1 Peniya, Yakobu ngabhoka pamonga na ilebhe yake yoha ngajhenda ku Michile. Paikita ku Belicheba, ngampikiya litambiko Chapanga jwa Ichaka, tatemundo. 2 Chapanga ngalongela na Yakobu kilo mumaloto, ngankema, "Yakobu! Yakobu!" Yakobu ngajhekita,

"Ne pamba."

3 Chapanga ngannobholila, "Ne ndi Chapanga, Chapanga jwa tate gwino. Mangajhoghopa kujhenda ku Michile, pumpa kubhehe kwenio, mbakukitenda kibheluko chino kibhaha ndii. 4 Ne namwete nanyenda pamonga na mwenga ku Michile nu kumujhicha kabhele pamba. Pumpa kujhomoka, lubhoko lwa Uchupo ndi nalubhaha papa kugubika miho ghino."

5 Yene, Yakobu ngabhoka ku Belicheba. Yana ya Yakobu ngabhantola tate gwabhe na ilemba yake pamonga na akaanamundo mumutuka yukuhutwa ilaghilwa na Falao kujhenda kuntola. 6 Helahela ngabhatoila hele ipugho na ilebhe yabhe yoha ibhachumite kukilambo chuku Kaanane, Yakobu ngabhajhenda ku Michile. Yakobu ngaijhegha na ibheluko yake yoha, 7 yana mundo na ichokolo yake inalome na ikeghe, na kibheluko chake choha ngaileta ku Michile.

8 Ghanga ndi maina gha yana ya Yakobu ijhenda ku Michile, ku Ichilahele pamonga na bheniya ikibha Leubene, mwanamundo jwa litibho jwa Yakobu. 9 Yana ya Leubene, Enoke na Palu na Echilone na Kalome. 10 Chimeone na yana yake, Yemuele na Yamine na Ohade na Yakine na Sohale na Saule, yapapii kwa mwikeghe kuhuma ku muche gwa ku Kaanane. 11 Lawe na yana yake, Gechone na Kohate na Melale. 12 Yuda na yana yake, Ele na Onane na Sela na Peleche na Zela. Nambo Ele na Onane ngaijhomwika kukilambo chuku Kaanane. Yana na Peleche ikibha Echilone na Amule. 13 Ichaka na yana yake, Tola na Puva na Yachubu na Shimulone. 14 Zebulone na yana yake, Selede na Elone na Yaleele. 15 Yenio ndi yana ya Leya yapapita kwa Yakobu kola ku Padane Alamo pamonga na Dina mwanamundo. Jumula ya ichokolo yake yoha ikaikii makome matato na itato

16 Gade na yana yake, Sifione na Hage na Shune na Esibone na Ele na Alode na Aleli 17 Ashele na yana yake, Imuna na Isiwa na Isiwe na Beliya na Sela nnombomundo. Beliya yanamundo ndi Ebele na Melikiele. 18 Bhamba ndi yana na ichokolo kome na chita ya Yakobu yapapita na Zilipa ntumiche, Labane jwampila Leya, mwanamundo.

19 Lahele ngampapila Yakobu yana ibhele inalome, Uchupo na Benjamine. 20 Kwenio ku Michile, Asanate na kamwale Potifela, jwakibha mpiya litambiko jwa kilambo chaku One, ngampapila Uchupo yana ibhele inalome, Manache na Eulaimo. 21 Yana ya Benjamine ikibha Bela na Bekele na Ashibele na Gela na Namane na Ehi na Loshe na Mupimu na Upimu na Alide. 22 Bhando bhamba kome na ncheche ndi yana na ichokolo ya Yakobu na Lahele, nhwanamundo.

23 Mwana jwa Dane ndi Ushimo. 24 Nafutale na yana yake Yaseele na Gune na Yesele na Shilemo. 25 Bhando bheniya chaba ndi yana na ichokolo ya Yakobu na Biliya ntumiche, Labane jwampi kamwale jwake Lahele.

26 Yana ya Yakobu na ichokolo bhake yoha yaijhenda na Yakobu ade ku Michile, changabhalangii achikabhana bhake, ikibha bhando makome chita na chita. 27 Kwenio kukilambo chuku Michile Uchupo ngapapa yana inalome ibhele. Bhando bhoha bhu lungolo lwa Yakobu ikajhingii ku Michile ikibha makome chaba.

28 Yakobu ngantumita Yuda alongolele kunnyopa Uchupo bhakongane ku Gochene. ngabhaikita ku Gochene. 29 Uchupo ngaobhoke mutuka jhake jhihutwa na falache, ngajhenda kumpokela Yakobu, tatemundo, kwenio ku Gochene. Panheghilila tatemundo, ngankumbatila na kulela hake. 30 Yakobu ngannobholila Uchupo, "Ata nganyomwoke deleno kilebhe jhe nhwalo nimwene kumiho jhino nu kumanya kubhehe mwe mmii ghome!"

31 Peniya, Uchupo ngabhalobholila akanung'una na akalongo mundo bhoha bha tatemundo, "Nyenda kunnobholela Falao kubhehe akanung'una bhango na akalongo bhoha bha tategwango bhibhakibha kukilambo chuku Kaanane ngohe bhaikite kwango. 32 Naninnobholela mangota ndi akalucha nu kubhehe nhwikingine pamonga na mbuhe na mambelele na ng'ombi na ilebhe ino yoha. 33 Bhahe, Falao andankemingine nu kukonyangana, ‘Lihengo lino nike?’ 34 Munnobholela, ‘Twakatumiche bhino tukibha tuluchita ipugho kutumbulii uhwana gwito ade deleno, yene ndi chibhakibha akaokolo bhito.’ Nnongela nahela kupala annyeketele kutama chehemo jhaku Gochene." Uchupo alongela gheniya nhwalo Akamichile bhapaijhe kutama na bhibhalucha.