1 Bhahe, Daude ngakilongelila umwojho gwake, "Lichiko limo, Sauli nangoma. Nhwalo gwambone kwango ndilile kukilambo cha Akafilichite. Sauli nakotoka kungengamila mu mipaka jha kilambo chuku Ichilahele, nane nama njelembo." 2 Ku yene, Daude na bhando bhake miya chita ngabhajhahwila kwa Akishi mwana jwa Moake, munahota nkolongwa jwaku Gati. 3 Daude pamonga na akalongo mundo na bhando bhake ngabhatama na Akishi, kwenio ku Gati. Daude akibha na akahanamundo bhabhele. Ainoamo kubhoka ku Yezileeli na Abigaeli jwakibha lipwela lya Nabale, kubhoke ku muche gwa Kalimeli. 4 Sauli pajhoina kubhehe Daude atilii ku Gati, akankengimi jhe kabhele.

5 Lichiko limo, Daude ngannobholila Akishi, "Anda chakaka nyeketilwe na mwenga, ninnyopa umbe chehemo jha muche ghumo pikilambo chino, kupala ibha chehemo jhango jhukutama. Nhwalo nitope jhe kutama pamo namwe pa muche ghongo ghu unahota nkolongwa." 6 Lichiko lyenio, Akishi ngampila Daude muche gwa Sikilage. Kubhoke lichiko lyenio, muche gwenio ngaubhila ghu munahota nkolongwa jhuku Yuda ade ngohe. 7 Daude ngatamita kukilambo cha Akafilichite kwa kipinde cha chaka chimo na myehe ncheche.

8 Kwa kipinde chenio, Daude na bhando bhake ngabhajhenda kwajhingilila Akagechule na Akagilize na Akaameleke. Bheniya bhakibha ndi akolo kilambo. Kuhumii makacho bhando bheniya bhakibha mu kilambo ghabhajhingilila kuhumii ku Chule ade ku Michile. 9 Kila kipinde, Daude pakibha akijhingilila kilambo ngabhakoma bhando bhoha nu ngapukila kwa makakala mambelele na ng'ombi na maponda na ngamiya na ngobho peniya ngakelehwika kwa Akishe. 10 Akishe kila pakibha ankonyita, "Bho, deleno, majhingilii kojhe?"

Daude ngannobholila, najhingilile bhando bha kilambo chu upande gwa kuchine mwa Yuda, kipinde chenge ulonge, upande gwa kuchine gwa kilambo chuku Yelemeele amu upande gwa kuchine gwa kilambo chuku Akaakene. 11 Daude annekita jhe mundo jhojhoha ghome munalome amu mwikeghe kupala aletwa ku Gati, ngahwachila kumwojho. Bhihoto kuchimulila panane jhito nu kulonge, Daude atei kitendwa chenje na chela. Yene ndi Daude chateila kipinde choha chakibha kukilambo cha Akafilichite. 12 Nambo, Akishe akibha jhe nikiholo na Daude, ngakilongolila kumwojho gwake, "Abhayomiche bhando bhake bhuku Ichilahele ku yene, nabhaha ntumiche gwango ughome gwake gwoha."