1 Akafilichite ngabhakonganicha akakomana ngondo bhabhe bhoha, kwenio ku Afeka, na Akaichilahele ngabhabheka kighono chabhe pahina na chembwe chu lulambo lwaku Yezileele. 2 Akanahota akakolongwa nhwano bha Akafilichite pibhakibha kukupeta na ibhogha yabhe ya akakomana ngondo mamiya na maelufo, Daude na bhando bhake pamonga na Akishi bhakibha unyuma bhaukengamila nchambe gwa akakomana ngondo bheniya. 3 Akakomana ngondo bhangajhoghopa bha Akafilichite ngabhakonya, "Akaebulaniya abha bhihenga nike pamba?"

Akishi ngabhajhangwila akakomana ngondo bheniya, "Jhonjo ndi Daude, ntumiche jwa Sauli munahota nkolongwa jwaku Ichilahele, jwenie atamite na nenga kupeta chaka. Kubhoke lichiko lyatilila kwango ninkamwii jhe na lilemwa lyolyoha." 4 Nambo akakomana ngondo bheniya bhangajhoghopa ngabhanchimwita hake Akishi, ngabhannobholila, "Nkelebhuha ajhende akatame chehemo jhumpile atame. Angajhenda jhe pamonga na twenga ku ngondo, anda jhe naghalambuka nukubhehe likoko lito, kipinde cha ngondo nukwakoma akakomana bhito. Bho, mibhona jhe mundo jhonjo napata ndela jhu kujheketelana na munahota gwake kabhele? 5 Nkomboka, jhonjo ndi Daude jhola jwajhembilwa mihambo na akakeghe kubhehe, Sauli akomite elufo jhake, nambo Daude akomite makome elufo ghake."

6 Akishi ngankemita Daude nu kunnobholela, "Nilapii kwa Bhambo Chapanga jwabhii ghome kubhehe mwe ndi jhuna kuhobholeka kwango. Nakahwene mbone tulongohane pamonga nanenga ku ngondo nhwalo libhii jhe lilemwa lyolyoha kubhoke lichiko lela lyuhikite kwa nenga ade deleno. Nambo ilongoche ya akakomana bhampai jhe. 7 Ku yene, nkelebhuke ukajha ku uteeke. Na mangayomecha jhe akanahota akakolongwa bha Akafilichite."

8 Daude ngankonyita Akishi, "Ngohe ne ndei bho? Ngita chimilongela hilu lichiko limo minawai jhe kungolela na lilemwa kubhoke lichiko lela landumbwila kuntumikila ade deleno, kunhwalo ghane ngoto kujhenda kubulana na akamakoko bha munahota gwango munahota nkolongwa?"

9 Akishi ngannyanguu Daude, "Nimanye kubhehe ubhii mbone pa miho jhango, ngita ntumiche jwa kunane kwa Bhambo Chapanga" nambo ilongoche bha Akafilichite bhalongile, "Jhonjo impala jhe ajhenda pamonga na twe ku ngondo." 10 Ngohe, mwe pamonga na akatumiche bhino bhibhannekita munahota gwino Sauli, bhibhahikite pamonga na mwe, kilabho putepute, pu kuchegha nnyendangana ukajha.

11 Yene, lichiko lilikengime lukela, Daude pamonga na bhando bhake ngabhabhujhita ku kilambo cha Akafilichite. Nambo Akafilichite ngabhajhenda ku Yezeleele.