1 Yakobu pajhoha kubhehe chakulya kibhii ku Michile, ngailobholila yanamundo, mbone ntamingine nukuloleya tugha? 2 Ngajhendelela kwalobholela kubhehe, "Ku Michile kibhii chakulya. Nnyendangane kwenio makaemele chakulya kupala twakawe jhe na njala." 3 Yene, akanung'una kome bha Uchupo ngabhajhenda ku Michile kueme chakulya. 4 Nambo Yakobu annekiti jhe Benjamine, unung'una jwa Uchupo, ajhende pamonga na mangota mana aholila pange jhe kihoto kunkolela kilebhe kibhoho.

5 Peniya, yana ya Akachilahele ngiika ku Michile ilongwine na bhando bhange bhibhajhenda kueme chakulya, nhwalo kukilambo chuku Kaanane pakibha na njala hele. 6 Uchupo akibha kilongoche nkolongwa kwenio ku Michile. Uchupo ndi jwajhemilila kwachuluchila chakulya bhando bhoha. Peniya, akawacha mundo ngabhaika nukutama makilikite palonge jha Uchupo. 7 Uchupo ngabhabhona akalongo mundo na kwamanya, nambo ngatenda ngita abhamanyii jhe, ngalonge nabho kuukale. Ngabhakonya, "Mangota mwe mibhoke koo?"

Ngabhajhangwila, "Tubhoke kukilambo chuku Kaanane, tuikite kueme chakulya."

8 Pamo na Uchupo kwamanya akalongo mundo, nambo bhene bhumanyii jhe. 9 Uchupo ngakombokela maloto ghake gha makacho ngabhalobholila, "Mangota makalingukii. Nhikingine kulingukiya kilambo chito."

10 Bhene ngabhalonge, "Nai jhe, manahota bhito." Twenga akatumiche bhino tuikila kueme chakulya. 11 Twenga ndi twalukolo, yana ya tate jhumo. Twenga ndi bhando bhituhobholeka, twakalingukii jhe.

12 Nambo Uchupo ngaghaghalila kulonge, "Nai jhe! Nhikingine kulingukiya kilambo chito."

13 Nambo ngabhalonge, "Twenga akatumiche bhino, tubhii kome na bhabhele bha kinyongo chimo, jwaitama kukilambo chuku Kaanane. Unung'una gwito aighilile na tate ukajha, na ungung'una jhonge ajhomwike."

14 Nambo Uchupo ngalonge, "Ndi ngita punnongila, mangotamwe makalingukii tugha. 15 Yene, ndi chimpakujhighanikilwa, ngohe nilapi kwa liina lya munahota nkolongwa Falao. Mibhoka jhe pamba ade papakuika unung'una gwino. 16 Munnaghalikiya jhumo panakate jhino kunneta unung'una gwino jwenio, bhange mnnendela mukipungo. Peniya malobhe gwino naghamanyika kubhehe chakaka. Anda nai jhe, nilapa kwa liina lya Falao, kubhehe mangota ndi akalingukii tugha!" 17 Peniya, ngabhabheka bhoha mukipungo kwa machiko matato.

18 Mulichiko lya utato Uchupo ngabhalobholila, "Nhwalo ne ndi mundo jwa Chapanga, nhenga chininnobholela kupala nnamengane. 19 Anda chakaka mangota mabhando bhukuhobholeka, jhumo panakate jhino aighala mukipungo na bhange bhabhotuya chakulya kwa akalongo bhino bhina njala. 20 Peniya, mukanneta unung'una gwino kwango. Yene, ndi nailangiya uchakaka gwa malobhe gwino, na mangota nankomwe jhe." Ngabhajheketela kutenda yenio.

21 Ngabhalobhlilana bhene chika kubhehe, "Chakaka twe tulagha nhwalo tukannemwii hake unung'una gwito. Pamo tummonita akalombola umwojho gwake, twenga tunkannyokanikii jhe ata patumbembelekiya."

