1 Pihikita kimiye akatumiche bheniya bhabhele bha kunane kwa Chapanga ngabhaika ku Sodoma. Luto akatamite pannyango nkolo gwakujhingilila muche gwaku Chodoma. Pabhabhona ngajhinuka na kujhenda kwapokela na ngalita kwa ichima, 2 ngalongela, "Akanahota bhango nhwikengane pakajhango ne natumiche bhino. Ngholola magholo ghino nukugholoka unyumba jha natumiche gwino dele kilo, kilabho putepute mihoto kujhendelela na mwanja gwino."

Nambo bhene ngabhalongila, "Nahi jhe! Twe natugholoka palubhanja pano."

3 Luto ngabhapembikiya hake, na paligha ngabhajheketila kuheghele kajhake na kujhingi unyumba kupala bhagholoke. Luto ngabhalenganikila chakulya. Ngajhocha mabumunda jhangaleke ngedule. Na bhene ngabhalila

4 Nambo kilo nakugholoka jhe, akanalome bhoha bha muche gwa ku Sodoma na achikangombo na ighoghololo nakuhighalika jhe hilu jhumo, ngabhaitindikiya nyumba jha Luto tii ngote. 5 Ngabhankema Luto nukunkonya, "Bhajhingii kojhe akanalome bhibhabhetwikii uhiko pakajhino pano? Mwapiyengane panja twe tupala kugholoka nabho."

6 Luto ngapitita panja na ngadinda nnyango kihengauyuma, 7 ngalongila, "Makalongo bhango, chonde ninyopa mangatendangana jhe ubhoho gwenio. 8 Dola, pamba ngwete achikabhale bhabhele bhamela bhinagholoka jhe na munalome. Mbaha nimpelengane bheniya mwatende chimupala. Nambo mwangatendele jhe chochoha akanalome bhamba nhwalo akaghene bhango."

9 Nambo bhene ngabhalongila, "Bhokela oko, mwe maghene! Mwe mihoto bho kutulongelela twe chitupala kuhenga? Bhahe, natuntendela kilebhe kibhoho hake kupeta akaghene bhino." Peniya ngabhankangila Luto unyuma pahina nukubomo nnyango gwake. 10 Nambo akaghene bheniya ngabhatondobhiya mabhoko ghabhe nukuhutii Luto nkate jha unyumba jhake na kudinda nnyango. 11 Peniya, akaghane bheniya ngabhabhulita ulwalo gwa ngalola bhando bhoha bhubhakibha pannyango gwa nyumba jwenio, akanahota kwa achikakombo, yene bhakauwe ng'o nnyango.

12 Bhando bhala bhabhele ngabhanobholila Luto, "Bho, abhii mundo jhonge pamba, yana ino na achikabhale na achikabhana bhino na akalongo bhino bhange bhubhabhii umuche ghongo? Mwapiye kajhombe pamuche pano, 13 nhwalo Bhambo atutumite kukomelekeya muche ghongo, mana kukokoleka kwa bhando pamba kujhokanikike kukolongwa hake na ghanhikilile Bhambo, jwenie ndi atutumite kuika kukomelekeya."

14 Bhahe, Luto ngabhajhendila achikabhana mundo kwalobholela,

"Mmokengane kajhombe pamuche ghongo, Bhambo apakukomelekeya." Nambo bhene ngabhammona alonge ubhiche tu. 15 Putepute, akatumiche bheniya bha kunane kwa Chapanga, ngabhanyendila Luto kunnobholela, "Ntenda kajhombe, mutole aanabhino na achikabhale bhino bhabhele bhubhabhii pambano nakutenda yene nakomelekelwa pamonga kipende muche ghongo puukomeekelwa." 16 Peniya Luto ngabhila na kiyoto kubhoka. Nambo Bhambo nhwalo akankolii Kiya Luto, akatumiche bheniya ngabhankamuu lubhoko jwenie na nhwana mundo na longe lubhoko yana mundo ibhena, ngabhapiya panja jha muche gwenio. 17 Pibhapiita panja jha muche, ntumiche jhumo pakate jha bhala bhabhele ngabhalobholila, "Ntilangane kupala mughombole ughome gwino! Mangaghalambuka jhe unyuma hilu kujhema pandika! Mutukile ku kwiitombe anda jhe nakomelekelwa papa."

