1 Bhambo Chapanga ngankomboka Sala, ngantendila ngita chalaaghila. 2 Ulaimo mughogholo na Sala pakibha na ndumbo, ngapapa mwana munalome, kipinde cheche chalongila Chapanga. 3 Ulaimo ngampila mwana jhono jwampapite Sala liina lyake Ichaka. 4 Ichaka pahikicha machiko nane, Ulaimo nganyingiya jando ngita channaghilwa na Bhambo Chapanga. 5 Ulaimo akibha na yaka makome kome ndi kipinde chabhelwika Ichaka mwana mundo. 6 Na jwenio Sala palongila, "Chapanga ambii luweko, kila mundo jwapakujhoa kilebhe chenje, naheka pamo na nenga." 7 Sala ngajhendilila kulonge, "Mene ngahotwii kunnobhole Ulaimo ne Nachala nanyongecha yana? Kabhele nanipapila mwana munalome mughoe gwake!"

8 Ichaka ngajhendilila kukola na lichiko lyalekichwa kujhonga, Ulaimo ngatenda unyagho nkolongwa.

9 Lichiko limo Sala ngammona Ichumaile mwana jwa Ulaaimo jwabhelwike na Ajile Mmichile, akikina na Ichaka mwana mundo. 10 Peniya Sala ngannobholila Ulaimo, "Mummenge mmanda ojho pamo na mwana mundo. Ichindikine mwana jwa mmanda kubhujhii pamo na mwana gwango Ichaka." 11 Kilebhe chenie kikanhechwii hake Ulaimo nhwalo Ichumaile hele akibha mwana mundo. 12 Nambo Chapanga ngannobholila Ulaimo, "Nkoto kuhechuka kwa nhwalo jha mwana ojho hilu mmanda gwino mwikeghe. Kilebhe chochoha chapakunnobholela Sala, mukihenge. Nhwalo kupete Ichaka namma na kibheluko chino ngita chininaghila. 13 Na kunhwalo jwa mwana jwa mmanda gwino mwikeghe nanimmeka abhe na yana twe na kubhehe kilambo kikolongwa nhwalo jhono hele ndi mwana gwino."

14 Kilabho jhake putepute Ulaimo ngatola chakulya na lidengo lya mache ngampila Ajile na kuntweka pilibhegha, ngannobholila mmoke pamonga na mwana gwino. Ajile ngabhoka, ngabhila atindilatindila munjenga jha Beli Cheba. 15 Kwenio kunjenga paghajhomwikila mache mulidengwane, Ajile nganng'oneka mwana mundo panhwile pahe jha nkongo. 16 Jwene ngajhema kutale ngatama kulipa kwake ngita mita miya jhimo na kone akilongolila umwojho, "Mbaha ngota kulola mwanango akiwagha." Pakibha atamike peniya mwana ngalela kanonoya.

17 Chapanga ngajhoa mwana jhono akilela na ntumiche jwa kunane kwa Chapanga ngankema Ajile kubhoke kunane na kunkonya, "Malola ghino nike Ajile? Mangapwelela, Chapanga ajhoine lilobhe lya mwana kwenio kwabhile. 18 Nnyeme na mwinyinule mwana na mupaghate maha mu mabhoko gwino, nhwalo mbakuntenda abhehe yana twe na abhehe tate jwa kilambo kikolongwa." 19 Chapanga ngahyeku miho Ajile, na jwenie ngakibhona kilibha. Ngajhenda kutweleya mache mulidengwane, peniya ngankengita mwana mundo. 20 Chapanga ngabhila pamonga na mwana jwenio, ngajhendilila kukola. Na jwenio ngatama panjenga na akibha nhyema jwamaha kwa kutumii upende. 21 Akibha atamita panjenga jha Palane na majhe mundo ngapakiya mwikeghe kubhoka mu kilambo chuku Michile kupala antolele.

22 Kipinde chenio Abimeleke pamonga na Fikone nkolongwa jwa akakomana ngondo bhake, ngabhajhenda kwa Ulaimo na kunnobholela, "Chapanga abhii pamo na mwenga mu kila kilebhe chimuhenga. 23 Yene unapile kwa liina lya Chapanga kubhehe ungolo jhe nenga andajhe yanango amu ibheluko yango. Anda ne chimii jwahobholeka kwino mwenga, na mwe hele mme mihobholeka kwango nenga na mu kilambo chimutama."

24 Ulaimo ngalongila, "Ndenda kulapila."

25 Kipende cheneche Ulaimo kita apelike maghonga ghake gha kukokoleka nhwalo gha kilibh chibhampokitwa na akatumiche bhake Abimeleke. 26 Abimeleke ngalongila, "Nenga niumanyi jhe jwatei gheniya, mpaka deleno jhino mwe unongoli jhe, wala nenga nanajhoa jhe malobhe gweniya ade ngohe." 27 Bhahe, Ulaimo ngantola limbelele pamonga na ng'ombi ngampila Abimeleke na bhoha bhabhele ngabhapekita lilaghano. 28 Ulaimo ngahaghu mambelele chaba ghankolo. 29 Abimeleke ngankonya Ulaimo, "Nhwalo gwa nike mihaghuu mambelele ghankolo chaba?"

30 Ulaimo pajhangwila, "Ntole mambelele ghanga chaba ghankolo, nimpe mwenga kwa mabhoko ghango namwete kulangii kubhehe nenga ndi jhuhembita kilibha chenje." 31 Yene, kilibha chenio ngabhakemita Beli Cheba, mana jhake bhoha bhabhele bhakalapiline peniya.

32 Bhahe, ngabhateila lilaghano ku Beli Cheba, Abimeleke na Pikone, nkolongwa jwa akakomana ngondo, ngabhokita na kubhujha mu kilambo cha Akafilichite. 33 Ulaimo ngapanda nkongo gwa nkwajho kwenio ku Beli Cheba, pajhomolila ngannyinamila Bhambo Chapanga, Chapanga jwa machiko ghoha ghangapeta. 34 Ulaimo ngatama machiko twe mu kilambo cha Akafilichite.