1 Bhahe, Adamo ngagholwika na nhwanamundo Hawa, jwenio ngabhila na ndumbo, ngampapita mwana Kaine. Hawa palongila, "Mbapite mwana munalome kukujhangatilwa na Chapanga." 2 Kubhoke peniya, ngapapita mwana jhonge munalome unnung'una mundo jwakemitwa Abele. Abele akibha nkoleka inyama nambo Kaine ateila kulema. 3 Pughapetita ghena, Kaine ngampikiya Bhambo Chapanga chadaka kuhumii mu mahuno ghake gha mung'onda, 4 na jwenie Abele hele ngampiikiya Chapanga jhumo jha mambelele ghake kubhoke mwibheluko yukutumbula na ngampiikiya Chapanga chehemo jha nyama jhihatite. Bhambo Chapanga nganyekitila Abele na litambiko lyake, 5 nambo kwa Kaine akanyekiti jhe hilu litambiko lyake. Ku yene Kaine ajhakubhehe na lilaka hake na kumiho kwake kujhakutwele ngenja. 6 Bhambo Chapanga pankonyita Kaine, "Bho, nhwalo ghane mmii na lilaka na nhwalo ghane kumiho jhino kutwelii ngenja?" 7 Bho, anda ntei ghambone mihambuka nanyeketelwa jhe? Anda ntei ghanganandela, bhahe, uhakaho ubhii panyango ipala, intenda kunnyobhela, nambo mipalwa kughahotola.

8 Bhahe, Kaine ngannobholela unung'unamundo, "Tijha ku nng'onda," pibhakibha kwenio kunng'onda, Kaine ngankomita unung'unamundo.

9 Bhambo Chapanga pankonyita Kaine, "Unung'una gwino Abele abhiikoo? Kaine pajhangwila,

"Ne manyii jhe, Bho, ne nalonda jwa unung'una gwango?"

10 Bhambo palongila, "Mwe mukitei nike? Myahe jhu unung'una gwino inelela kuhumii muundope." 11 Ngohe mwenga nnapanikilwe! Na kubhengwa kubhoka muundope ghola ghujhongite myahe jha unnung'una gwino Abele jhumukomite. 12 Pipala kulema lundope lwenio nanyambulila jhe mahuno ghoghoha. Chakaka namme ng'o nakitamo pannema, namma kutyanga tyanga.

13 Kaine pannobholila Bhambo Chapanga, "Luhadabulo lwango luchochite hake, nihote jhe kuhimbilila. 14 Deleno umengite kuhumii mulundope lulubholile, na kubhehe kutale na mwenga. Bhahe, nama namundo jwakutyanga tyanga pannema, kila mundo jwangonganako nangoma."

15 Nambo Bhambo Chapanga panyangwila, "Nahi jhe, mundo jhojhoha jwapala kunkoma mwe ma Kaine umanya mundo jwenio naninepechela mala chaba." Bhahe, Bhambo ngamekita huna Kaine kupala mundo jhojhoha jwammona angankoma jhe. 16 Peniya, Kaine ngabhokita palonge jha Chapanga ngajhenda kutama ku kilambo cha Node, kilambo cha Node mana jhake kutyangatyanga kwa upande ghulihumii lyobha mwa Edene.

17 Pighapetita ghena, Kaine ngagholwika nuhwana mundo na jwenio ngabhila na ndumbo ngapapita mwana munalome, ngampila liina lyake Enoke. Kaine ngatumbwila kuchenga muche ngaukemita kwa liina lya mwana mundo Enoke. 18 Enoke ngampapita Ilade na Ilade ngampapita Meyuyaele na Meyuyaele ngampapita Mituchele na Mitushele ngampapita Lameke. 19 Lameke ngatolila matala, jhukutumbula akemitwa Ada na jhonge akamitwa Sila. 20 Ada ngapapita mwana liina lyake akemitwa Yabali, jwenio akibha hokolo jwa bhoha bhibhakololeka inyama na bhibhatama mu ichimba. 21 Na jwenio unung'una jwa Yabale akemitwa Yubali, jwenio akibha hokolo jwa bhoha bhabhijhemba malimba na itolilo. 22 Sila hele ngapapita mwana akemitwa liina lyake Tubale Kaine, jwenio akibha punde kipala jwa yombo yoha ya chaba na choma. Na nnombo mundo Tubale Kaine akemitwa Naama.

23 Lameke ngabhalobholila akaanamundo,

"Mwe, Ada na Sila unyokanikiya,

unyokanikiya ngilonge mangota akaana bha Lameke,

ninkomite mundo nhwalo andei kungochola, hena

nganinkomita kangombo nhwalo andei kungochola.

24 Anda Kaine nalepechelwa mala chaba,

chakaka Lameke nalepechelwa mala chabine na chaba."

25 Adamo ngagholwika kabhele na nhwanamundo Hawa, na ngapapita mwana munalome ngakemita liina lyake Sete mana ghake alongila, "Chapanga ambekii jhonge mwana chehemo jha Abele, jwakomitwe na Kaine." 26 Sete ngapapita mwana munalome ngakemita liina lyake Enoshe. Pena ndi pibhatumbwila bhando kunnyinamila Chapanga.