1 Bhahe, Akafilichite ngabhakomina na Akaichilahele. Na Akaichilahele ngabhakomilwa kukitombe chuku Gilibowa na bhange ngabhatilita nnonge jha Akafilichite. 2 Nambo Akafilichite ngabhakolila na ngabhatindikiya Sauli na yana yake, na bheniya, ngabhankomita Yonasani na Abinadabo na Malikishuwa, yanamundo Sauli. 3 Ngondo ngainunganila hake kuntindii Sauli. Akahucha mahonga bha Akafilichite pubhamweina Sauli, ngabhanhuchila mihonga. 4 Peniya, Sauli ngannobholila jhola jwanng'eghila chilaha, "Ulumula upanga gwino ungome kupala nangakomwa jhe na bhangajhingii jhando." Nambo ntumiche jhola jwang'eghii chilaha yake akajhighite jhe kutenda yene, nhwalo ajhogwipa hake. Yene, Sauli ngaholomwlila upanga gwake nu kukigwelekeya. 5 Peniya, ntumiche jhola jwanng'eghii chilaha pahweina kubhehe Sauli awii, najwehele ngakigwelikiya mupanga gwake, ngawila pamonga na Sauli. 6 Yene, ndi chawila Sauli na yanamundo itato, helahela ntumiche jwake jwanng'eghila chilaha jhake, pamo na bhange bhando, ngabhawila lichiko lele. 7 Akaichilahele bhibhakibha upande gwu ubhele gwa lulambo, na bhange bhibhakibha upande gwa ghulihumii lyobha mwa lukemba lwa Yoludane, pubhalolita kubhehe Akaichilahele bhatilite, kongo Sauli na yanamundo, bhawile, ngabhailekita miche jhabhe, na bhene ngabhatilita. Akafilichite ngabhajhenda nu kutama ku miche jhenio.

8 Lichiko lilikengime Akafilichite ngabhajhenda kutola ilebhe kuhuma kwa bhando bhibhawile, ngabhakolila malelo gha Sauli na yanamundo, kukitombe chuku Gilibowa. 9 Ngabhahekita muto gwa Sauli nukunhula chilaha yake, peniya ngabhatumita bhando mu kilambo chabhe choha, kutangacha malobhe munyumba jha ichapanga yabhe na kwa bhando bhabhe. 10 Ngabhaibhekita chilaha jhake munyumba jha Maashitalote, yane kichapanga kikeghe, peniya ngabhaujhenjiya mmele gwake mu lipamanda lya muche gwa Beteshane.

11 Nambo bhando bhuku muche gwa Yabeshi gileadi, pibhajhoina ghala ghatendilwe Sauli na Akafilichite, 12 akakomana ngondo bhibhamanya kukomana, bhoha ngabhabhokita, ngabhakelukiya kilo ndaa kutyanga, ngabhajhenda kutola yegha jha Sauli na yegha jha yanamundo kuhumii mu lipamanda lya Beteshane, na ngabhaipelika ade Yabeshi na kwatiniya kwa mwotu. 13 Peniya, ngabhatoila mihupa jhabhe, nu kuichika pahe jha nkongo gwa nkwajho, kwenio ku Yabeshi, na peniya ngabhalekita kulyegha kwa machiko chaba.