1 Peniya ngaipitila njala mu kilambo chenio, njala jhenio ikibha ngolongwa kupeta njala jhipitila kipinde cha ughome gwa Ulaimo. Ichaka ngajhenda ku muche gwa ku Gelale kwa Abemileke munahota nkolongwa jwa Akafiliste. 2 Bhambo Chapanga ngampitii Ichaka nu kunnobholela, "Mangajhenda jhe ku Michile, nambo ntama mu kilambo chimbakunnobholela. 3 Ntama mu kilambo chenio kwa machiko ghandina, nane nama pamonga na mwenga nukumpe mota. Mana mbakumpe mwenga na ibheluko ino ilambo yenio yoha. Mbakulenganikiya lilaghano linabheka na tate gwino Ulaimo. 4 Mbakujhonjekeya ibheluko ino ibhaha mbwe ngita ndondo ya kunane kwa Chapanga na kwape ilambo henge yoha. Kubhoke mu ibheluko ino ilambo yoha pannema naibhaha na mota. 5 Mbakumpe mota, nhwalo Ulaimo akatembekii na kunyokanikiya na ngakamwila malaghalikilo ghango na mihilo jhango."

6 Peniya Ichaka ngatama ku muche gwa ku Gelale. 7 Bhando bha ku Gelale pubhankonya panane jha nhwanamundo ngalonge, "Bheniya alombo bhango." Nhwalo ajhogwipa kulonge nhwanamundo, abhajhogwipa akolo muche kunkoma kwa nhwalo jha Lebeka, mana Lebeka akibha lembulembu hake. 8 Ichaka ngatamita pala machiko ghamahele, Abimeleke munahota nkolongwa jwa Akafiliste ngalingulii palidilicha ngammona Ichaka ankumbatii Lebeka nhwanamundo. 9 Abimeleke ngankema Ichaka na kulonge, "Aka aanabhino! Nhwalo gwa nike nnongila nnombo gwino?"

Ichaka ngalonge, "Nhwalo nyogwipa mangota naundenda kungoma na kuntola nhwana gwango."

10 Abimeleke ngankonya, "Chenio ndi kilebhe ghane chimututendile? Jhumo jha bhando bhango ngahotwi kugholoka na nhwanagwino, kabhele ngamutujhingiye mu malemwa." 11 Peniya Abimeleke ngalaghalikiya bhando bhoha kulonge, "Mundo jhojhoha jwapakunkunyu mundo ojho amu nhwanamundo, jhono nakomwa."

12 Chaka cheche Ichaka ngapanda mbejho mu kilambo chenio, ngauna mala miya chapandita, nhwalo Bhambo Chapanga akampii mota. 13 Ichaka ngabhila jhuna ilebhe mbwe. Ngachocha kubhehe na ilebhe mbwe hake. 14 Akibha na malongo gha mambelele na ng'ombi na akatumiche twe ade Akafiliste kummonela wiho. 15 Yene Akafilisite ngabhayelila ilibha yoha ya mache ibhahembita akatumiche bha Ulahimo, pala Ulahimo pakibha ghome.

16 Peniya Abimeleke ngannobholila Ichaka kubhehe, "Mmoke pakilambo chito, nhawalo mwe mutuchochite hake kwa makakala." 17 Bhahe, Ichaka ngabhoka kwenio ngabheka kighono mululambo lwa Gelale. 18 Ichaka ngahembulina kabhele ilibha ikibha kipinde cha tate mundo Ulaimo pakibha ghome, ilibha ibhayelila Akafiliste kubhoke pukujhomoka Ulaimo. Ichaka ngaikema mahina ghagha gha tate mundo.

19 Yene akatumiche bha Ichaka ngabhaemba pa lulambo ngabhakolela mache. 20 Nambo akalucha bhuku Gelale ngabhang'aulina na akalucha bha Ichaka kwa kulonge, "Mache ghanga ndi ghito." Yene Ichaka ngakikema kilibha chenio Eseki, mana jhake, "Kung'aulana."

21 Akatumiche bha Ichaka ngabhahemba chenge kilibha, na chenio hele ngabhang'aulina, yene Ichaka ngakikema kilibha chenio Sitina, mana jhake, "Kung'aulana." 22 Bhahe, Ichaka ngabhoka peniya ngajhenda kuemba chenge kilibha chehemo jhenge. Nambo chenio ngabhang'auline jhe. Yene Ichaka ngakikema kilibha chenio, Leobote mana jhake pwache. Kulonge, "Ngohe Bhambo Chapanga atuleki pwache tukonde pa kilambo chenje."

23 Ichaka ngabhoka kwenio nu kujhenda ku muche gwa ku Belicheba. 24 Kilo jhela Bhambo ngampitii nu kulonge, "Nenga Chapanga jwa tate gwino Ulaimo. Mangajhoghopa jhe, mi pamonga na mwenga, mbakumpe mota nu kujhonjekeya ibheluko ino kwa Lilaghano limekita na Ulaimo, ntumiche gwango." 25 Yene Ichaka ngachenga kachangwale kamaghanga kakupiya litambiko kwenio nukunyinamila Bhambo Chapanga. Ngabheka kighono kwenio, na akatumiche bhake ngabhahemba kilibha chenge.

26 Abimeleke pamonga na nkoche gwake Ausate na Fikole jwakibha nkomana ngondo nkolongwa ngabhabhoka ku Gelale, ngabhannyendila Ichaka. 27 Ichaka ngabhakonya, "Mbone nhwikite kajhango, mangota mindenda kunjimwa na undei kumenga kwino?"

28 Bhene ngabhajhangwila, "Ngohe tumanye hotuhotu kubhehe Chapanga abhii pamonga na mwenga. Kwa yene tuwacha ngaibhii mbone tulapilane nu kubheka lilaghano, 29 kubhehe namutubhengwa jhe na twe helahela natumengwa jhe. Nambo ghumuntendi ghambone, ngatunneka nnyende kwa uteeke, changantenda kilebhe chochoha kibhoho mwe Bhambo Chapanga ampii mota." 30 Ichaka ngabhantendila kaunyagho, na bhena ngabhalila nu kunywegha. 31 Kilabho jhake ngabhajhimuka putepute ngabhalapilina. Kubhoke peniya Ichaka ngabhachindikicha na kutabhukana kwa uteeke.

32 Lichiko lele akatumiche bha Ichaka ngabhaika nu kunnobholela nhwalo gwa kilibha chenio chibhaembita kubhehe, "Tughakolii mache!" 33 Peniya Ichaka ngakikema kilibha chenio Shiba, mana jhake, "Kulapilana." Yene muche gweno ukemwa Belicheba ade ngohe.

34 Echau pahikicha yaka makome ncheche, ngatolela matala likabila lya Akaite, Yudithi bite Beli na Basemate bite Elone. 35 Akakeghe bheniya ngabhantenda utamo gwa Ichaka na Lebeka kubhehe mungolongonde.