Marcos 8

Yecho abhalicha bhando elufo ncheche

1 Machiko gheniya, lilongo likolongwa lya bhando likakonganike kabhele. Nhwalo bhakibha jhe na ilebhe ya kulyegha, Yecho ajhakwakema bhabholwa bhake, ajhakwalobhalela, 2 "Nakole kiya bhando bheniya, hena, bhatamite na nenga kwa machiko matato changalyegha. 3 Nalobholila bhajhende kajhabhe na njala bhihoto kuhindukii undela, nhwalo bhange bhahuma kutale."

4 Bhabholwa bhake bhajhakunkonya, "Bho, pamba palundwanga nabhapata ko chakulyegha kujhukuta bheniya bhoha?"

5 Yecho ajhakwakonya, "Bho, nkwete mabumunda malegha?"

Bhajhakunyanguu, "Tubhii nagho chaba."

6 Bhahe, Yecho ajhakwalobholela mwatamike bhando pahe. Ajhakutola mabumunda chaba ajhakunchenguu Chapanga, ajhakumetula na kwapekeya bhabholwa bhake bhaghabhanichile bhando, na bhene bhajhakwabhaghulila bhando. 7 Helahela bhakibha na homba yandina. Yecho ajhakuilomba na kwalobholela bhabholwa bhake bhabhaghulile bhando. 8 Bhando bhakalile na kujhukuta, peniya bhabholwa bhake bhajhakulokota mahighililo gha mabumunda na homba, bhajhakutweleya ichukilo chaba. 9 Bhando bhubhalila bhakibha ngita elufo ncheche. Peniya Yecho ajhakwatabhuka.