1 Bhambo Chapanga ngampitila Ulaimo pahina na mikongo mikolongwa jha miyalone jha Mamule. Ulaimo pakibha atamite chehemo jhakujhingilila pakichimba chake pulibhalita hake lyobha. 2 Ulaimo pajhinwila miho ghake, ngabhabhona akaghene bhatato bhajhemite patale kandina nnongi jhake. Papa pabhabhonita, ngabhabhutikila kubhoke patamite pakichimba ngajhenda kwapokela. Paikita kwa bhando bheniya ngalita pahe kwa ichima, 3 nu kulonge, "Makabhambo bhango, chonde mangambeta jhe ne natumiche gwino, nijhopa mpipikiye kwa nenga. 4 Nanetelwa mache ghandina kupala nkuwe makongono gwino na kongo mupomolela pakiwile cha nkongo ogho. 5 Kipinde chimupomolela, nanintelekela chakulya chandina, nlyeghe, nkola makakala ghaghujhendelela na mwanja gwino mana nhwiki nenga natumiche gwino."

Na bhene ngabhajhangwila, "Tela, ntenda ngita chinnongii."

6 Ulaimo ngabhujha kajhombe mu kichimba kunnobhole Sala, "Ntende kajhombe ntole ipemo itato ya uhembe gwambone na nteleke mabumunda." 7 Peniya, Ulaimo ngajhenda kajhombe mu kibhajha cha ng'ombi, ngahaghuu litole lya ng'ombi lilihatite na ngampila ntumiche, na jwenio nganchinjita na kunteleka kajhombe. 8 Peniya, Ulaimo ngatola chiagi na mabhele na nyama jhitelikwe ngabhapelikila chakulya akaghene bheniya. Na kipinde pibhalila pakiwile cha nkongo gwenio ngajhema pahina nabho kwatumikila.

9 Akaghene bheniya ngabhankonya Ulaimo, "Nhwana gwino Sala abhii koo?"

Ulaimo pajhangwila, "Abhii mu kichimba."

10 Jhumo panakate jhabhe ngalonge, "Chakaka nanimmujhila kipinde ngita chenje pachaka, nhwana gwino Achala nabhabha na mwana munalome."

Peniya, Sala akibha pakimbokotole cha nnyango gwa kichimba, ngajhoha.

11 Ulaimo na Sala bhoha bhakibha bhaghogholwike hake, na Sala machiko ghake gha kupapa ghakapetite. 12 Yene, Sala ngahekita chuumwojho nu kulonge, "Nenga nakimbujha na anganabhango hele aghogholwike. Bho, nahotola bho kuhanganila kilebhe cheneche nukupapa mwana?"

13 Pena, Bhambo ngankonya Ulaimo, "Nhwalo gwa nike Sala ahekite na kukikonya, ‘Chakaka nahoto bhole kubhehe namwana mughogholo mwone?’ 14 Bho, kibhii kilebhe chochoha chikilimba kwa Bhambo? Nanimmujhila kabhele pachaka, kipinde ngita chenje, Sala nabhaha na mwana munalome."

15 Nambo Sala kongo abhii na kiholo, ngakana akilongila, "Nhwekite jhe."

Bhambo Chapanga ngalongila, "Nahi jhe! Ena, nhwekite ma Sala."

16 Peniya, bhando bhala ngabhabhoka, na Ulaimo ngabhachindikicha, ngabhaikita chehemo jhukuhoto kukibhola muche gwaku Sodoma. 17 Bhambo ngawacha umwojho, "Bho, nunhwiye Ulaimo kilebhe chipangite kuhenga? 18 Nhwalo Ulaimo nabhaha tate jwa bhando bhina makakala na kupete kwa jwenio bhando bhoha pannema nabhabha na mota! 19 Nihagwii jwenio Ulaimo na kibheluko chake. Jwenie ndi naibhola ibheluko yake kukenga ndela jhango, bhatende ghighahanganicha palonge jhango kupala nenga nhotole kulenganikiya lilaghano lyango."

