1 Ulaimo ngatolela jhonge mwikeghe, liina lyake akemitwa Ketula. 2 Ketula ngampapila Ulaimo yana mahina ghabhe ndi ghanga, Chimulane na Yokichane na Medane na Midiane na Ichibake na Chua 3 Yokishane ngapapa mwana Sheba na Dedane, yana ya Dedane ikibha Akashulu na Akaletuchi na Akaleumi. 4 Yana ya Medane ikibha Efa na Efeli na Enoke na Abida na Elida. Chenio kikibha ndi kibheluko cha Ketula.

5 Ulaimo ngampila Ichaka kila kilebhe chakibha nacho. 6 Nambo yana inalome yapapii mu kilaghe, ngaipila hupo, kipinde pakibha ghome, na ngaipelika yana yene mu kilambo chikibhii upande kulihumii lyobha, kutale na Ichaka mwana mundo.

7 Ulaimo ngalama yaka miya jhimo na makome chaba nhwano. 8 Ajhomwika pakubhoke mukutama yaka twe na inamota, pajhomwika ngakongina na akahoko mundo bhibhalongolile. 9 Ichaka na Ichumaile yana ya Ulaimo, ngabhanchika tate gwabhe mu linkwembe lya Makipela, lilibhii pahina na Mamule mung'onda ghukibha gwa Epulone mwana gwa Chohale Mhite. 10 Ulaimo akaemii nng'onda gwenio kubhoka kwa Akahite. Kwenio ndi kwachikwite Ulaimo na Sala nhwanamundo. 11 Ulaimo pajhomwika, Chapanga ngampila mota Ichaka mwana mundo. Ichaka atamita pahina na kilibha cha Beli Lailoi, mana jhake jwajho jwabhii ghome jwalola.

12 Henge ndi ibheluko ya Ichumaile mwana jwa Ulaimo, jwabhelwike kwa Ajile Mmichile, jwakibha mmanda mwikeghe jwa Sala. 13 Ghanga ndi mahina ghabhe kulongohana na chibhabhelwike, Nabeyote ndi mwana jwa litibho na Kedele na Adibele na Mibuchamo, 14 Mishima na Duma na Macha, 15 Adade na Tema na Yetule na Nafiche na Kedema. 16 Henge ndi yana inalome ya Ichumaile ikibha chembwe cha makabila kome na mabhele. Itamo na chenda yabhe imanyikina kwa mahina ghabhe. 17 Ichumaile pajhomwika akibha na yaka miya jhimo na makome matato na chaba, na jwenio ngagholwika pamonga na akahokomundo. 18 Ibheluko ya Ichumaile itamita panakate jha Hawila na Shuli upande kulihumii lyobha gwa kilambo chuku Michile kujhendelela ku Achulu. Bhatamita njelembo na ibheluko henge ya Ulaimo.

19 Henge ndi ibheluko ya Ichaka mwana jwa Ulaimo. 20 Ichaka pakibha na yaka makome ncheche ngatolana na Lebeka, bite Betuele jwa likabila lya Mwalamo, jhuku muche gwa Padane Alamo, Lebeka akibha nnombo mundo Labane. 21 Lebeka akibha ntonga, yene Ichaka ngannyopa Bhambo Chapanga, na jwenio Bhambo ngajhoa lujhopo lwake, Lebeka ngabhila na ndumbo. 22 Ndumbo jhenio ikibha jha mabhela. Yana yenio ngaitaungana mulutumbo lwa Lebeka na jwenio ngalonge, "Anda naha ndi chiibhile, kulama kilebhe ghane?" Peniya ngajhenda kunkonya Chapanga.

23 Na Chapanga ngannobholila Lebeka,

"Ilambo ibhele ibhii mulutumbo lwino,

makabila mabhele ghipakupapa mwenga naghakomana

Limo nalibhaha na likakala kupeta lenge,

nkolo nantumukila unung'una mundo."

24 Machiko ghake gha kupapa pighabhandikila, Lebeka ngapapa mabhela. 25 Jhukutumbula akibha nkele na yegha jhoha ikajhenii majhunjo, yene ngankema liina lyake Echau. 26 Na jhuubhele pabhelwika kongo ankamwii kiinginilo Echau, ngabhankema liina lyake Yakobu. Ichaka akibha na yaka makome chita kipinde Echau na Yakobu pibhabhelwika.

27 Yana yenio ngaukola, Echau akibha jwakuyema jwamaha. Jwapalita hake kutyangatyanga kumanayahe. Yakobu akibha jwanuu, jwapalita kutama pakajha. 28 Yene, Ichaka ngampala hake Echau nhwalo gwa kulye ipika yukumanyahe nambo Lebeka ngampala Yakobu.

29 Lichiko limo, Yakobu pakibha atelika ngonde, Echau pabhujhita mukuyema ngaika pakajha kongo abhii na njala hake. 30 Echau ngannobholila Yakobu, "Ne nhwe njala, chonde umbongolele mito nhope." Ndi nhwalo bhankema liina lya Edomo, mana jhake nkele.

31 Yakobu ngajhangwila, "Unjuluchila ote ukolo gwino yane kutumbu kubhelukwa kwino."

32 Echau palongela, "Tela! Ne mandikii kuhwe ilebhe yoha imbakupata nhwalo gwa kutumbuu kubhelekwa kwango, imba kundangatii nike?"

33 Yakobu palongila, "Unapii ote."

Bhahe, Echau nganapila na kunchuluchii ukolo gwake kubhehe jhukutumbula. 34 Yene, Yakobu ngampila Echau libumunda na ngonde. Ngalila, nganywe, peniya ngakijhendila. Yene ndi Echau chaupuchita ukolo gwake ghukutumbula kubhelukwa.