1 Kipinde Ulaamo pahikicha yaka makome ticha na ticha, Bhambo Chapanga ngampitila na kunnobholela, "Nenga ndi Chapanga jhunanhotolo. Nkengama ulongoi gwango na ntama kwa kunhalalila nenga. 2 Nane nandenda lilaghano lyango panakate jha nenga na mwenga, nanimpela ibheluko twe." 3 Peniya, Ulaamo ghagwila mangukama na Chapanga ngannobholila, 4 "Ne meka lilaghano lende na mwenga, namma matate bha bhando bha ilambo twe. 5 Kubhoke ngohe, mikemwa ng'o kabhele ma Ulaamo, nambo nankemwa ma Ulaimo, nhwalo ninteii mme matate bha bhando bha ilambo twe." 6 Nanintenda mma na ibheluko twe hake, na kubhoka kwino nabhapitila bhando bha ilambo twe na panakate jha bheniya nabhapitila akanahota akakolongwa.

7 "Nanitenda lilaghano lyango libhaha lya machiko ghoha ghangapeta. Namma Chapanga gwino na Chapanga jwa ibheluko ino. 8 Nanimpela kilambo chenje mwenga na ibheluko ino mwenio ngohe mitama ngita maghene. Yane kilambo choha chuku Kaanane machiko ghoha ghangapeta na nenga namma Chapanga jwabhe."

9 Peniya, Chapanga ngannobholila Ulaimo, "Mwenga namulichokolekeya lilaghano lyango, mabhene pamonga na ibheluko ino na ibheluko yabhe yoha. 10 Yene, ndi chimipalwa kulichokolekeya lilaghano lende panakate jhango na mwenga na ibheluko ino, kila munalome panakate jhino ipalwa ajhingila jando. 11 Kwenio kujhingila jando ndi naibhaha huna jha lilaghano lyango panakate jhino na nenga. 12 Kila mwana munalome pahikicha machiko nane pabhoke mu kubhelukwa ajhingiwa jando. Kila munalome mu ibheluko ino pamonga na mmanda jwabhelwikwe munyumba ino amu mmanda jwahemilwe mu mbijha ino kuhumii kwa akaghene bhangabhehe ibheluko ino ajhingila jando. 13 Ena, kila mwana munalome jwabhelwikwe munyumba jhino ata jwahemilwe kwa mbijha ino ipalwa ajhingila jando. Huna jhene naibhaha nginyililo muyegha jhino jha lilaghano lyango lya machiko ghoha ghangapeta. 14 Munalome jhojhoha jwangajhingii jando abhekwa kutale na bhando bhake, nhwalo nabhaha alilemwile lilaghano lyango."

15 Peniya, Chapanga pannobholila Ulaimo, "Kwa nhwana gwino, nakemwa jhe kabhele Salai, nambo nakemwa Sala. 16 Nanimpela mota na mwenga champapila mwana munalome. Ena, mbakumpe mota Sala nabhaha majhe jwa bhando bha ilambo twe na akanahota akakolongwa bhi ilambo yoha nabhapitila mujwenio."

17 Peniya, Ulaimo ngalita ade pahe kone aekita chumwojho nukuwacha, "Kupapa mwana kwa mundo jwabhii na yaka makome kome? Na bho Sala jwabhii na yaka makome ticha nahotola kupapa mwana?" 18 Peniya, Ulaimo ngannyangwila "Nhwalo gwa nike nkoto kunneka abhujhila ilebhe yango?"

19 Chapanga ngalongila, "Nahi jhe! Nambo nhwana gwino Sala apakumpapii mwana munalome, namwe namkema liina lyake Ichaka. Nanilikamula lilaghano lyango kwa jwenio na ibheluko yake kubhehe lilaghano lyango ndi machiko ghoha ghangapeta." 20 "Panane jha Ichumaile, ne nyohine chinyopite. Mbanimpe mota, nanimpela yana twe na kunyonjekeya hake. Ichumaile nabha tate jwa ilongoche ya makabila kome na mabhele, na ne nimmeka abha tate jwa kilambo kikolongwa. 21 Nambo lilaghano lyango lela nalilenganila kwa Ichaka jwene. Na jwene nabhelukwa na Sala kwa chaka chikihika, kipinde ngita chenje." 22 Peniya, Chapanga pajhomolila kulongela, nganneka Ulaimo.

23 Peniya, lichiko lele Ulaimo nganyingiya mwana mundo Ichumaile jando, na kwajhingii akabhanda bhoha akanalome bhubhabhelwikii munyumba jhake na bhala bhibhahemililwe kwa mbijha yake, ngita Chapanga chinaghalikiya. 24 Ulaimo pajhingila jando, pakibha na yaka makome ticha na ticha. 25 Na jwenie Ichumaile mwana gwake, akibha na yaka kome na mitato na jwenie ndi pajhingila jando. 26 Ulaimo na mwanamundo Ichumaile ngabhajhingila jando lichiko limo. 27 Akanalome bhoha bhubhabhelwikile unyumba jhake pamonga na akabhanda bhibhabhelikilwe mbijha yake na bhibhabhelekwii munyumba. Bhoha ngabhajhagila jhando lichiko limo.