bhuku Ichilahele. 2 Mwana jwa litibho jwa Chamwele akemitwa Yoele, na jhonge akemitwa Abiya. Bhoha bhabhele bhakibha akakenga bhuku muche gwa ku Beya Sheba. 3 Nambo yana yenio bhatehila jhe ngita chatehila tate gwabhe, nambo ngabhakipalikiya kubhehe niilebhe mbwe. Ngabhapokila chwinda nu kwajhima bhange ghighapalwa kutendelwa.

4 Peniya, ilongoche yoha yuku Ichilahele ngabhakonganika, nukunnyendela Chamwele, kwenio ku Lama,

5 ngabhannobholila, "Mwe ngohe ng'ogholwike na yana ino bhalekite luhomo lwino. Yene mutuhaghulile munahota nkolongwa jwakutulongocha ngita chiibhi ilambo henge." 6 Nambo kilebhe chenio cha Akaichilahele kupala bhapelwe munahota nkolongwa jwa kwalongocha kikanhalaliche jhe Chamwele. Na jwenie nganyopita Bhambo Chapanga. 7 Bhambo Chapanga ngannobholila Chamwele, "Nnyokonikiya kila kilebhe chibha nnobholela bhando, nhwalo bhankanite mwe jhe, nambo bhanganite nenga kubhehe munahota nkolongwa gwabhe. 8 Kuhumii panabhoita ku kilambo chuku Michile, bhanekite nenga, bhajhendilii kuitumikii ichapanga henge ade ngohe. Ngohe itendwa ibhandendila nenga ndi ibhantende mwenga. 9 Bhahe, majhokonikiya, nambo, mapwatalila hake na malobholela hotuhotu kwa ghala ghapakwatendela munahota nkolongwa jhapakwalongocha."

10 Ndi Chamwele ngabhalobholila bhando bhala bhibhajhopita bhapelwe munahota nkolongwa malobhe ghoha ghalobholilwa na Bhambo Chapanga. 11 Chamwele ngabhalobholila, "Naha ndi munahota nkolongwa gwino jwapala kunnongocha chantendela, yana ino inalome nabhatenda ijhendecha mutuka yake ya ngondo, ihutwa na falache na bhange bhahobhokii falache na bhange bhabhutuka mbelo nnonge jha mutuka yake. 12 Na bhange nabhabheka kubhehe ilongoche ikolongwa ya akakomana ngondo bha kikunde cha bhando maelufo, na bhange kikunde cha bhando amchine na bhange kulema mighonda jhake nukuhuna mahuno ghake, na helahela bhange kutendekeya chilaha ya ngondo na bhange kutendekeya ilebhe kunhwalo gwa mutuka yake. 13 Achikabhale bhino nabhatengenecha mahuta ghukunungalila petelele kunhwalo gwake na bhange nabhabhaha bhukuteleka kunhwalo gwake na bhange bhukutengenecha mabumunda kunhwalo gwake. 14 Natola mighonda ino jhibholile, mighonda jha michabibo, na mighonda jhino ya micheitune nukwape akatumiche bhake. 15 Helahela natola chehemo jha lipungo lya kome lya mahuno ghino na gha chabibo ino nukwape ilongoche yake na akatumiche bhake bhibhahenga mahengo mu nyumba jhake jhikinahota nkolongwa. 16 Natola akatumiche bhino akanalome na akakeghe na ng'ombi ino ihatite na maponda ghino kwatenda bhatumike kwa kunhenge mahengo ghake. 17 Natola chehemo jha lipungo lya kome lya mambelele na mbuhe ino. Na mabhene namma akabhanda bhake. 18 Kipinde chenio, nankokoleka kunhwalo gwa munahota nkolongwa jhumikihaghulile mabhene. Nambo Bhambo Chapanga nannyokanikiya jhe."

19 Ata yene bhando ngabhakana kunnyokonikiya Chamwele, nabhalongila, "Naijhe! Twe tupala munahota nkolongwa jwa kutulongocha, 20 kupala natwenga tubhehe ngita ilambo henge. Munahota nkolongwa gwito kutulongocha nu helahela kutulongocha nu kutukomanila putujhenda ku ngondo hito." 21 Chamwele pajhomolila kujhokonikiya kila kilebhe chibhalongila, ngajhenda kunnobholela Bhambo Chapanga ghala ghoha ghibhalongila. 22 Bhambo Chapanga ngannobholila Chamwele, "Ajhokanikiya na bhapela munahota nkolongwa." Peniya, Chamwele ngabhalobholila Akaichilahele, kila jhumo akelebhuka kajhake.