1 Sauli akibha na yaka makome matato pakibha munahota nkolongwa, ngalongwicha Ichilahele kwa yaka makome ncheche na mibhele. 2 Sauli ngabhahagwila akakomana ngondo Elufo itato bhuku Ichilahele. Pakate jha bheniya, akakomana ngondo Elufo ibhele akibha nabho kwenio ku Mikimashi, kukilambo cha itombe ya ku Beteli. Na akakomana ngondo Elufo jhimo bhakibha na Yonasani kwenio ku Gibeya jha Benjamine. Na akakomana ngondo bhange bhibhahighalike ngabhabhujhichwa kajhabhe.

3 Yonasani ngakijhingilila kighono cha Akafilichite kwenio ku Geba, na Akafilichite ngabhajhoina malobhe ghenio. Munahota nkolongwa Sauli ngajhembita lipenenga kukilambo choha chuku Ichilahele ngatangicha, kukulonge, "Akaebulaniya bhajhohe." 4 Bhahe, Akaichilahele bhoha ngabhajhoina kubhehe Sauli akihotwii kighono cha Akafilichite, na Akafilichite bhachimwa hake Akaichilahele, bhahe, akakomana ngondo bhoha bha Akaichilahele ngabhakemwa kulombana na Sauli, kwenio ku Giligali.

5 Akafilichite ngabhakonganika kupala kukomana na Akaichilahele, bhakibha na mutuka Elufo itato ihutwa na falache na akakomana ngondo bhibhahobhokii falache, bhakibha Elufo chita, na akakomana ngondo bhibhatyanga lwa pahe, bhakibha mbwe ngita ncheke ghuku mbwane, ngabhajhenda kubheka kighono chabhe, kwenio ku Mikimashi, upande ghulihumii lyobha mwa Bete avene. 6 Bhando bhuku Ichilahele pimanyita kubhehe bhabhi mumang'ahe, ngabhatumbwila kujhobha. Akakomana ngondo bhange ngabhajhobhita mu mikwembe na bhange mu mabhomba na bhange mu mandalabho na bhange mu mahandake na bhange muilibha yanga mache. 7 Na bhange ngabhajhombwika lukemba Yoludane ade ku kilambo chuku Gade na Gileade.

Sauli akibha kwenio ku Gileade na bhando bhoha ngabhankengima kongo bhakilendema kwa kiholo.

8 Sauli ngannendelila Chamwele kwenio kwa machiko chaba, ngita Chamwele chalongila. Nambo Chamwele akajhenda jhe kwenio ku Giligali na bhando ngabhatumbwila kupechengana. 9 Bhahe, Sauli ngabhalobholila bhando, "Nnetangana matambiko ghino ghu kukomelekelwa na ghu uteeke." Na jwenie ngabhoita litambiko lyu kukomelekelwa. 10 Sauli pajhomolila tu kupiya litambiko lyu kukomelekelwa, Chamwele ngapitila. Sauli ngajhenda kumpokela Chamwele nu kunnyambucha. 11 Chamwele ngankonyita, "Bho, ntei nike?"

Sauli ngajhangwila, pamweina akakomana ngondo bhango bhipechengana, na mwenga nhwikite jhe kwa lichiko linnongila helahela panolita Akafilichite bhakilenganikiya kwa ngondo kwenio ku Mikimashi 12 Bhahe, nganhwacha, Akafilichite nabhahika kunyingilila nenga ku Giligali, kabhele, nikabhoite jhe litambiko kupala ndangatilwe na Bhambo Chapanga. Yene, ndi ngaimbata namwete kupiya litambiko lyu kukomelekelwa.

13 Chamwele ngannyangwila, "Ntei umbebhebhe. Makajhokonikii jhe channaghalikiya Bhambo Chapanga, Chapanga gwino. Ngamunnyokonikiya Bhambo Chapanga ngantei mwenga na yana ino, unahota gwino utamikiya machiko ghoha ghangapeta kwa Akaichilahele. 14 Nambo ngohe unahota gwino nautamikiya jhe nhwalo nhwilo gwannaghalikiya Bhambo Chapanga mujhokanikiya jhe. Bhambo Chapanga, akihaghulii mundo jhonge jwapakunnyokanikiya kwa mwojho gwake gwoha, na jwenio ndi jwanhagwile kubhehe kilongoche jwa bhando bhake."

15 Chamwele ngabhokita ku Giligali ngahobhokila kwenio ku Gibeya, kukilambo cha likabila lya Benjamine. Peniya, Sauli ngabhalinga bhando bhalongoina nako bhoha bhakibha miya chita. 16 Sauli na mwanamundo Yonasani pamonga na akakomana ngondo bhibhalongohina nabho, ngabhatamita, kwenio ku Gibeya, kukilambo chuku Benjamine, na Akafilichite ngabhabheka kighono chabhe, kwenio ku Mikimashi. 17 Akafilichite ngabhabhokita kukighono chabhe nukujhenda kwajhingilii, kongo bhakibha mu malongo matato. Lilongo limo ngalijhenda kwenio ku Ofula, kukilambo cha Shuali, 18 na lenge ngalijhenda ku Bete holone, na lilongo lya utato ngalighalambukila ku lulambo lwa Seboimu, mwiye na mwiye na njenga.

19 Kipinde chenio pakibha jhe na mundo jwa kuyana yoma mu kilambo choha chuku Ichilahele, kunhwalo Akafilichite ngabhapata kwahibhilikiya Akaebulaniya bhakoto kukihyani mapanga amu mikowa. 20 Bhahe, kila Mwichilahele ngapalitwa kwajhendela Akafilichite kukeya maghela gha pilau yabhe na njindinga yabhe na mabhagho ghabhe na ikwakwa yabhe yukuhunila. 21 Bhakibha bhalepita ipande ibhele ya itato ya mbijha yabhe kunole maghela gha pilau na njindinga. Na malepo ghukukekeya libhagho amu kupata kuyana choma ikibha jhimo jha tato jha chekeli. 22 Ku yene lichiko lyenio lya ngondo akibha jhe nkomana ngondo jhojhoha jwakibha na Sauli na Yonasani jwakibha nu upanga amu nkowa nambo tu Sauli na Yonasani mwana mundo.

23 Akafilichite ngabhapelika lilongo lya akakomana kujhenda kulonda chehemo jhukujhombokela kwenio ku Mikimashi.