1 Kipinde chenio, Akafilichite ngabhakonganika pamonga, kupala bhakomane na Akaichilahele. Akaichilahele ngabhabhekita kighono chabhe ku Ebenezeli, na Akafilichite ngabhabhekita kighono chabhe ku Afeka. 2 Akafilichite ngabhajhingilila Akaichilahele, ngondo piikondita Akaichilahele ngabhalepelila ngondo. Yene akakomana ngondo ngita elufo ncheche bha Akaichilahele ngabhakomitwa mulubhanja lwa ngondo. 3 Akakomana ngondo bhibhahighilike pibhakelehwika kukighono chabhe, ighogholo yuku Ichilahele ngabhakonyina bhene chika, "Bho, kunhwalo ghane Bhambo Chapanga abhalekite Akafilichite bhatuhotole? Tijhangana takatole Lichanduko lya Lilaghano lya Bhambo Chapanga ku Shilo, kupala Bhambo Chapanga abhehe pamonga na twenga, atukombola kubhoka kwa akamakoko bhito." 4 Yene, ngabhatumita bhando kujhenda ku Shilo, na bheniya ngabhaliletita Lichanduko lya Lilaghano lya Bhambo Chapanga, Chapanga jhuna makakala ghoha, jwaitama panane jha ihumbe ina mapapanilo iikemwa Makelube. Yana inalome ya mpiya litambiko Ele yane Hofini na Finehache, ndi bhibhahikita na Lichanduko lya Lilaghano lya Bhambo Chapanga.

5 Kipinde Lichanduko lya Lilaghano lya Bhambo Chapanga pilihikichwa kukighono, Akaichilahele ngabhachobhila kukuhangana, na kilambo choha ngakinyukwinyika. 6 Akafilichite pubhajhoina njobhelo yenio yukuhangana ngabhakonya, "Bho, njobhelo yenio yoha kukighono cha Akaebulaniya kipitii nike?"

Pibhamanyita kubhehe lichanduko lya Lilaghano lya Bhambo Chapanga lihikichwe mukighono cha Akaichilahele, 7 ngabhajhogwipa hake Akafilichite, ngabhalongila, "Pange ichapanga jhabhe ijhingii mukighono chabhe. Natulola choto, kilebhe ngita chenje kinawahi jhe kupitila. 8 Natulola choto! Bho, meneke jwahoto kutughombola na ichapanga jhenje ina makakala? Yenio ndi ichapanga ijhakomita Akamichile kwa mabulo ghangalandana, kwenio kunjenga. 9 Ngohe, ma Akafilichite mangajhoghopa jhe. Mmaa, nganganga kupala mangabhe jhe akabhanda bha Akaebulaniya ngita bheniya chibhakibha akabhanda kwa twenga. Mma nganganga mukakomane nabho."

10 Bhahe, Akafilichite ngabhakomina ngondo na Akaichilahele, na Akaichilahele ngabhalepelila, na kila mundo ngatilila mukighono chake. Na akakomana ngondo elufo chelachine bhuku Ichilahele bhibhatyanga kwa magholo, ngabhakomitwa lichiko lyenio. 11 Lichanduko lya Lilaghano lya Bhambo Chapanga ngalipukilwa kwa makakala na Akafilichite, na helehela yana inalome ya mpiya litambiko Ele, Hofini na Fineache, ngabhakomitwa.

12 Lichiko lele, nkomana ngondo jhumo jwa likabila lya Benjamine ngabhutwika kubhoka pulubhanja lwa ngondo ade ku Shilo, kongo ngobho jhake ijhwepukine na abhii nulutukunda tulilu pa muto gwake. 13 Ele, ngabhila na kiholo kumwojho gwake kupete Lichanduko lya Bhambo Chapanga, pakibha atamite pakigoda chake, muupele mwa ndela alendelila pange najhoha kilebhe chochoha. Nkomana ngondo jhola pajhingila kubomane nukuchimulila malobhe ghenio, bhando bhoha bha muche gwenio ngabhalelita hake. 14 Ele ngajhoina lilobhe lya kilelo, ngakonyita, "Bho, njobhelo jhenio jha kilebhe ghane?" Nkomana ngondo jhola ngajhahwila kajhombe kwa Ele kupala kunnobholela malobhe ghenio. 15 Kipinde chenio, mpiya litambiko Ele akibha na yaka makome ticha na nane na miho ghake ghakojhokine. 16 Nkomana ngondo jhola ngannobholila Ele, "Ngoheno nhumii kungondo, ndilite kuhumii kwenio." Ele ngankonyita,

"Nike kipitii kwenio mwanango?" 17 Nkomana ngondo jhola ngajhangwila, "Akaichilahele bhatilite Akafilichite. Na akakomana ngondo ngoo bhawile, kabhele na yana ino Hofini na Fineache bhakomitwe na Akafilichite bhalitoile Lichanduko lya Lilaghano lya Bhambo Chapanga."

18 Nkomana ngondo jwenio palongila nhwalo gwa lichanduko lya lilaghano lya Bhambo Chapanga, Ele ngagwila luhangalaghajhe kuhumii pakigoda chake pupele jha litangala. Yene, ntandala gwake ngaudunywika dunyu nhwalo akaghogholwike hake helahela nankendao, ngajhomokila papa. Ele akibha ntemula jwa Akaichilahele kwa yaka makome ncheche.

19 Kamwanamundo Ele, nhwana gwa Fineache, akibha na ndumbo na akabhandikii kupapa. Pajhoina kubhehe Lichanduko lya Lilaghano lya Bhambo Chapanga lipukilwe kwa makakala na nkohano mundo na unganamundo bhajhomwike, papa ngakamwilwa na lipyanda, nukupapa nambo akibha na lipyanda likolongwa. 20 Mwikeghe jwenio pakibha mukujhomoka, akakunga bhibhantangatila ngabhannobholila, "Mangajhoghopa jhe, nhwalo mpapite mwana munalome." Nambo jwenie akajhangwi jhe hilu kwajhokanikiya. 21 Mwana jwenio ngantinita liina lyake Ikabode, mana ghake, "Ung'alicho gwa Bhambo Chapanga ubhokite ku Ichililahele," ku nhwalo gwa kupukilwa kwa Lichanduko lya Lilaghano lya Bhambo Chapanga na malelo gha nkohanomundo na unganamundo. 22 Ngalongila, "Ung'alicho gwa Bhambo Chapanga ubhokite ku Ichilahele, nhwalo Lichanduko lya Lilaghano lya Bhambo Chapanga lipukilwe kwa makakala."