1 Kipinde bhando pibhatumbwila kujhonjekeka na kujhenela pannema na kupapa yana ikeghe, 2 pakate jha yana inalome ya Chapanga ngabhalolita kubhehe achikabhale bha bhando kuhalala. Ngabhatoila bheniya na kubhehe akaana bhabhe. 3 Peniya, Chapanga palongila, "Naleka jhe bhando bhatame machiko ghoha ghangapeta nhwalo bheniya ndi bhando bha kuwe tugha. Kwa yene, bhilama ng'o kupeta yaka miya jhimo na makome mabhele." 4 Kwa machiko gheniya na kujhendelela pakibha bhando akakoloakolo hake pannema bhakemitwa Akanefile. Bheniya bhabhelwika na yana ya inalome ya Chapanga na yana ikeghe ibhelwike na bhando. Bhando bheniya ghakibha malome na bhando bhibhamanyikina hake kipinde chene.

5 Chapanga palolita bhando bhitenda kila namuna jha uhakaho pannema, na palolita kila lyawachii mundo umwojho lyanganandela tugha machiko ghoha, 6 Chapanga ngabhila na ungolongonde hake umwojho gwake kukumpangana mundo pannema, Chapanga ngakokolika hake umwojho gwake. 7 Bhambo Chapanga palongila, "Nanakomelekeya njwe bhando bhumbangine pannema, bhando na inyama yukumanyahe na inyama ikwabha na ijhune yukunane. Mbaha nganiipangine jhe pannema." 8 Nambo Nuho ngajheketilwa palonge jha Chapanga.

9 Ghanga ndi malobhe gha Nuho na kibheluko chake. Nuho akibha mundo jwajheketilwe na jwahobhilika palonge jha Chapanga, jwangakokolekwa na bhando bha kipinde chake. Kabhele atamita kukunhobholela Chapanga. 10 Nuho akibha na yana itato inalome Shemu na Amu na Yafete. 11 Chapanga ngaulolita nnema uhangabhike na utwelii ukokotoko twe. 12 Chapanga ngalola nnema, kubhehe ihangabhike, nhwalo kila mundo akengamii ndela jhake jhanganandela.

13 Chapanga ngannobholila Nuho, "Amwii kwakomelekeya bhando bhoha, nhwalo bhutweliye nnema ukokotoko. Chakaka nanakomelekeya bhando bhoha pamonga na nnema. 14 Yene, ntendekeye limele lino kwa nkongo nnonopaho, mmeka na yumba na nkilimila lame panja na nkate." 15 Ntendekeya naha, "Kutandamala kwake kubha mita miya jhimo na makome matato na ticha na upana gwake ubha mita makome mabhele nu nhwano na kutondobhala kwake kubha mita likome limo nu nhwano. 16 Limele lyene libha gholofa itato na jhina nniango paupele. Ntendekeye kipaghalo, peniya nneka pwache jha nucho mita panakate jha dale na kipaghalo. 17 Naleta maheluko gha mache twe pannema kupala ku kikoma kila chikibhii ghome pannema na kila chikipanginwe chikipomola nipala kiweghe. 18 Nambo mbala kubheka lilaghano namwenga. Nanyingila mumele mwenga naanabhino na yana hino pamonga na achikabhana bhino. 19 Na mwenga nnyingiya mumele ihumbe ipanginwe ibheleibhele yankolo na yankambako kupala ibhe ighome pamonga na mwenga. 20 Nnyingiya ihumbe ibheibhele ghome ijhune ya kunane na kila kinyama na kila chikikwabha pannema, kupala ibhe ighome. 21 Hele ntola yakulyegha ya kila namuna ilegwa, mitunje nhwalo gwa chakulya chino na yana hino na inyama yenie." 22 Nuho ngateila telatela kila kilebhe ngita chanaghalikiya Chapanga.