1 Bhahe, Daude ngalobholilwa, "Dola, Akafilichite bhaujhingilile muche gwa Keila nu kukwatula mahuno muikoko yukubheke mahuno." 2 Bhahe, Daude ngankonyita Bhambo Chapanga, "Bho, nnyende nakakomane na Akafilichite abha?"

Bhambo Chapanga ngannyanguu, "Jhenda makajhingilile Akafilichite nu kuughombo muche gwa Keila." 3 Nambo Daude ngalobholilwa na bhando bhake, "Dola, pa Yuda pano tutama ku kujhoghopa, naibha bho, anda tujhahwii kwajhingilila akakomana ngondo bha Akafilichite ku Keila?" 4 Daude ngankonyita kabhele Bhambo Chapanga, najwenio ngannyanguu, "Mmoke nnyenda ku Keila, nhwalo nanintangatila mahotole Akafilichite." 5 Bhahe, Daude na bhando bhake ngabhajhenda ku Keila, kwenio ngabhabulina na Akafilichite nu kupukila kwa makakala inyama yabhe hoku. Yene, Daude ngabhaghombwila akolo muche ghuku Keila.

6 Abiazale, mwana jwa Ahimeleke, patilila kwa Daude kwenio ku Keila, ajhahwii na kichubao chu upiya litambiko.

7 Sauli palobholilwa kubhehe Daude ajhahwii ku Keila, ngalongila, "Bhambo Chapanga andei ninkamule, ku nhwalo akidindile jwene kukujhingii mu muche ghutindikilwe na mapamanda na ghubhii na matangala ghighabhii na makomeo." 8 Bhahe, Sauli ngabhakemita akakomana ngondo bhake bhajhende ku Keila kupala bhakannyobhele Daude na bhando bhake.

9 Daude pajhoina mpangu gwa Sauli pakate jhake, ngannobholila Abiazale mwana jwa mpiya litambiko, "Kileta pamba kichubao chu upiya litambiko." 10 Peniya, Daude ngajhopita, "Ma Bhambo Chapanga, Chapanga jwa ku Ichilahele, chakaka ntumiche gwino, nyohine kubhehe Sauli apangite kuukomelekeya muche gwa Keila, kunhwalo ne mii pamba. 11 Bho, bhando bhuku Keila nabhambeleka kwa Sauli? Bho, chakaka Sauli nahika ngita channyohine? Mwe ma Bhambo Chapanga, Chapanga jwa ku Ichilahele, nijhopa unyangule ntumiche gwino."

Bhambo Chapanga ngannyangwila, "Sauli, nahika." 12 Daude ngankonyita kabhele, "Bho, bhando bhuku Keila nabhameka nabhambeleka kwa Sauli, nenga pamonga na bhando bhango?" Bhambo Chapanga ngalongila,

"Ena, nabhatendeya yenio." 13 Bhahe, Daude na bhando bhake ngita miya chita, ngabhabhoka ku Keila na ngabhajhenda chehemo jhimo ade jhenge. Peniya, Sauli palobholilwa Daude anyogholwike ku muche gwa Keila, akajhahwii jhe kwenio.

14 Bhahe, Daude atamita kukujhobha mu kilambo chi itombe yuku Zifo. Sauli ngampaliha kila lichiko, nambo Bhambo Chapanga ngamambiya Daude akoto kukamulwa na Sauli. 15 Daude ngang'amwiya kubhehe Sauli ahikite kupala angome. Bhahe, Daude ngatamita panjenga jhuku Zifo, kwenio ku Holeshi.

16 Yonasani mwana jwa Sauli ngankengima Daude kwenio ku Holeshi ngankwimicha mwojho kubhehe Chapanga innonda. 17 Yonasani ngannobholila, mangajhoghopa jhe Daude, tate gwango nampata jhe. Mwe namma munahota nkolongwa jwaku Ichilahele nane nama pahe jhino. Jwenie Sauli tate gwango alimanya hele. 18 Bhoha bhabhele ngabhabhekita lilaghano nnonge jha Bhambo Chapanga. Peniya, Yonasani ngajhenda ukajha nambo Daude ngahighilika pabomane ku Holeshi.

19 Bhahe, Akazifo ngabhannyendila Sauli kwenio ku Gebeya, nu kunnobholela, "Daude ajhobhite mu kilambo chito, mu maboma kwenio ku Holeshi, ku kitombe chuku Hakila, chikibhii upande gwa kuchine mwa Yeshimoni. 20 Ngohe, tijha makalenganikiye ghala ghighabhii umwojho gwino, natwenga natuntangatila munkamule."

21 Sauli ngalongila, "Bhambo Chapanga na ampe mota nhwalo mingole kiya. 22 Nnyendangane makalingulile kabhele, kupala kumanya chehemo jhakihiya na ghane jwamweine chehemo jhenio, nhwalo nobholilwe kubhehe akalamwike hake. 23 Nningukiya kila upandi kupala kumanya chehemo jha pakijhobhite, peniya, munetela malobhe ghilenganikii. Anda ammela abhii kwenio, bhahe nanyenda pamonga na mangota mwe, na nenga nanimpalaha pakate jha ngolo yoha ya bhando bhuku Yuda."

24 Bhahe, ngabhabhujhita ku Zifo kone bhannongolile Sauli, nambo Daude na bhando bhake bhakibha kunjenga jhuku Maone, mu lulambo lwa Alaba, kuchine mwa Yeshimoni. 25 Sauli na bhando bhake ngabhatumbwila kumpalaha Daude, nambo pajhohina malobhe gheniya Daude ngajhenda kujhobha mu lindalabho nu kutama munjenga jhuku Maone. Sauli pajhoina malobhe gheniya, ngajhenda kumpalaha koko. 26 Sauli na bhando bhake bhakibha upande ghumo gwa kitombe, na Daude pamonga na bhando bhake bhakibha upande ghonge gwa kitombe. Daude paghaghita kutila, ndi Sauli pabhandikila kunkamula. 27 Peniya, mundo jhumo ngannyendila Sauli nu kunnobholela, "Hika kajhombe, Akafilichite bhikijhingilila kilambo." 28 Yene, Sauli ngalekita kunkengamila Daude, ngajhenda kukomana na Akafilichite. Ndi nhwalo chehemo jhenio pikemwa, Sela Hamalekote, mana ghake, "Lindalabho lya kunyogholoka." 29 Najwenie Daude ngahohwika nu kujhenda kujhobha mu kilambo cha Engedi.