1 Chapanga ngampila mota Nuho na yana mundo ngannobholila, "Mkabhelekane nnyonjekeke na mukaitweleye nnema. 2 Inyama yukumanyahe na ijhune yukunane, kila kihumbe chikikwabha na homba yoha kumbwane, bhoha nabhabha mukindendeke gwino na bhene nainyoghopa na kupwelela mangota. 3 Inyama yoha ghome ibhaha chakulya chino, ngita chinimpelangina mangota mahamba kubhehe chakulya chino. 4 Nambo mangalye jhe nyama jhibhii na miyahe jhake nhwalo ughome ubhii umyahe. 5 Mundo jhojhoha anda ankomite nnyake nanihadabula aweghe. Na kinyama chochoha chikipala kunkoma mundo, na kinyama chenio nakikomwa. 6 Mundo jhojhoha jwapakunkoma nnyake, na jwenio hele napalwa akomwe na bhando nhwalo Chapanga ampangine mundo kukulandana na jwenio.

7 "Ipalwa mmelekane nnyonjekeke, mmelekena hake mukautweleye nnema."

8 Peniya, Chapanga ngannobholila Nuho na yana mundo, 9 "Ngohe, nibheka lilaghano lyango na mangota pamonga na ibheleko hino, 10 pamonga na ihumbe ibhii ghome ipakubhehe na mangota. Ijhune na inyama yukukoleka na inyama yukumanyahe na ipitita pamonga na mangota mu mele na kila kihumbe chikibhii ghome pannema. 11 Kwa lilaghano lyango lende kwino, kubhehe ihumbe yoha ghome iwe jhe kabhele kwa mache twe na maheluko gha mache ngita gheniya ghapiti ng'o kabhele ghukukomelekeya nnema." 12 Chapanga ngalongila kabhele, "Jhenje ndi nginyililo jha lilaghano linabheka panakate jhango na mangota, na kila kihumbe chikibhii ghome chimutamanako na kwa ibheluko yoha machiko ghoha ghangapeta. 13 Nibheka upende gwa matanga mu mahunde, gwenio ubhaha ndi nginyililo jha lilaghano linibheka panakate jhango na nnema. 14 Kipinde choha pighatanda mahunde gha hula pannema na mpende gwa matanga upitii mu mahunde, 15 peniya, nangombokela lilaghano lyango panakate jhango na mangota na ihumbe yoha ya kila namuna ibhii na ughome. Hilu mache twe ghapiti ng'o kabhele kukomelekeya ughome gwabhe. 16 Kipinde choha chipakupitila mpende gwa matanga kumahunde, naniubhona gwenio nangombokela lilaghano lya machiko ghoha ghangapeta panakate jha Chapanga na ihumbe yoha ibhii ghome ibhii panane jha nnema." 17 Peniya, Chapanga ngannobholila Nuho, "Jhenje ndi nginyililo jha lilaghano lyango mekite panakate jhango na ihumbe yoha pannema."

18 Yana ya Nuho ipitita muchapina ikibha Chemo na Amu na Yafete. Amu ndi tate jwa Kanane. 19 Bhamba bhatato bhakibha ndi yana ya Nuho, kubhoke kwa bheniya bhando ngabhajhenila pannema gwoha.

20 Nuho ndi jwatumbwila kulema, na ngalemita nng'onda gwa michabibo. 21 Lichiko limo Nuho nganywila hake divaye ngalobhila, ngagholwika makengele mu kichimba chake. 22 Amu, tate jwa Kanane ngaghabhona matako gha tate mundo, ngapita panja kwalobholela akananung'una mundo bhabhele. 23 Nambo Chemo na Yafete ngabhatoila ngobho ngibhapukita mumabhegha ghabhe, ngabhajhenda kihengenyume na kuyekelela matako gha tate gwabhe, miho ghabhe ghakalinguli ng'o matako gha tate gwabhe. 24 Nuho pajhimwika mulughono lukolobhela na pamanyita ghantendi mwana gwake nchokombe, 25 ngalongila,

"Nape likoto Akanane!

Nabha mmanda jwa pahe hake kwa akaacha mundo."

26 Ngalongila kabhele,

"Bhambo Chapanga, Chapanga gwango, ampele mota Chemo!

na Kanane abha mmanda gwake. 27 Chapanga anyonjekeye mipaka jha kilambo chake Yafete,

Yafete atame pamonga mu kichimba cha Chemo,

Kanane abha mmanda jwa Shemo."

28 Pughapetita mache twe, Nuho ngatamita yaka miya itato na makome nu nhwano. 29 Peniya, Nuho ngatamita yaka miya ticha na makome nu nhwano, peniya, ngajhomwika.