18 Luto ngalongila, "Nai jhe, chonde manahota bhango, mangandende jhe yene. 19 Ndi chakaka kubhehe ne natumiche gwino mbatite kujheketelwa palonge jhino, na mangota umonii kiya na kughombo ughome gwango. Nambo nhotwi jhe kutilii kwiitombe nhwalo ndi kutale, lukomelekelo lwenio nalungolela nakuika jhe kwenio nanenga nahwa. 20 Dola, pabhii na muche nchokombe pahina kwenio nhotwii kutilila. Uneke ndilile kwenio, na kwenio namaa njelembo."

21 Jwenio nganyangwila, "Tela, nnyeketile kujhopa kwino nikikomelekeya jhe muche gwenio chenio ghumulongela. 22 Aya nnyomboteke! Mmutikila kwenio. Ne nitenda hote jhe kilebhe chochoha ade pumpakuika."

Yene, muche gwenio ngaukemwa Choale, mana ghake, "Ukepa."

23 Lyobha pulipitita Luto akibha aikite ku muche gwaku Choale. 24 Peniya Bhambo ngauluya mwoto nkale na maghanga ghighajhaka gha balute pamuche gwaku Sodoma na Gomola kubhoka kunane kwa Chapanga, 25 ngaijhochita miche jhene na ndika jhoha, na bhando bhoha na mikongo jhoha jhimelite pannema jha muche gwenio. 26 Nambo nhwana mundo Luto jwakibha unyuma jha Luto, ngalolita unyuma papa ngaghalambwika na kubhehe lighanga lya mwinyo.

27 Lukela pe lichiko lilikengima, Ulaimo ngajhimuka na kujhenda chehemo pakajhemite palonge jha Bhambo. 28 Pakibha pena, ngalola upande gwa ku Sodoma na ku Gomola na chehemo jhoha jha lulambo, ngahechwika kubhona malyoi matopau ghakauka, malyoi gha mwoto nkolongwa. 29 Nambo Chapanga paikomelekeya miche jhibhii mululambo mwatamita Luto, ngankomboka Ulaimo kwa kummoa Luto mu miche jwenio, kupala akoto kukomelekelwa pamonga na miche jhenio jha Sodoma na Gomola.

30 Luto ngajhoghopa kutama ku muche gwa ku Soale, yene ngaama muche gwenio pamonga na achikabhale bhake bhabhele, ngabhajhenda kutama mukwembe kwiitombe. 31 Lichiko limo pakibha kwenio kamwale nkolo ngannobholila unung'una, "Tate gwino aghoime, na abhii jhe munalome jhukututolela twenga mu kilambo chenje chitutama kupala tupape yana. 32 Deleno tunkenge divaye jhibhabha anyweghe ade alobhele, kubhoke peniya tugholoke nako kupala tupate yana lukolo lwito tujhonjekeke." 33 Kilo jhenio ngabhankengita tate gwabhe divaye jhibhabha ngalobhila na kamwale nkolo jhola ngajhenda kugholoka nako tate mundo, nambo tate mundo akamanyii jhe hilu pabhokita.

34 Kilabho jhake kamwale nkolo ngannobholila unung'una, "Nanjino dicho kilo ng'olwike nako tate gwango. Na deleno hele tunkenge divaye jhibhabha, peniya makagholoke nako mwenga, tuhoto kujhonjekeya lukolo lwito kwa kupata yana." 35 Na kilo ghola hele naha ngabhankengita divaye jhibhabha tate mundo na kamwale nchoko jhola ngajhenda kugholoka nako. Na tate mundo akamanyite jhe pagholwika hilu pabhokita kamwale. 36 Yene, achikabhale bheniya bha Luto bhoha bhabhele ngabhabhila na ndumbo kwa kugholoka na tate gwabhe. 37 Kamwale jhola nkolongwa ngapapa mwana munalome, ngankema liina lyake Moabo. Jwenio ndi tate jwa likabila lya Akamoabo ade deleno. 38 Unung'una ngapapa mwana ngankema Bene Ame, jwenio ndi tate jwa likabila lya Akaamone ade deleno.