1 Bhambo Chapanga ngannobholila Chamwele, namungolongondila Sauli ade ligha? Na mwenga mimanya kubhehe nikanite kubhehe munahota nkolongwa jhuku Ichilahele. Ngohe mitweleya mahuta, mulinyelo, nnyenda ku muche gwa ku Betelehemo ku nyumba jha Yese nhwalo nikihaghulile munahota nkolongwa pakate jha yana yake.

2 Chamwele ngalongila, "Nanhotola bho kujhenda?" Nhwalo "Anda Sauli ajhoine mihalo jhenio ahoto kungoma!"

Bhambo Chapanga ngannobholila, "Tola matohe gha ng'ombi jwa nkolo, nnyenda nako na nnongela, Hikite kumpiikiya Bhambo Chapanga litambiko."

3 Mu litambiko lyenio munnalika Yese nanenga naninnobholela chukuhenga. Namumiminila mahuta kunhwalo gwango jhola jwanipakunangiya.

4 Chamwele ngatenda ngita chalaghilwe na Bhambo Chapanga, ngajhenda ku Betelehemo. Ilongoche ya muche gwenio, ngabhahikita kumpokela kongo bhalendima. Ngabhankonyita, "Bho, nhwikite ku uteeke?"

5 Chamwele ngabhajhangwila, "Hikite ku uteeke. Hikite kumpiikiya Bhambo Chapanga litambiko. Ngohe mukijhelebhula mabhene na nhwikangana ku litambiko pamonga na nenga." Peniya, ngabhammeka nnonge jha Bhambo Chapanga Yese na yana yake nu kwalalika palitambiko.

6 Pubhahikita, Chamwele ngamwonita Eliabu, kumwojho gwake ngalongila, "Chakaka, mpakwa mahuta jwa Bhambo Chapanga ndi jhonjo, jwabhii nnonge jha Bhambo Chapanga!" 7 Nambo Bhambo Chapanga ngannobholila Chamwele, mangannololekeya jhe kumiho jhake hilu kipemo cha utandamaho gwake, ku nhwalo nenga nikanite. Nenga nilingulikiya jhe ngita bhando chibhalingukiya, nhwalo bhando bhilingukiya kwa panja, nambo nenga nilingukiya kumwojho.

8 Peniya, Yese ngankemita Abinadabo nu kunneta nnonge jha Chamwele. Nambo Chamwele ngalongila, "Ata jhonjo ahaghulilwe jhe na Bhambo Chapanga." 9 Yese nganneta Shama. Chamwele ngalongela, "Ata jhonjo hele ahaghulilwe jhe na Bhambo Chapanga." 10 Yese ngabhaletita yana yake chaba nnonge jha Chamwele, nambo Chamwele ngannobholila, Bhambo Chapanga anhagwii jhe jhojhoha pakate jha bhamba. 11 Peniya, Chamwele ngankonyita, "Bho, bhamba ndi yana ino ya kanjika?"

Yese ngajhangwila, "Nai jhe, amela abhii nchokombe kupeta bhoha, na jwenie alucha mambelele."

Chamwele ngalongila, "Ntuma mundo akakemwe, tutama jhe pahe ade papakuhika." 12 Bhahe, Yese ngantumita mundo, jwenie ngabhujhichwa. Kangombo jwenio akibha nkele na miho ghighahutii na jwahutila kukunnolekeya.

Peniya, Bhambo Chapanga ngannobholila Chamwele, "Jhenda mumiminile mahuta, nhwalo jhonjo ndi jwaninhagwile." 13 Bhahe, Chamwele ngatoila linyelo lilibhii na mahuta gha micheitune nukumiminila Daude nnonge jha akalongo mundo, kutumbulii lichiko lyenio nu kujhendelela uhuke gwa Bhambo Chapanga ngunhikilila Daude kwa makakala nukutama ngate jhake. Peniya, Chamwele ngakelehwika ku Lama.

14 Bhahe, uhuke gwa Bhambo Chapanga ngunnekita Sauli na uhuke mmoho jwalekekilwe na Bhambo Chapanga ngung'ahicha. 15 Peniya, akatumiche bha Sauli ngabhannobholila, "Dola uhuke mmoho jwalekekilwe na Bhambo Chapanga ung'ahicha. 16 Bhahe, munahota gwito, alaghalikiya akatumiche bhino bhibhantumikila bhampalahe mundo jwahoto kuhona lilimba, najwenio uhuke mmoho kubhoke kwa Chapanga papakuhika, mundo jwenio nahona kinube na mwenga nauhangana."

17 Bhahe, Sauli ngabhalobholila akatumiche bhake, "Mpalaye mundo jwahoto kuhona maha lilimba muneta kwango." 18 Ntumiche jhumo panakate jha akatumiche bhange ngalongila, "Dola, nimwene mwana jhumo jwa Yese, jwaitama ku Betelehemo, jwabhii maha kuhona lilimba, kabhele ndi mundo jwanga jhoghopa na jwaimanya maha kukomana ngondo na jwalonge kukunyenyekeya, Bhambo Chapanga abhii pamonga na jwenie."

19 Bhahe, Sauli ngatumita bhando kwa Yese, nukulonge, "Unnete mwana gwino Daude jwailucha mambelele." 20 Yese ngantumita Daude mwana mundo kwa Sauli, pamonga na liponda liligheghite mabumunda na lihako lya limbendela chikibhii na divaye na litohe lya mbuhe na kumpelekee ngita hupo. 21 Daude pahikita kwa Sauli ngajhingila mulihengo lyake. Sauli ngampala hake Daude, na jwenie ngabhila nng'egha chilaha yake ya ngondo. 22 Peniya, Sauli ngatumita lilobhe kwa Yese kukulonge, "Munekekeye Daude atame pamba andumikile, nhwalo ndei kumpala." 23 Kila lichiko uhuke mmoho jhola jwalekekilwe na Bhambo Chapanga pilinhikilila Sauli nukung'ahicha, Daude ngakamwila lilimba nu kuhona, na Sauli ngahanganichwa na uhuke jwenio ngabhokita.