1 Machiko ghamahele nnonge, Akafilichite ngabhakonganicha akakomana ngondo bhabhe, kupala kujhenda kukomana ngondo na Akaichilahele. Akishi ngannobholila Daude, "Mipalwa umanya kubhehe mwenga na bhando bhino mma upande gwa nenga kubulana ngondo."

2 Daude ngannyanguu Akishi, "Ena!" Nnola kilebhe chapakutenda ntumiche gwino. Akishi ngannobholila, "Nane nanintenda kubhehe nnonda gwango kanjika machiko ghoha ghangapeta."

3 Kipinde chenio, Chamwele akibha ahwile njwe, na Akaichilahele bhoha ngabhannelila nu kunchika ku muche gwake, kwenio ku Lama. Sauli ngabhabhenga akalondola na akahabhe kukilambo chuku Ichilahele.

4 Akafilichite ngabhakonganika nu kubheka kighono chabhe, kwenio ku Shunemu, na Sauli ngabhakonganicha akakomana ngondo bhoha Akaichilahele nu kubheka kighono chabhe kukitombe chuku Gilibowa. 5 Sauli pahweina tu nchambe gwa akakomana ngondo bha Akafilichite ngatumbwila kulendema kwa kiholo chakibha nacho umwojho gwake. 6 Peniya, ndi Sauli ngankonyita Bhambo Chapanga, nambo Chapanga akannyangwii jhe ku kulota hilu kwa maghanga ghukukonyakeya gha ulimu na sumimu kwa akalondole bha Chapanga. 7 Peniya, Sauli ngabhalobholila akatumiche bhake, "Umbalakiye mwikeghe jhuna nchuka gwa kulondola, kupala ninyendele nakankonyekehe." Akatumiche bhake ngabhannobholila, "Abhii mwikeghe jhumo kwenio ku Endole, jhuna nchuka gwa kulondola." 8 Bhahe, Sauli ngakighalambula kukuwala ngobho henge kupala bhando bhakoto kummanya, kilo pikijhingila ngabhajhenda pamonga na bhando bhabhele kwenio kwa mwikeghe, ngannobholila, "Unnetela jhola jhumba kunnobholela liina lyake."

9 Mwikeghe jhola ngannobholila, "Mwe umanye chakiteile munahota nkolongwa Sauli, abhakomilikiye njwenjwe akalondole na akahabhe bhoha, pa kilambo chuku Ichilahele. Ngohe, kunhwalo ghane umeke ntambo ghu kunyonja nu kungoma?"

10 Sauli ngalapila ku liina lya Bhambo Chapanga, kukulonge, "Nilapii kwa Bhambo Chapanga jwabhii ghome, nachwapulwa jhe jhipakunkolela, kuhwalo jha kilebhe chenje."

11 Mwikeghe jhola ngankonyita, "Bho, ninnetela ghane kubhoka kwenio?"

Sauli ngajhangwila, "Nnetela Chamwele." 12 Mwikeghe jhola pamweina Chamwele ngalelita kanonowa, ngannobholila Sauli, "Kwanike ungolwiye? Mwenga ndi Sauli!"

13 Munahota nkolongwa Sauli ngannobholila, "Mangajhoghopa jhe!" "Bho, mibhona nike?"

Mwikeghe jhola ngajhanguu, "Nikibhona kichapanga kipitii paundope." 14 Sauli ngankonyita, "Bho, ilandana na kilebhe ghane?"

Mwikeghe jhola ngajhangwila, "Munalome jwaghogholwike jwahobhoka kunane kone akipukite lijoho." Peniya, Sauli ngamanyita kubhehe jwenio ndi Chamwele. Sauli ngalitita ade pahe tipi kukunyenyekeya. 15 Chamwele ngankonyita Sauli kunhwalo ghane mindotowa kukunneta panane?

Sauli ngannyanguu, "Ne ning'ahika hake! Akafilichite bhibulana ngondo pakate jhango, na Bhambo Chapanga anekite, annyanguu jhe kabhele kupete kwa akalondole bhake amu kwa maloto. Ndi nhwalo ninkemite mwenga, unobholele kilebhe ghane ndende." 16 Chamwele ngankonyita kunhwalo ghane minyopa ninnobholele chukuhenga, kongo Bhambo Chapanga anekite na abhii likoko lino? 17 Bhambo Chapanga antendii chela channobholile kupete nenga. Bhambo Chapanga atoi unahota nkolongwa kuhumii kwino, nu kumpe Daude, Mwichilahele nnyino. 18 Ku nhwalo, mwenga makajhokanikii jhe Bhambo Chapanga hilu makatehii jhe chela chapalita matendele Akameleke. Ndi nhwalo Bhambo Chapanga antendii ghanga deleno. 19 Kuchocha kwa gheniya, Bhambo Chapanga nantenda mwenga pamonga akakomana ngondo bha Akaichilahele nkamulwe na Akafilichite. Kilabho, mwe pamonga na yana ino namma pamonga na nenga, na Bhambo Chapanga natenda akakomana ngondo bha Akaichilahele bhakamulwe na Akafilichite.

20 Pwitu, Sauli ngagwila mangukama kunhwalo jha kiholo na malobhe gha Chamwele. Helahela akibha jhe na makakala kunhwalo akalii jhe kilebhe chochoha kwa lichiko limo, kilo na muhe. 21 Mwikeghe jwenio ndi pannyendila Sauli pamweina akamwilwe na kiholo hake, ngannobholila, "Ne nantumiche gwino ngawile deleno, kukutenda chela chunnobholila nintendele." 22 Ngohe, unyokanikiye ne nantumiche gwino, nanenganikiya chakulya nkomalila, kupala nkola makakala gha kujhendele na mwanja gwino.

23 Nambo Sauli ngakanita nukulonge, "Na niya jhe." Nambo akatumiche bhake pamonga na mwikeghe jhola, ngabhampembelikiya akomalile, na jwenie ngabhajhokanikiya. Yene, ngajhinwika nu kutama pakindanda. 24 Mwikeghe jwenio akibha na litohe limo lya ng'ombi pakajhake lilihatite, nganchinjita kajhombe, ngatoila ukobha gwa ngano ngahunyita, ngatendekiya chakulya. 25 Ngampila Sauli, ngabhapila hele akatumiche bhake, na bheniya ngabhalila. Peniya, ngabhabhokita nu kutumbuu mwanja kilo jhejhe.