1 Daude ngajhenda kwa mpiya litambiko Ahimeleki kwenio ku Nobo, Ahimeleki ngapita kumpokela kongo ipeta kulendema, ngankonyita, "Bho, ku nhwalo ghane nhwikite kanjika chino?"

2 Daude ngannyangwila Ahimeleke, "Mi pamba kwa malaghalikilo gha munahota nkolongwa. Anobholila ngoto kunnobholela mundo jhojhoha kilebhe chandumite. Naghine na bhando bhango tukongane chehemo jhikiteno. 3 Bho, nkwete kilebhe chochoha? Ninnyopa mabumunda nhwano amu chochoha chikibhile."

4 Mpiya litambiko Ahimeleke ngannyangwila Daude, "Pamba ngwete jhe libumunda lyamulimanya. Mabumunda ghighapihwa ndi ghighabhii pamba. Mihoto kupekewa mabumunda gheniya anda tu bhando bhino bhagholwike jhe na akakeghe machiko ghanga ghapahina."

5 Daude ngannyangwila mpiya litambiko, ngannobholila, "Chakaka machiko ghandina ghano tugholwike jhe na akakeghe, ngita chibhile pinijhenda kulihengo lya kila lichiko lya ulonda. Anda bhando bhango bhijheketelwa nnonge jha Bhambo Chapanga mulihengo lya kila lichiko, bho, ichocha jhe mu lihengo lende likolonga lyandumitwe na munahota nkolongwa?"

6 Peniya, mpiya litambiko ngampila mabumunda ghala gha kumpiikiya Bhambo Chapanga, nhwalo pakibha jhe na mabumunda ghange, nambo jhela tugha jhukubheka nnonge jha Bhambo Chapanga. Kila lichiko lukela, mpiya litambo ajhangingina mabumunda gheniya nu kubheka mayono kuhumii pi kiinja.

7 Bhahe, lichiko lyenio pakibha na jhumo jwa akatumiche bha Sauli, akibha pena kupala kumpiikiya Bhambo Chapanga litambiko likukomelekeya. Ntumiche jwenio akemitwa, Doege Mwedome, nnyemelela jwa bhalucha inyama ya Sauli.

8 Bhahe, Daude ngannobholila mpiya litambiko Ahimeleke, "Bho, mihoto kumbela upanga amu nkowa? Nhwalo Nge'ghite jhe upanga hilu chilaha jhojhoha, nhwalo lihengo lya munahota nkolongwa lindei nyomboteke."

9 Ahimeleke ngannyangwila, "Ngwete upanga ghola gwa Mfilichite Goliate jhunkomita ku lulambo lwa Ela, ubhii unyuma jha kichubao cha mpiya litambiko ukongitwe mu kitambala. Anda mpakutola ntola, nhwalo pamba ubhiii jhe upanga ghonge, Daude ngannobholila,

"Ubhii jhe upanga ghonge gwambone ngita gwenio, umbekeye."

10 Lichiko lyenio, Daude ngantilita Sauli, ngajhenda kwa munahota nkolongwa Akishi jhu ku Gati. 11 Akatumiche bha munahota nkolongwa Akishi ngabhannobholila, "Jhonjo Daude jhe munahota nkolongwa jwa kilambo chake? Jhonjo chi jhubhannyembita mung'oma yabhe nukulonge,

"Sauli akomite maelufo ghake, na Daude akomite makome elufo ghake?"

12 Daude akahotwii jhe kughajhehwa malobhe gheniya ghibhalongila akatumiche bha Akishi, ngannyogwipa hake Akishi, munahota nkolongwa jhu ku Gati. 13 Bhahe, Daude ngakitenda nng'oloka nnonge jhabhe kila pabhehe nabho, ngakinyaghila mu mbau ya litangala, nu mata ghake ghanyolwila chwii mundeho yake. 14 Akishi ngabhalobholila akatumiche bhake, "Mimanya kubhehe mundo jhonjo jhuna ngholoka, kwanike minneta kwanenga? 15 Pamba bhabhii bhina ngholoka bhamahele, kwanike munnetite mundo jhonjo pakajhango?"