1 Bhambo ngannobholila Nuho, "Nnyingile mu mele mwenga pamonga na bhando bhapakajha pino bhoha, nhwalo mwenga ndi jhuninyeketile palonge jhango kupeta bhando bhoha bhubhabhii ngohe. 2 Nnyingiya inyama ya kila namuna ijheketelwa palonge jha Chapanga, chaba yankambako na chaba yankolo, nambo inyama yangajheketelwa palonge jha Chapanga ntola ibheleibhele yankambako na yankolo ibheleibhele. 3 Hele nnyingiya ijhune ya kunane ya kila namuna, yankambako na yankolo, yankambako ibha chaba na yankolo chaba kupala mwitunje ibhaha ghome pannema. 4 Kwa mana pighapeta machiko chaba, mbakuleta hula ikoma machiko makome ncheche muhe na kilo, na kila chikibhii ghome chinikipangine pannema nanikikomelekeya njwe." 5 Nuho ngateila ghoha telatela ngita chanaghalikiya Bhambo Chapanga.

6 Kipinde nnema puyekulilwa na mache twe, Nuho akibha na yaka miya chita. 7 Nuho na unaamundo na yana yabhe pamonga achikabhana mundo ngabhajhingila mu mele kujhepa nnema kuyekelelwa na mache twe. 8 Na inyama ijheketilwe palonge jha Chapanga na inyama yangajheketelwa palonge jha Chapanga na ijhune yukunane ibheleibhele na ihumbe yoha ikwabha panane jha nnema, 9 ibheleibhele yankambako na yankolo, ngaijhingila mu mele pamonga na Nuho ngita Chapanga chanaghalikiya. 10 Kubhoke pa machiko chaba, mache twe ngaghayekelila nnema.

11 Nuho pakibha na yaka miya chita, lichiko lya kome na chaba lya mwehe gwubhele, lichiko yene yembwe yoha ibhii pahe ngaitumbwila kupiya mache, na kubhoka kunane kumahunde ngiikoma kanonoha hula. 12 Hula ngaikomita pannema machiko makome ncheche muhe na kilo. 13 Lichiko lele hula puitumbwila kukoma Nuho na yana mundo Shemo na Amu na Yafete na akaana bhabhe ngabhajhingila mu mele. 14 Ngabhajhingila bhene pamonga na kila inyama yukumanyahe na kila inyama ikolekwa na kila inyama ikwabha na ijhune ya kila namuna. 15 Ngabhajhingila nkate jha mele pamonga na Nuho, ihumbe ibheleibhele ya kila namuna ibhii ghome. 16 Inyama yenio ngaijhingila ya namuna jha yankolo na yankambako ngita Chapanga chanaghalikiya Nuho, peniya Bhambo ngadindita nnyango mbu.

17 Bhahe, mache twe ngaghajhendilela kwa machiko makome ncheche. Mache ngaghajhonjikika kubhehe twe na kuijhinula mele na jhenio ngaitumbula kujhebhela. 18 Mache ngaghajhendelela kujhonjekeka hake pannema na mele ngaijhebhila panane jhake. 19 Mache gheniya ngaghatwelila hake pannema ade kuimila itombe itandamaho yoha iibhi pannema. 20 Mache pighahelwika ade itombe itandamaho ngimilwa na kuika mita chaba na nucho. 21 Ku yene, ihumbe yoha ikibha ghome pannema ngiwila. Ijhune na inyama yukukoleka na inyama yukumanyahe na kila ihumbe ikwabha na bhando bhoha, 22 chakaka, ihumbe yoha ikibha ghome pannema ngiwila. 23 Chapanga ngakomelikiya yoha inaughome pannema. Bhando na inyama na ihumbe ikwabha na ijhune yukunane. Ngaighala Nuho ndo na bhala bhakibha nako pamonga mumele. 24 Mache ghakahighalika pa nnema kwa machiko miya jhimo nu nhwano.