1 Daude ngabhokita ku Gati nu kutilii mu linkwembe, pahina na muche gwa Adulamo. Akahacha mundo na akalongomundo bhange pubhajhoina mihalo jhenio, ngabhankengima nukulombana nako. 2 Bhando bhoha bhibhabhii nilipyanda na ulongoche gwa Sauli na bhibhabhonelwa, ngabhalombina na Daude. Na bhoha bhibhalombina nako bhakibha bhando miya ncheche na jwenio ndi jwakibha kilongoche gwabhe.

3 Kubhoke kwenio, Daude ngajhenda ade ku Misipa kukilambo chuku Moabo. Ngannobholila munahota nkolongwa jwa ku Moabo, "Chonde ninnyopa tate na majhe gwango bhatame pamba ade pambakumanya chapakundendela Bhambo Chapanga." 4 Yene, Daude ngabhaleka atate na amajhe mundo, bhatame kwa munahota nkolongwa jwaku Moabo, bheniya ngabhatama kwajhake pamonga na jwenie, kipinde choha Daude chakibha ajhobhite mu linkwembe.

5 Peniya, nnondole jwa Chapanga Gade ngannobholila Daude, "Nkoto kutama mu linkwembe mone, mmoka na nnyenda ku kilambo chuku Yuda." Yene Daude ngabhokita nu kujhenda kutama mu litogholo lya Helete.

6 Lichiko limo, Sauli akibha atamite pahe jha nkongo nkwajho ghukibha pikitombe kwenio ku Gebeya, kongo akamwii nkowa mulubhoko lwake na akatumiche bhake bhantindikii puupele jhake. Ngabhalobholilwa kubhehe Daude na bhando bhake bhamanyikine pabhile, 7 yene Sauli ngabhalobholila akatumiche bhake, "Nnyokanikiya Akabenjamine! Bho, Daude mwana jwa Yese nampela mangota mwenga mighonda na mighonda jha michabibo? Bho, nantenda mangota kubhehe ilongoche ya akakomana ngondo bha maelufo na ilongoche ya akakomana ngondo mamiya? 8 Bho, ndi nhwalo mangota mpangita nginyika jhukung'alambuka? Abhii jhe mundo ata jhumo panakate jhino jwahikite kunnobholela ghanga, kubhehe mwanango jwene ateii lilaghano na mwana jwa Yese. Helehela abhii jhe mundo jhojhoha jwangokolekeya, hilu jwannobholela kubhehe Daude kupala kungoma ngita chibhii deleno."

9 Ndi Doege mundo jhuku Edomu jwajhemita pahina na akatumiche bha Sauli, ngalongila, "Nakamwene mwana jwa Yese akijhenda ku Nobo, kwa mpiya litambiko Ahimeleke, mwana jwa Ahitobo. 10 Ahimeleke ngannyopela Daude kwa Bhambo Chapanga, na ngampila chukulya nu upanga ghola gwa Mfilichite Goliate."

11 Peniya, munahota nkolongwa Sauli, ngatuma bhando bhajhenda kunkema mpiya litambiko Ahimeleke, mwana jwa Ahitobo, pamonga na akalongo bha tate mundo bhibhakibha akapiya matambiko, kwenio ku Nobo. Bhoha ngabhannyendila munahota nkolongwa. 12 Sauli ngalongila, "Ngohe jhokonikiya mwe ma mwana jwa Ahitobu."

"Na jwenie ngajhangwila, Ena," munahota nkolongwa gwango. 13 Sauli ngankonyita "Kwanike mwenga na mwana jwa Yese, mmekingine nginyika kupala ungome? Kwa nike mukampekii mabumunda nu upanga na peniya ngamnyopela kwa Chapanga? Kukutenda yene, deleno ang'alambwike na atenda kunnyobhela nukupala kungoma."

14 Ahimeleke ngannyanguu munahota nkolongwa, "Ghane panakate jha akatumiche bhino jwahobholeka kuliku Daude? Jwenie ndi nkohano gwino na nkolo jwa akakomana ngondo bhino bhibhannonda na jwatopela hake kuliku bhoha mu nyumba jhino. 15 Bho, lichiko lyenio ndi likibha lichiko lintumbwila kunnyopa Bhambo Chapanga ku nhwalo gwake? Nai jhe! Munahota nkolongwa, nkoto kutuhwachii ghanganandela nenga hilu akalongo bha tate gwango. Nhwalo nenga ntumiche gwino manyii jhe chochoha kibhaha kikolongwa amu kichokombe."

16 Nambo munahota nkolongwa Sauli ngannobholila, "Ahimeleke chakaka nankomwa mwenga pamonga na akalongo bha tate gwino." 17 Ndi Sauli ngabhalobholila akalonda bhubhakibha pahina nabho, "Nng'alambuke makome akapiya matambiko bha Bhambo Chapanga, nhwalo bheniya bhabhii ndela jhimo na Daude, na bhakamanyite kubhehe andilite, nambo ngabhatamita nuu."

Nambo akalonda bheniya ngabhakanita kwakoma, akapiya matambiko bha Bhambo Chapanga. 18 Bhahe, Sauli ngannobholila Doege, "Mwe ghalambuka makome akapiya matambiko." Yene, Doege ngaghalambwika nu kwakoma. Lichiko lyenio, ngabhakomita akapiya matambiko makome nane nu nhwano bhibhawala ichubao ya kitambala kinhuo chu upiya litambiko. 19 Peniya, Sauli ngabhakoma ku upanga akolo muche bhoha bhuku Nobo, ndi muche gwa akapiya matambiko, ngabhakomita akanalome na akakeghe na yana na yana ijhonga na ng'ombi na maponda na mambelele.

20 Nambo Abiazale mwana munalome jwa mpiya litambiko Ahimeleke, Ahimeleke mwana jwa Ahitubo, nganyogholwika nu kukilombanicha na Daude. 21 Abiazale ngannobholila Daude kubhehe Sauli abhakomite akapiya matambiko bha Bhambo Chapanga. 22 Daude ngannobholela, "Lichiko lela panimmonita tu Doege Mwidomu, nakamanyite njwe, nannobholela Sauli. Nenga ndi kihokola cha tate na amajhe gwino na akalongo gwino bhakomwe. 23 Nhwalo mundo jwapala kungoma nenga ndi jwapakunkoma mwenga. Anda mwe nantama na nenga namma njelembo."