João 6

Yecho abhalicha bhando elufo nhwano

1 Pajhomolila kulonge gheniya, Yecho ajhakujhomboka kwiye jha lilabha lya ku Galilaya, helahela likemwa lilabha lya Tibeliya. 2 Lilongo likolongwa lya bhando lijhakunkengama Yecho nhwalo bhakalolite nginyililo yatehila ya kwalamicha bhibhalwalwa. 3 Yecho ajhakukwela ku kitombe, ajhakutama pahe kwenio pamonga na bhabholwa bhake. 4 Unyagho gwa Pachaka jha Akayahude ukibha ubhandikile. 5 Bhahe, Yecho palyangatika ajhakubhona lilongo likolongwa lya bhando libhii titili likanhikilila, ajhakunkonya Filipu, "Bho, natuhemela kojhe chakulye bhando bhamba?" 6 Yecho alongila naha anyighe Filipu, nhwalo akamanye chakuhenga.

7 Filipu ajhakunnyanguu, "Imbembela ya mbijha makome mabhele gha madine gha feza ghakwela jhe kuhemelela mabumunda kila mundo."

8 Jhumo pakate jha bhabholwa bhake liina lyake Anduleya, unung’una mundo Simone Petile, ajhakunnobholela Yecho, 9 "Abhii pamba nchongolo, jwakwete mabumunda nhwano gha chayile na homba ibhele, nambo nabhajhukuta bhole bhando kwa ilebhe henge yandina?"

10 Yecho ajhakwalobholela bhabholwa bhake, "Mwatamike bhando pahe mwihibhogha ibhogha." Peniya pakibha na manyahe titili bhahe, bhando bhoha bhakahikii elufo nhwano, bheniya akanalome tugha. 11 Bhahe, Yecho ajhakutola mabumunda gha chayile, na ajhakunchenguu Chapanga, na kwabhaghanichila bhando bhubhatamite pahe. Na homba ajhakuhibhaghanichila ibhogha yoha hele ngita chibhapalita. 12 Bhando bhoha bhajhukuta, Yecho ajhakwalobholela bhabholwa bhake, "Nnyolangane mahighiliko ghighahighilike changahobhelela chochoha." 13 Bhahe, bhabholwa bhajhakujhola mahighiliko gha mabumunda gha chayile bhajhakutwelela ichukilo kome na ibhele ya mahighiliko.

14 Bhando bhoha pubhalolita nginyililo itehilwa na Yecho bhajhakulonge, "Chakaka jhonjo ndi nnondole jwalongilwa nahika pannema pano!"