1 Bhahe, Daude ngatila kuhumii ku Nayote kwenio ku Lama, ngannyenila Yonasane nukunkonya, "Bho, ndei kilebhe ghane? Bho, nike lilemwa lyango? Bho, ninemwii nike tate gwino ata ajhighe kubhoha ughome gwango?"

2 Yonasane nganyangwila, "Aka! Lyenie libhaha kutale na mwe. Miwe jhe. Tate gwango atenda jhe kilebhe chochoha changanobholela, libhaha likolongwa amu lichokombe, ata nhwalo ghongo ahoto jhe kunhiya. Ibhii jhe naha."

3 Nambo Daude ngalapila nu kulonge, "Chakaka tate gwino, aimanye njwe chumbaile na apahi jhe, mwe umanye chela chapakutenda, kupala nkoto kubhehe ngolongonde. Nambo nilapii kwa Bhambo Chapanga jwabhii ghome na kwino hele, kubhehe kuwe kwango kubhandikii hake."

4 Yonasani ngannobholila Daude, "Chochoha chumpakulonge ndende, chandenda."

5 Bhahe, Daude ngannobholila, "Dola, kilabho ndi unyagho gwa kupitii kwa mbalamwehe, na nenga nipalwa kulye pamonga na munahota nkolongwa, nambo uneke nakajhobhe kunng'onda ade pamalabho kimiye. 6 Anda tate gwino amwei jhe nu munnobholela, Daude annyopite ninnekekiye, ajhende kajhake ku Betelehemo, akapiye litambiko lya kila chaka pamonga na akalongo mundo bha pakajhake. 7 Anda alongii, ‘Tela,’ bhahe, ntumiche gwino abhii njelembo. Nambo anda achimwite mihoto kumanya kubhehe chakaka ayengite kumengwa. 8 Yene, undendela ghambone nenga ntumiche gwino, ku nhwalo ntei lilaghano na nenga nnonge jha Bhambo Chapanga. Nambo, anda ndeii lilemwa, bhahe, ungome mwenga mabhene! Bhahe, mangambeleka jhe kwa tate gwino, kupala angome."

9 Yonasani ngannyangwila, "Liwacho lyenio libhaha kutale na mwenga. Chakaka, anda ngamanya kubhehe tate gwango apangine mabhoho panane jhino, nganinnongalile."

10 Daude ngankonyita "Bho, nanimanya bhole anda tate gwino, nanyangula ku kumpwatalila?"

11 Yonasani ngannobholila Daude, "Hika, tijha kunng'onda." Bhahe, ngabhalongohina pamonga kujhenda kwenio kunng'onda. 12 Peniya, Yonasani ngannobholila Daude, "Ninnapii nnonge jha Bhambo Chapanga, Chapanga jhuku Ichilahele. Kilabho amu pamalabho kipinde ngita chenje, naninkonya tate gwango. Anda mawacho ghake ghambone panane jhino, naninnobholela." 13 Nambo anda tate gwango apala kungomelekeya na nenga nanninobholela jhe, bhahe, Bhambo Chapanga angoma. Bhambo Chapanga abhaha pamonga na mwenga ngita chabhii na tate gwango. 14 Anda nanyendelela kubhehe naghome, bhahe, undendela ghambone machiko ghoha ngita ghala gwa Bhambo Chapanga, machiko ghoha ghu ughome gwango, nambo anda hwile, 15 mangaleka jhe kwatende ghambone akalongo bhango machiko ghoha. Ata kipinde Bhambo Chapanga papakwakomelekeya okwe akamakoko bhino bhoha, bhumii pannema. 16 Yonasani ngabhekita lilaghano na Daude kukulonge, "Bhambo Chapanga na abhakomelekeye akamakoko bhino."

17 Yonasani ngannobholila Daude alapila kupala kulenganikiya champaila, kunhwalo Yonasani akampai hake Daude ngita chakipala jwene. 18 Peniya, Yonasani ngannobholela Daude, kilabho ndi unyagho gwa kupitila kwa mbalamwehe, bhando nabhamanya kubhehe mmii jhe nhwalo kigoda chino nakibhaha changa mundo. 19 Pamalabho kimiye, nnyenda chehemo jhinyobhita pintumbwila kipinde kindokole chenje pikitumbwila, makajhobhe munyuma jha lighanga lya Ezele. 20 Nenga nahucha mahonga matato puupele jhake, ngita nengite telatela. 21 Peniya, nanintuma ntumiche gwango ajhenda kupalaha mahonga gheniya. Anda ninnobholile, "Dola, mahonga gheniya ghabhii upandi ghongo gwino, mitola mileta pamba, yenio ndi nibhaha nginyililo kubhehe mmi njelembo, na mwenga namikipiya chehemo jhinnyobhita nhwalo nilapii kwa Bhambo Chapanga jwabhii ghome, kubhehe namma njelembo changakibhangwa chochoha. 22 Nambo anda ninnobholile, Dola, mahonga ghabhii nnonge jhino, bhahe mipalwa mmoka, ku nhwalo Bhambo Chapanga impala nnyende kutale. 23 Panane jha ghala ghitulongile mwenga na nenga, Bhambo Chapanga ndi jwalola pakate jhito mwenga na nenga nukututenda tukoto kujhehwa, machiko ghoha ghangapeta."