20 Yene, Bhambo Chapanga ngalongila, "Ibhii ngokoleko twe itendwa na bhando bhuku Sodoma na ku Gomola na uhakaho gwabhe uchochite hake. 21 Yene, mbakuuluka ote kujhenda kulola namwene anda chakaka bhatei gwanganandela ngita punijhoa mbala nikamanye."

22 Peniya, kubhoka peniya, bhando bhala ngabhajhenda ku Sodoma nambo Bhambo Chapanga ngaighila papa bhajhemite pamonga nu Ulaimo. 23 Ulaimo ngamandikila Bhambo, ngankonya, "Bho, chakaka namakomelekeya bhando bhibhatenda ghambone pamonga na bhanganandela? 24 Pange bhabhii bhando bhibhatenda ghambone makome nhwano umuche gwenio. Bho, namukomelekeya muche gwenio amu namuuleka nhwalo gwa bhando bheniya bhibhatenda ghambone makome nhwano bhubhii umuche gwenio? 25 Ne nihole jhe kubhehe nantenda yene! Kwakoma bhando bhibhatenda ghambone pamonga na bhanganandela, bhambone kwatenda tela na bhanganandela! Yene, jwakutemulana nnema ghoha nakotoka jhe kutenda ilebhe ibhii tela!"

26 Bhambo Chapanga ngannobholila Ulaimo kubhehe, "Chakaka anda nakolii bhando makome nhwalo ku muche gwa ku Sodoma, naniuleka muche ghoha gwa ku Sodoma muteeke kwa nhwalo gwabhe."

27 Ulaimo ngalonge, "Nenga nyogwipe jhe kulonge na mwenga ma Bhambo Chapanga, ne jhupanginwe kuhuma mundope na malio tugha. 28 Pange pihoto kubhehe na bhando bhibhatenda ghambone makome ncheche nu nhwano chehemo jha bhando makome nhwano. Bho, namukomelekeya muche ghoha nhwalo bhapongwii bhando nhwano abha?"

Bhambo Chapanga ngajhangwila, "Niniukomelekeya jhe muche ghoha anda bhabhii bhando bhambone makome ncheche nu nhwano."

29 Ulaimo ngajhendilila kulonge, "Bho, anda bhabhii bhando makome ncheche bhahotwii kubhonekana mwenio."

Bhambo Chapanga ngalongila, "Kwa nhwalo jha bhando makome ncheche bhibhatenda ghambone naniukomelekeya jhe muche gwenio."

30 Ulaimo ngajhendilila kulonge, "Ma Mabhambo, chonde nnyopa mangayome jhe, ne mbakulonge kabhena. Pange jhe nabhabhonekana bhando bhibhatenda ghambone makome matato."

Bhambo Chapanga ngajhangwila, "Nandendi jhe gheniya anda nakolii bhando makome matato bhibhatenda ghambone."

31 Ulaimo ngalonge, "Bhambo nijhopa unyeketelete kulonge na mwenga kabhele. Bho, pange nabhabhonikana bhando bhibhatenda ghambone makome mabhele."

Bhambo Chapanga ngajhangwila, "Kwa nhwalo jha bhando makome mabhele, nikikomelekeya jhe muche gwenio."

32 Kubhoke peniya Ulaimo ngalonge, "Ma Mabhambo ninyopa mangayoma jhe, nambo mbakulonge kibhele chimo tu. Bho, pange nabhabhonekana bhando bhibhatenda ghambone likome limo tugha."

Bhambo Chapanga ngajhangwila, "Kwa nhwalo jha bheniya kome nikikomelekeya jhe muche gwenio." 33 Bhambo Chapanga pajhomolila kulonge nu Ulaimo ngabhokita na Ulaimo hele ngabhujhita kajhake.