1 Peniya Chapanga ngannobholila Ulaamo, "Mmoke pa kilambo chino na mwaleke akalongo bhino na nyumba jha tate gwino na nnyende pa kilambo chimbala kunangiya. 2 Mwenga mbakummeka mme na ibheluko mbwe na bhene nabhamanyikana hake na mwenga namma na mota na hele nantenda umanyikane na kwape mota bhando.

3 Nanapela mota bhoha bhibhampe mota.

Jwapala kunapanikii nane nanalapanikiya.

Na bhando bhoha pannema nabhapata mota kupete mwenga."

4 Yene, Ulaamo ngabhokita ngita Chapanga channobholila na jwenio Luto ngabhajhawila pamonga. Ulaamo pabhokita ku Halane pakibha na yaka makome chaba nu nhwano. 5 Ulaamo ngabhokita nuhwana mundo Salai na Luto mwana jwa unnung'umundo Halane niilebhe yake yoha pamonga na bhando bhoha bhibhapatita kwenio ku kilambo chuku Halane. Ngabhabhoka kujhenda ku kilambo chuku Kaanane.

Pibhaikita ku kilambo chuku Kaanane, 6 Ulaamo ngapeta panakate jha kilambo chenio ngaikita ku Shekemo, chehemo jha nyahinyahi, pankongo nkolongwa ghukemwa Mwalone gwa Mole. Kipinde chenio Akakaanane ndi akakolo kilambo chenio. 7 Peniya, Bhambo Chapanga ngampitila Ulaamo ngannobholila, "Ibheluko hino nanikipela kilambo chenje." Yene, Ulaamo ngachengita kachangwale kanyahinyahi kamaghanga, pena kunhwalo Bhambo jwampitile. 8 Kubhoka kwenio ku Shekemo, Ulaamo ngajhenda kulihumii lyobha mwitombe ya muche gwa ku Betele ngachenga kichimba chake kwenio, ku Betele ibhii kulitipikii lyobha na muche ghuku Ai ubhii kulihumii lyobha. Kwenio hele Ulaamo nganchengila Bhambo kachangwale kanyahinyahi kamaghanga na kunnyinamila Bhambo Chapanga. 9 Peniya, Ulaamo ngajhendilila na mwanja gwake upande gwa lubhoko lwa ngejha.

10 Kipinde chenio mu kilambo chenio chuku Kaanane pakibha na njala ngolongwa hake, yene Ulaamo ngahelila kujhenda kutama kwa kipinde chandina. 11 Ulaamo pabhandikila ku Michile pannobholila nhwana mundo kubhehe, "Manye mwe, ntei kualala hake. 12 Akamichile pibhammona nabhalonge, ‘Ojho ndi nhwana mundo,’ peniya, mmanya nabhangoma nenga na kunneka mwenga maghome. 13 Chonde nnongele, nenga mwe malombo bhango, ibhe mbaha kwanenga, kupala me naghome kwa nhwalo gwino mwenga." 14 Bhahe, Ulaamo paika ku Michile, Akamichile ngabhammona Salai kubhehe atei kuhalala hake. 15 Akatumiche bha Falao pabhamona Salai ngabhannumbalila kwa Falao. Peniya, Salai ngapelikwa kajhake Falao. 16 Kupete kwa Salai, Ulaamo ngabhantendila ghambone nukumpe ng'ombi na mambelele na maponda na ngamiya na akatumiche akanalome na akakeghe.

17 Nambo Bhambo ngannetila mabulo makolongwa Falao na bhando bhoha bha pakajhake kwa nhwalo gwa Salai aana bha Ulaamo. 18 Falao ngankema Ulaamo na kunkonya, "Mwe, ntei kilebhe ghane? Bho, nhwalo ghane unobholii jhe kubhehe Salai nhwana gwino? 19 Nhwalo gwa nike nnongila nnombo gwino ade nganintolila kubhehe nhwana gwango? Ngohe, aanabhino ndi bheniya matole mmoke nako!" 20 Peniya, Falao ngabhalaghalikiya bhando bhake, kunchindikicha Ulaamo pamonga na nhwana mundo na ilebhe yoha yakibha nayo panja jha Michile.