1 Chamwele ngannobholila Sauli, "Bhambo Chapanga, ndi jwandumita ninyitila mahuta kupala mma munahota nkolongwa jwa bhando bhake bhuku Ichilahele. Ngohe, nnyokanikiya malobhe kuhumii kwa Bhambo Chapanga." 2 Bhambo Chapanga jhuna makakala ghoha ilonge naha, "Nanahadabula Akameleke, ku nhwalo bhakabulite Akaichilahele pibhabhokita ku Michile. 3 Ngohe, nnyenda makajhingilile Akameleke nu kukomelekeya njwe pamonga na kila kilebhe chibhabhinacho. Mangakole jhe kiya, makoma akanalome na akakeghe na yana na ing'enya na ng'ombi na mambelele na kinyama chikikemwa ngamiya na maponda."

4 Peniya, Sauli ngabhakemita akakomana ngondo bhake, ngabhakaghwila, kwenio ku Telaimo. Akakomana ngondo kuhumii ku Ichilahele bhakibha lake ibhele bhibhatyanga kwa magholo na kuhumii ku Yuda bhakibha elufo kome. 5 Sauli na bhando bhake ngabhajhenda ku muche gwa Amaleke, ngabhajhobhela mu lulambo lwa lukemba. 6 Peniya, Sauli ngabhalobholila Akakene, "Mmokangana panakate jha Akamaleke anda jhe naninkoma pamonga nabho. Ku nhwalo mangota makatendii ghambone Akaichilahele pibhabhokita ku Michile." Bhahe, Akaakene ngabhabhokita nu kwaleka Akaamaleke.

7 Sauli ngabhajhingilila nu kwahotola Akaameleke kutumbuli ku Havila ade ku Shuli, upande ghulipitii lyobha gwa Michile. 8 Ngampukila munahota nkolongwa Agage jwa Akaameleke akibha ghome. Na ngabhakomelikiya bhando bhoha ku upanga. 9 Nambo Sauli na akakomana ngondo bhake ngabhannekita ghome munahota nkolongwa Agage na helahela bhakomite jhe mambelele ikendite na ng'ombi ikendite, na kila kilebhe chikibhii chambone bhakahangabhine jhe. Nambo ngakoma inyama na ilebhe yoha yangahalala na ihakanaho.

10 Bhambo Chapanga ngannobholila Chamwele, 11 "Nihengeleka mwojho kukuntenda Sauli kubhehe munahota nkolongwa. Sauli alekite kungengama nenga na akengime jhe mihilo jhango." Chamwele ngahyomita, ngannelila Bhambo Chapanga kilo ndaa. 12 Chamwele ngajhimwika lukela putepute kupala ajhabhule kukongana na Sauli, nambo ngalobholilwa, "Sauli ajhahwi ku Kalimeli na kwenio akitendekiye kinala chake kupala ichima na ngohe ajhawii ku Giligali. 13 Chamwele panhikilila Sauli, na Sauli ngannobhilila Chamwele,

"Bhambo Chapanga na ampe mota! Nenganikiye ghala ghoha ghanaghalikiya Bhambo Chapanga." 14 Chamwele ngankonyita Sauli,

"Anda yene ndi chakaka, bho, ilelo ya mambelele na ng'ombi ihumii kojhe?" 15 Sauli ngajhangwila, akakomana ngondo bhakomite jhe mambelele na ng'ombi yambone ibhatoila kuhumii kwa Akaamele, kupala kumpiikiya litambiko lyu kukomelekeya Bhambo Chapanga, Chapanga gwino, nambo yoha ihighalike tuikomilikii njwe.

16 Chamwele ngannobholila Sauli, "Denda ninnobholela chalongi Bhambo Chapanga uhiko gwa deleno." Sauli ngalongila, "Nobholela."

17 Chamwele ngannobholila, "Makacho makakibhonite kubhehe machokombe pamiho gha bhando, bho mwe chi kilongoche jwa makabila gha Akaichilahele? Na jwenio Bhambo Chapanga ngamiminila mahuta, kupala mma munahota nkolongwa jwa ku Ichilahele. 18 Peniya, ngantumita nnyenda makakomelekeye pulutu Akaameleke bhoha nhwalo bhina uhakaho, mukabulane nabho ade kwakomelekeya njwenjwe. 19 Kwanike mukannyokanikii jhe Bhambo Chapanga? Kunhwalo ghane mukabhutuki kuipukila kwa makakala ilebhe yambone nu kutenda uhakaho nnonge jha Bhambo Chapanga?"