24 Bhahe, Daude ngajhobhita munng'onda, na unyagho gwa kupitii kwa mbalamwehe, munahota nkolongwa Sauli ngatamita kupala alya. 25 Ngatamita pa kigoda chake chikibhii pahina na lipamanda, mwiye na mwiye na Yonasani, na Abineli ngatamita pahina na munahota nkolongwa. Nambo kigoda cha Daude kikibha changa mundo. 26 Lichiko lyenio, Sauli akalongi jhe chochoha, ahambwika pange Daude unkoli nhwalo amu jwanga jheketelwa kunnyinami Bhambo Chapanga, kujhenda ku unyagho gwenio. 27 Lichiko lilikengime lya unyagho gwa kupitila kwa mbalamwehe, kigoda cha Daude kikibha changa mundo kabhele. Peniya, Sauli ngankonyita mwanamundo Yonasani, "Kwanike, Daude mwana jwa Yese dicho na deleno, ahikite jhe kulyegha?"

28 Yonasani ngannyanguu, "Daude annyopita ninnyeketele ajhenda ku Betelehemo. 29 Alongila unyeketela nyende kwa akalongobhango ku nhwalo bhitenda unyagho gwa kupiya litambiko kwenio ku bomane, na nhwacha gwango ambaii monekane. Yene, anda nanyeketela unyeketele, nyende kwa akalongo bhango. Ndi nhwalo abhii jhe pamba kulye pamonga na munahota nkolongwa."

30 Peniya, Sauli ngabhila na lilaka panane jha mwanamundo Yonasani, ngannobholila, "Mwe mamwana jwa mwikeghe jhuna mitaho na nnyambila" Bho, mihambuka nimanyi jhe kubhehe muhagwii mwana jwa Yese kwa hone jhino na kwa hone jha majhe gwino? 31 Bho, mimanya jhe kubhehe Daude pabhe ghome mwe mihoto jhe kubhehe munahota nkolongwa pikilambo chenje? Ngohe, nnyenda makanneta pamba, chakaka ipalwa ahwa.

32 Yonasani ngankonyita tate gwake, "Bho, kunhwalo ghane akomwe? Bho, kilebhe ghane chateile?"

33 Nambo Sauli ngantaghila nkowa Yonasani kwa makakala kupala ankoma. Ndi Yonasani ngamanyita kubhehe tate gwake ate kuyenga kunkoma Daude. 34 Yonasani ngajhemita chehemo pu kulele chakulya kwa lilaka. Lichiko lyenio lyu ubhele lya unyagho gwa kuhembukii kwa mwehe akalii jhe chochoha, akibha ngolongonde ku nhwalo tate gwake antendi ghanganandela Daude. 35 Lichiko lilikengima lukela, Yonasani ngajhenda kunng'onda, kukongana na Daude ngita chibhalaghina. Ajhendita kwenio na kangombo jhumo munalome. 36 Pahikita kwenio ngannobholila kangombo jhola, "Bhutuka makapalahe mihonga jhambakubula." Kangombo jhola pabhutwika mbelo, Yonasani ngahuchita mihonga nnonge jhake. 37 Kangombo jhola pahikita tu chehemo pugwelii nhonga, Yonasani ngankemita nukulonge, "Nhonga ubhii nnonge jhino." 38 Yonasani nganchobhilila njobhelo kangombo jwenio, "Hajha jhomboteka tyanga kajhombe mangajhema jhe!" Kangombo jhola ngalokwita mihonga nu kubhujha kwa munahota gwake. 39 Nambo kangombo jwenio amanyita jhe chochoha, mana jha kitendwa chenio. Yonasani na Daude kanjika ndi bhamanyita kitendwa chenio. 40 Yonasani ngankamukiya kangombo jhola chilaha yake nu kunnobholela "Ngohe nnyenda mibhujhicha ku bomane."

41 Pabhokita kangombo jhola, Daude ngajhinuka kuhumii chehemo jhake jhajhobhita pahina na lighanga. Ngajhinima pahe mala tato nnonge jha Yonasani. Ngabhakumbatilina, ngabhalelita pamonga. Nambo Daude akibha na lipyanda hake kuliku Yonasani. 42 Peniya, Yonasani ngannobholila Daude, "Nnyenda ku uteeke, kunhwalo tulapiine kilapo chu ukoche pakate jhito nnonge jha Bhambo Chapanga, kulonge Bhambo Chapanga ndi jwalola kwito na pakate jha ibhelukwa ino na yango, machiko ghoha ghangapeta." Peniya, Daude ngabhokita na Yonasani hele ngakelehwika ku bomane.