1 Peniya, pukutumbula, Chapanga ngapangina kunane kwa Chapanga na nnema. 2 Nnema ukibha ubhonikina jhe ngita chiubhonekana ngohe na ukibha gwa hele na lubhendo lukibha luyekilii panane jha ilendela ya mache. Na Uhuke gwa Chapanga ngajhobhatila panane jha mache. 3 Chapanga palongila, "Lubhehe lumule," na lumule ngalupitila. 4 Chapanga ngalubhonita lumule lwambone, peniya, ngabhaghanicha lumule na lubhendo. 5 Chapanga lumule ngakemita, "Muhe," na lubhendo ngakemita, "Kilo." Ngaibhila kimiye ngaibhila, lukela lichiko lyukutumbula.

6 Peniya, Chapanga palongila, "Ibhehe pwache ibhaghanicha mache gha pahe na gha kunane." 7 Yene, Chapanga ngateila jhenio pwache ibhaghanicha mache gha kunane na kubhaghanicha mache gha pahe, ngaibhila yene. 8 Chapanga ngalikemita kunane kwenio, "Kuhanga." Na ngaibhila kimiye na ngaibhila muhe, lichiko lyuubhele.

9 Chapanga ngalongila, "Mache ghighabhii pannema ghakongane pamonga, na kilambo kijhomo ngakipitila." Ngaibhila yene. 10 Chapanga chehemo jhenio ngakemita, "Kilambo kijhomo." Na mache ghighakongine pamonga ghala ngakemita, "Mbwane." Chapanga ngalola kubhehe kuhalala. 11 Bhahe, Chapanga ngalongila, kilambo chenio kimeleka mimeya. "Mikongo jhipambika uhohe hina mbejho." Ngaibhila yene. 12 Peniya, kilambo chenio ngakimelita mimeya jhipambika mbejho kwa namuna jhake na mikongo jhipambika uhohe kwa namuna jhake. Chapanga ngaibhonita yene kubhehe kuhalala. 13 Bhahe, ngaibhila kimiye, ngaibhila lukela lichiko lyuutato.

14 Chapanga palongila, "Pabhaha lulanga kunane lubhaghanicha muhe na kilo, ilangiye ipinde na machiko na yaka, 15 mule yenio ilangala kunane na kumulikila nnema." Ngaibhila yene. 16 Bhahe, Chapanga ngapangina mule ngolongwa ibhele, lukolongwa yane lyobha ling'anyima muhe na luchokombe yane mwehe lung'anyima kilo, hele ngapangina ndondwa. 17 Chapanga ngaibhekita mule yene kululanga imulikila nnema, 18 kupala ing'anyima muhe na kilo, nakubhaghanicha lumule na lubhendo. Chapanga ngabhonita kubhehe kuhalala. 19 Ngaibhila kimiye, ngaibhila lukela lichiko lya ncheche.

20 Chapanga ngalongila, "Umache itwelela ihumbe ghome ndii yangalandana na ijhune imbuluka kunane." 21 Bhahe, Chapanga ngapangina ihumbe ikoloikolo hake na yoha itama umbwane na ngapangina ijhune ya namuna jhoha. Chapanga ngabhonita kubhehe kuhalala. 22 Chapanga ngaipila mota ihumbe yoha palongila, "Ihumbe yoha umbwane ibhelekana na kubhehe ndii, na ijhune ijhonjekeka pannema." 23 Ngaibhila kimiye, ngaibhila lukela lichiko lya nhwano.

24 Chapanga palongila, "Pannema pabhehe na ihumbe ghome ya kila namuna, yane inyama ya kukoleka, ikwabha na inyama yukumanyahe." Ngaibhila yene. 25 Yene, Chapanga ngapangina inyama ya kila namuna ya kumanyahe, inyama ikolekwa na ikwabha yoha. Chapanga ngalola kubhehe kuhalala.

26 Peniya, Chapanga ngalongila, "Ngohe tumombe mundo alandane na twenga na abhehe anda twenga, bhakalongoche homba yukumbwane na ijhune yukunane na inyama yukukolekwa yoha na ihumbe yoha ikwabha pannema." 27 Bhahe, Chapanga ngapangina mundo jhukulandana najwene, na kukulandana na Chapanga ngapangina munalome na mwikeghe. 28 Chapanga ngabhapila mota nu kulonge, "Mmelekane mukajhonjekeke na kubhehe ndii mukautweleya nnema nu kuilongocha homba yumbwane na ijhune yukunane na kila kihumbe chikibhii ghome pannema." 29 Peniya, Chapanga ngalongila, "Jhokanikiya, nimpela kila mmeya ghupambika uhohe hina mbejho pannema na kila nkongo ghupambika uhohe hina mbejho yake kibhaha chakulya chino. 30 Nambo inyama yoha pannema na ijhune yukunane na ilebhe yoha ikwabha yane kila kihumbe ghome chakulya chabhe nakibhaha mahamba ghoha gha mimeya." Ngaibhila yene. 31 Chapanga ngakilolita kila kilebhe chakipangine kubhehe kihalanao hake ngaibhila kimiye, ngaibhila lukela, lichiko lya chita.