1 Yene Chapanga, ngannobholila Yakobu kubhehe, "Nnenganikiye mwanja, nnyende ku Betele mukatame kwono, mukanjenge kachangwale kanyahinyahi kwenio. Nenga Chapanga gwino jhunnimpitila kipinde chimtilita nhwacha gwino Echau."

2 Peniya, Yakobu ngabhalobholila akalongo mundo na bhando bhakibha nabho, "Mwileke inyagho ya ichapanga jhikighene inkwete na mukijhelebhule nhwala henge ngobho. 3 Tujhenda ku Betele kwenio natunchengela Chapanga kachangwale kanyahinyahi, Chapanga jwantangatila mu malola ghango na kubhehe nane kila kunnyenda." 4 Yene bhando ngabhampila Yakobu inyagho yoha imilongo jha kighene ibhakibha nabho pamo na ndondolo ibhiwalite mumachikilo ghabhe. Na Yakobu ngajhenda kuhiya pahe jha nkongo nkolongwa ghumanyikana mwalomi ghubhii mu kilambo chuku Chekemu.

5 Yakobu na yana mundo pubhakibha mumwanja, Chapanga ngabhaleke kiholo akolo muche bhapahina hilu bhakahotwi jhe kwakengama. 6 Peniya, Yakobu na bhando bhoha bhubhakibha nako ngaika kumuche gwaku Luzu, yane kukilambo chuku Kaanane. 7 Kwenio ngachenga kachangwale na chehemo jhenio ngapakema El Betele, nhwalo peniya ndi pakilangiya Chapanga kipinde chantila nkolo mundo Echau. 8 Peniya Debola jwannelita Lebeka pakibha mwana, pajhomwika ngabhanchika pahe jha nkongo gwa mwalone ghubhii ku Betele. Yene Yakobu ngapakema chehemo jhenio, "Alone Bakute." Mana ghake nkongo gwa kulela.

9 Yakobu pabhujhita kuhuma Padone Alamo, Chapanga ngampitii kabhele nu kumpe mota. 10 Chapanga ngannobholila, "Liina lino Yakobu, nambo mikemwa kabhele jhe lyenio, nambo ngohe liina lino nankemwa Ichilahele." 11 Chapanga ngannobholila kabhele, "Nenga ndi Chapanga jhuna Makakala. Kibheluko china kibhaha twe. Bhando bhilambo yoha nabhapitila kuhumii kwino na akanahota akakolongwa nabhapitila kuhumii muyegha jhino. 12 Ilambo inimpila Ulahimo na Ichaka, ngohe nanimpa mwenga na kibheluko chino." 13 Chapanga pajhomolila kulonge nako Yakobu, ngannekita na kubhoka. 14 Yakobu ngahimika luheke lwa lighanga kupala apakombokela chehemo jhenio palongela na Chapanga, ngapajhelebhula kwa kujhiti litambiko divaye pamo na mahuta kwa nhwalo jha bhambo. 15 Yakobu ngapakema Betele chehemo jhenio jhalongila na chapanga.

16 Yakobu na akalongo mundo ngabhabhoka ku Betele. Pibhaheghelila kuhika ku muche gwaku Efulata, Lahele ngajhoa lipyanda lyukupapa. 17 Najwene pakibha mulipyanda lyenio, nkunga ngannobholila Lahele, "Mangajhoghopa jhe, namupapa mwana jhonge munalome." 18 Lahele abhi mukuhandahanda, ngantina mwana gwake liina lya Benione, mana ghake mwana jhilipyanda, nambo tatemundo ngankema, Benjamine, mana ghake mwana jwa lubhoko lwalelo.

19 Peniya Lahele ngajhomwika, ngabhanchika mupele jha ndela jhijhenda ku Efulata, ngohe pimanyikana ku Betelehemo. 20 Yakobu ngajhemika luheke lwa lighanga panane jha mambe jha Lahele na ade ngoheno lubhii peniya. 21 Peniya, Yakobo helahela jwakemitwa Ichilahele ngajhendilila na mwanja gwake nu kubheka kighono chake kwiye jha nnala gwa Edele.

22 Yakobu patama mu kilambo chenio, mwanamundo Leubene ngagholoka na Biliya, kilaghe cha tate mundo na jwenio Yakobu ngajhohina nhwalo gwenio.

Yakobu akibha na yana kome nibhele.

23 Yana ya Leya ikibha Leubene ndi mwana jwa litibho jwa Yakobu na Chimione na Lawe na Yuda na Ichakale pamonga na Zabulone. 24 Yana inalome ya Lahele ikibha Uchupo na Benjamine. 25 Yana inalome ya Biliya, ntumiche jwa Lahele ikibha Dane na Nafutale. 26 Yana ya Zilipa, ntumiche jwa Leya ikibha Gade na Achele. Bhamba ndi yana inalome ya Yakobu yapapita pakibha ku kilambo chuku Padane Alamu.

27 Yakobu ngajhenda kwa tatemundo Ichaka kumuche gwa ku Mamule kubomane Kiliate Aluba, ngohe umanyikana Ebulone, kwenio ndi kubhakibha bhatamita Ulahimo na Ichaka. 28 Kipinde chene Ichaka ngabhila na yaka miya jhimo na makome nane. 29 Ichaka ngapumwila uhuke gwa mwicho nu kuwegha, ngawila ngita chibhawila akalongo mundo, mughoe hake. Nabhene Echau na Yakobu yana mundo, ngabhanchika tate gwabhe.