1 Pukutumbula bhando bhoha pannema bhalongila kilongei chimo na malobhe ghaghalaghala. 2 Bhahe, bhando ngabhatyanga kuhumii kulipitii lyobha na ngabhaikita pakilambo chapandika cha Shinale ngabhatamita kwenio. 3 Peniya, ngabhapwepwelina bhene chika, "Denda tupyatu matofale na tujhoche maha kwa mwotu." Bhakachengite kwa matofale pala pibhapalita maghanga na bhakibha na lame pala pibhapala na chokaa. 4 Ngabhalongila, "Ngohe, tuchenge muche gwito na nnala, nnala gwenio kilegheleghe chake kiika ade kunane kwa Chapanga, ndi tumanyikane kupala tukoto kupechengana pannema poha."

5 Bhahe, Bhambo Chapanga ngauluka kupala aulolekee muche gwenio na nnala gwenio ghuchengwa na bhando. 6 Bhambo Chapanga ngalongila, "Nnola bhando bhamba bha kilambo chimo na kilonge chimo, ghongo ndi utumbulo tu gwa ghala ghibhapala kuhengwa. Ghoghoha ghipalwa kuhengwa naghahengeka telatela. 7 Denda tuuluke pahe tukahangabhane kilongei chabhe kupala bhakoto kukung'ilana bhene kwa bhene." 8 Peniya, Chapanga ngabhapechangane pannema gwoha na bhene ngabhalekita kuchenga muche gwenio. 9 Muche gwenio ukemitwa Babele nhwalo kwenio ndi Bhambo ndi kwaibhingina ilongei pannema gwoha nu kubhoka kwenio ngabhateila bhando bhapechengane pannema poha.

10 Chenje ndi kibheluko cha Shemo. Yaka ibhele puipitita kuhumii mu maheluko gha mache twe, Shemo pakibha na yaka miya, ngampapita Alupakisade. 11 Pajhomolila kumpapa Alupakichade, Shemo ngatamita nukubhehe yaka henge miya nunhwano ngapapita yana inalome na ikeghe.

12 Alupakisade pakibha na yaka makome matato nunhwano, ngampapita mwana munalome akemitwa Shela. 13 Pajhomolila kumpapa Shela, Alupakisade ngatamita yaka henge miya ncheche na mitato ngapapita yana henge inalome na ikeghe.

14 Shela pakibha na yaka makome matato, ngampapita mwana munalome Ebele. 15 Pajhomolila kumpapa Ebele, Shela ngatamita yaka henge miya ncheche na mitato ngapapita yana henge inalome na ikeghe.

16 Ebele pakibha na yaka makome matato na ncheche, ngampapita mwana munalome akemitwa Pelege. 17 Pajhomolila kumpapa Pelege, Ebele ngatamita yaka henge miya ncheche na makome matato ngapapita yana henge inalome na ikeghe.

18 Pelege pahikicha yaka makome matato, ngampapa mwana akemitwa Leu. 19 Pajhomolila kumpapa Leu, Pelege ngatamita yaka henge miya ibhele na ticha ngapapita yana inalome na ikeghe.

20 Leu pahikicha yaka makome matato na mabhele, ngampapita mwana munalome Seluge. 21 Pajhomolila kumpapa Seluge, Leu ngatamita yaka henge miya ibhele na chaba, na ngapapita henge yana inalome na ikeghe.

22 Seluge pahikichika yaka makome matato, ngapapita mwana munalome Naole. 23 Pajhomolila kumpapa Naole, Seluge ngatamita yaka miya ibhele na ngapapita henge yana inalome na ikeghe.

24 Naole pahikicha yaka makome mabhele na ticha, ngampapita mwana munalome Tela. 25 Pajhomolila kumpapa Tela, Naole ngatamita yaka henge miya jhimo likome limo na ticha, na ngapapita henge yana inalome na ikeghe.

26 Tela pahikicha yaka makome chaba, ngapapa yana inalome itato. Ulaamo na Naole na Halane.

27 Henge ndi ibheluko ya Tela, Tela ngampapa Ulaamo na Naole na Halane. Halane ngampapita mwana munalome akemitwa Luto. 28 Halane ajhomwika, kipinde tate mundo Tela patamita ku muche gwa Ule, kwabhelwikilwe. 29 Ulaamo na Naole bhakibha bhatolii akakeghe. Nhwana mundo Ulaamo akemitwa Salai na nhwana mundo Naole akemitwa Milika, Milika na Isika ikibha yana ya Halane. 30 Salai akibha ntonga, akibha jhe na mwana.

31 Tela ngantola mwana mundo Ulaamo na nchokolo mundo Luto mwana jwa Halane na Salai kamwana mundo, ngabhalongohina bhoha kubhoka Ule, kilambo cha Wakaludayo na kujhenda kilambo cha Kaanane. Nambo pubhahikita ku kilambo chuku Halane ngabhatamita kwenio. 32 Tela ngajhomwikila koko ku Halane kongo pakibha na yaka miya ibhele nu nhwano.