20 Sauli nganyangwila Chamwele, "Nakanyokanikii Bhambo Chapanga. Nanyahwii kola kwandumita, nganakomilikiya njwenjwe Akamaleke bhoha nu kumpukii nukunneta Agage, munahota nkolongwa gwabhe. 21 Nambo akakomana ngondo bhakakomitii jhe, ng'ombi na mambelele ibhapukila kwa makakala kwenio ku Giligali, nambo bhaletite pamba kupala bhakupiikiye litambiko lya kukomelekeya Bhambo Chapanga, Chapanga gwabhe." 22 Ndi Chamwele ngajhangwila, "Bho, Bhambo Chapanga apala hake niki? Bho, matambiko ghu kukomelekelwa na matambiko ghange kuliku kunnyokanikiya jwenie? Kwa jwenie kunnyokonikiya ndi kwamaha hake kuliku matambiko, na kutenda chaipala ni kwamaha kuliku kumpiikiya litambiko lya mahuta gha limbelele linkambako. 23 Ku nhwalo kunkana Bhambo Chapanga ndi ngita uhakaho gwa uhabhe, na lighoho ndi ngita uhakaho ghu kujhinamila inyagho. Ku nhwalo mikanite mihilo jha Bhambo Chapanga, na jwenie ankanite kubhehe munahota nkolongwa." 24 Ndi Sauli ngannobholila Chamwele, "Ndei uhakaho. Ndwekwii mihilo jha Bhambo Chapanga na malaghalikilo ghino. Nakajhogwipe bhando nu kwajhokanikiya bheniya. 25 Nambo ngohe ninnyopa, unekekeye uhakaho gwango. Na mwenga nkelebhuka pamonga na nenga, kupala ninnyinamila Bhambo Chapanga."

26 Nambo Chamwele ngannyangwila, "Nikelebhuka ng'o na mwenga. Nhwalo mwenga mikanite mihilo jha Bhambo Chapanga, na jwenie ankanite kubhehe munahota nkolongwa bhuku Ichilahele."

27 Chamwele paghalambwika kupala abhoke, Sauli ngakamwila lubiniko lwa ngobho jhake, na lyenio ngalijhwepwika. 28 Peniya, Chamwele ngannobholila Sauli, "Kutumbuli ngohe Bhambo Chapanga aujhwepwi unahota nkolongwa gwa Akaichilahele kuhumii kwino, nu kumpela mundo jhonge jwabhii pahina jhino, jwabhii jwambone kuliku mwenga. 29 Chapanga jwabhii na ung'alicho jwa ku Ichilahele akolowa jhe, hilu kughalambula mawacho ghake. Nhwalo jwenio namundo jhe ata aghalambule mawacho ghake."

30 Sauli ngajhanguu, "Ndei uhakaho." Nambo chonde mangambe jhe hone nnonge jha ighogholo na bhando bhango, na nnonge jha Akaichilahele. Unekekeye ngelebhuke pamonga na mwenga, kupala nikanyinamile Bhambo Chapanga, Chapanga gwino. 31 Bhahe, Chamwele ngakelehwika pamonga na Sauli, na jwenie Sauli ngannyinamila Bhambo Chapanga.

32 Peniya, Chamwele ngalongila, "Munetele Agage munahota nkolongwa jwa Akaameleke."

Agage nganyendila Chamwele kukuhangana, kukuhwacha, "Lipyanda li kuwe lipetite!" 33 Chamwele ngalongila, "Anda upanga gwino chubhateila akakeghe bhahwelelwe na yana yabhe na ndi majhe gwino chapala kubhehe changamwana panakate jha akakeghe." Bhahe, Chamwele nganhekita Agage ipande nnonge jha chehemo jhukupiikiya litambiko lya Bhambo Chapanga, kwenio ku Giligali.

34 Peniya, Chamwele ngajhenda ku Lama na munahota nkolongwa Sauli ngajhenda kajhake, kwenio ku Gebeya. 35 Kuhumii lichiko lyenio ade Chamwele pajhomwika akajhenda jhe kunninga munahota nkolongwa Sauli pamonga nu kubhe ngolongonde kunhwalo gwa Sauli. Ata yene Bhambo Chapanga ngabhila ngolongonde kunike kuntenda Sauli kubhehe munahota nkolongwa jhuku Ichilahele.