1 Uchupo ngannaghila nnonda jwa nyumba jhake kukulonge, "Ntwele yakulya mumahako gha bhando bhamba tela na chibhahoto kughegha. Peniya, mmeka mbijha gwa kila mundo mulihako lyake. 2 Peniya, bheka kikombe chango cha madine gha feza mulihako lya mwana nnchokombe, pamonga na mbijha yake." Nnonda jwenio ngateila ngita chilaghilwa na Uchupo. 3 Pukuchila tugha, bhando bheniya ngabhalekwa bhajhende pamonga na maponda ghabhe. 4 Pibhabhoka pabomane bhajhendikii jhe, Uchupo ngannobholila ntumiche jhake, "Jhomboteka! Makengame bhando bheniya, pimapa kwakolela, makonye, ‘Kunike nnepite ghanganandela kwa ghambone? 5 Nhwalo ghane nkwatwii kikombe cha madine gha feza cha anahota bhango? Bho, chenje ndeka chanywele anahota bhango nu kulondolela? Nnemwingine hake kukutenda yenio!’ "

6 Nnonda jwenio pabhakolila ngabhalobholila malobhe gheniya. 7 Nambo bhene ngabhankonya, "Anahota, mmii nama ghane kutulonge malobhe ngita gheniya? Twenga akatumiche bhino tuhoto jhe kuhenga kilebhe ngita chenio! 8 Nkombokela, manahota, mbijha itukolila mumahako ghito, ngatubhujhicha kuhumii mu kilambo chuku Kaanane. Naibhabhole tukwatuu mbijha amu chaabo munyumba jha anahota bhino? 9 Ngohe, anda mundo jhojhoha panakate jhito abhii na kikombe chenio, akomwa na bhange twenga natubhaha akabhanda bhino."

10 Nnonda jwenio ngalonge, "Tela, ibhehe ngita chinnongii. Pakate jhino jhojhoha jhumbakunkolela na kikombe chenio, nabhaha mmanda jwango, nambo mabhangemwe nannekekelwa." 11 Kila mundo ngauluya kajhombe lihako lyake nu kuhatambula. 12 Peniya, nnonda jwenio ngahambwila kila lihako, ngatumbuu lya nkolo gwabhe nu kujhomolela. Kikombe ngibhakikolila mulihako lya Benjamine. 13 Peniya, ngabhajwepwila ngobho yabhe kwa lipyanda. Kila mundo ngalitweka liponda lyake nhwigho nu kubhujha kubomane.

14 Yuda na akalongo mundo ngabhaika pakajha kwa Uchupo na jwenio akibha papa, peniya ngabhannyinamila palonge jhake, 15 Uchupo jwenio ngabhakonya, "Nhwalo ghane ntei yene? Bho, mmanyijhe namundo anda nenga ngwete uhotolo ghu kulondola?"

16 Yuda ngalonge, "Tulongela kilebhe ghane anahota? Tulongila kilebhe ghane kulangii tukwete jhe lilemwa? Chapanga aghamwene malemwa ghito, twe akabhanda bhino. Ngohe twabhoha tubhii, twenga akabhanda bhino, twenga pamonga na jwajho jhumunkolii na kikombe chino."

17 Nambo Uchupo ngalonge, "Ijhe! Nenga nitenda jhe gheniya! Jhola tugha jhuninkolii na kikombe chango ndi nabhaha mmanda jwango. Mangota bhange mihoto kujhenda kwa uteeke kwa tate gwino."

18 Yuda ngammandikila Uchupo nukulonge, "Manahota, nijhopa natumiche bhino, nonge namwe nhwalo gwandina, chonde ninnyopa manganjimwa jhe, nhwalo mwe ngita Falao jwene." 19 Manahota mwe ngamutukonya, Bho, tukwete atatebhito amu unung'una bhito? 20 Natwe ngatujhangwila hena, Tukwete atate abhi ghome na aghoime, nu tukwete unnung'una gwito jhonge jwabhelwike mughohe. Nhwacha mundo ajhomwike na jwenio unnung'una ndi nganjika jwaighalile kwa majhe mundo, na tate mundo ndi antenda nkongocho gwake. 21 Manahota, ngamutulaghila twe akatumiche bhino, tunnete jwenio kupala mummone. 22 Ngutulonge, kangombo jwenio ahotojhe kunneka tatemundo, mana anda atei yenio, atate mundo kuwegha. 23 Nambo manahota ngammutulonge kubhehe nu kuhika jhe unnung'una gwito jwenio, namutupoke jhe kabhele.

24 Putubhujhita ukajha kwa tate gwito, ngatunnobholila ghumutulaghila, manahota. 25 Peniya, tate gwito ngatulaghila tuike kabhele kuheme chakulya. 26 Nambo ngatunnobholila, Tuika jhe, pange tu anda unng'una gwito natulongohana mwanja pamo na twenga, anda tulongohine pamo na mundo jwenio natupoke ng'o. 27 Peniya, atate gwito atumiche bhino, ngubhalonge, Umanyingine kubhehe aanabhango Alahele akambapiii yana ibhele inalome, 28 jhumo ngahobhalila kilambo, nenga nganongila, pange jhe ahanjaline ni kinyama chukumanyahe, mana abhonikine jhe kabhele. 29 Mipalakuntola na mwana ojho, jwenio anda alegwite hele, mmanya naunjika umambe kwa lipyanda na ughogholo gwango. 30 Yene, manahota anda mujhite kwa tate bhango ntumiche gwino changa mwana ojho, na tate mwojho ghoha ubhii kwa jwenio, 31 anda alolite mwana jwenio abhii jhe na twenga, nahwa! Yene, twe twakatumiche bhino, natunkoma tate gwito kwa ungolongonde. 32 Namwete nantumiche bhino nganongila naninnonda mwana jwenio kwa uchakaka, anda nu kummujhiche jhe Benjamine kwino, lukokoleko lubhaha kwa nenga, machiko ghoha ghangapeta. 33 Ngohe, manahota, chonde ninnyopa, nhighale mme nabhanda kuliko mwana ojho. Munneke jwenio abhujhe kajha pamonga na akakolo mundo. 34 "Nanhotola bhole kwabhujhii atate bhango changa kangombo jhonjone? Ninhoto jhe kuimbilila ungolongonde ghupakunkolela tate gwango."