22 Leubene ngabhalobholila, "Bho, nenga nakannobholiii jhe twangammengwa unung'una gwito? Nambo mangotamwe machikilo gwino majhumo! Ngohe tung'ahika nhwalo gwa chela chituntendii." 23 Bhene bhakamanyii jhe kubhehe Uchupo akibha aghamanye ghoha ghibhalongila mana pibhalongila bhalongila kupete mundo jhonge. 24 Uchupo ngaheghila pandina, ngapiya mahole tyee. Pakotwika, ngaika kulonge nabho kabhele. Peniya ngamupukila Chimeone nukutabha pingo palonge jha miho ghabhe.

25 Uchupo ngaamulicha, mahako ghabhe bhatweleya yakulya, kila mundo bhamujhichila mbijha yake mulihako lyake, na bhampela machulopo. Ngabhatenda gheniya ghoha. 26 Peniya, akalongo mundo ngabhaghatweka maponda ghabhe mihigho jha yakulya, ngabhajhawila. 27 Pibhaika pakighono undela, jhumo kate jhabhe ngakwiula lihako lyake kupala alipe liponda lyake, ngakangicha kubhona mbijha yake panane jha nnomo gwa lihako lyake. 28 Ngabhalobholila akalongo mundo, "Mbijha yango amujhichile. Henge pamba mu lihako lyango!"

Pibhajhoha gheniya, ngabhahechwika. Nu kuloleana kumiho kongo bhikilendema nukonyana, "Chenje kilebhe ghane chatutendii Chapanga?" 29 Pibhaika ku Kaanane kwatate gwabhe, ngabhachimulila ghoha ghighapitii, ngibhalongila, 30 "Nkolo jwa kilambo chela ngalongila natwenga kukupwata, nukutuwachii twenga twakaingukii pikilambo chake. 31 Nambo ngabhannyangwila, ‘Twakaingukiii jhe,’ ngatulonge kubhehe twenga twabhando bhukuhobholeka hake. 32 Nambo ngabhalonge, twenga akatumiche bhino, tubhii kome na bhabhele bha kinyongo chimo, jwaitama kukilambo chuku Kaanane. Unung'una gwito aighilile na tate ukajha, na ungung'una jhonge ajhomwike. 33 Peniya, nkolongwa jwa kilambo chenio ngalonge, ‘Yene, ndi chimbakumanya kubhehe mangota ndi mabhando bhukuhobholeka. Mukannete nnongo gwino jhumo, na bhange bhakalekela yakulya kajhino kakalongo bhino bhina njala. 34 Peniya, mukanneta unung'una gwino kwango. Yene, ndi nailangiya uchakaka gwa malobhe gwino makalingukii jhe, nambo mabhando bhukuhobholeka. Anda ntei gheniya unnung'una gwino naninnekekeya akityangila tugha, namangota nannyeketelwa kuchulucha ilebhe mu kilambo chenje.’"

35 Pibhajhakina ilebhe mumahako ghabhe, ngabhahechwika kulola kila mundo abhujhichilwe mbijha yake nkate jha lihako lyake. Pibhalola gheniya, bhoha pamonga na akatate bhabhe ngabhajhogwipa hake. 36 Yakobu tate mundo ngalonge, "Umboka yana yango! Uchupo abhii jhe, na Chimeone abhii jhe, na ngohe mipala kuntola Benjamine. Ghoha ghambatite nenga!"

37 Peniya, Leubene ngannobholila tatemundo, "Anda ninnetite jhe Benjamine, mikoma yana yango ibhele. Munneke Benjemine mulubhoko lwango, nenga nanninchunga nukunneta kwino."

38 Nambo tatemundo ngalonge, "Mwanango ajhendajhe namangota, unung'una mundo ajhomwike, jhonjo kanjika ndi jwaighilile. Nenga ng'oime anda mwana jhonjo apakupata indondo yoyoha hela umwanja gwapakujhenda mmanya nanhwa kwa ungolongonde."