1 Machiko gheniya Yuda, ngalekana na akalongo bhake, ngajhenda kutama na mundo jhumo, jwakemwa Hila jwa ku muche gwa Adulami. 2 Pakibha kwenio, Yuda ngammona bite Shuwa, jwaku Kaanane, ngatolana nako. 3 Bite Shuwa ngabhila na ndumbo ngapapa mwana munalome, na Yuda ngankema liina lyake Eri. 4 Peniya, ngapata jhenge ndumbo ngapapa mwana munalome, ngankema liina lyake Onani. 5 Ngajhendelila kupapa mwana jhonge munalome, ngankema liina lyake Shela. Shela pabhelwika, Yuda atamita ku muche gwa ku Kezibu.

6 Peniya, Yuda ngantolekecha mwikeghe mwana gwake jhulitibho, mwikeghe jwenio akemitwa Tamali. 7 Eri akibha jwanganandela palonge jha Bhambo, yene Bhambo Chapanga ngankomita. 8 Yene, Yuda ngannobholila Onani, "Mmujhii lipwela lya nnongo gwino, mwe ndi mipalwa kutenda yene kupala mupapile mwana nhwacha gwino." 9 Nambo Onani ngamanya kubhehe yana yenio naibhaha yakwe jhe. Yene pagholwika na mwikeghe jwenio mbejho yoha ngajhitila pahe kupala angampapii jhe mwana nhwacha mundo. 10 Chela chateila Onane, Bhambo Chapanga kikanhalalii jhe, yene helahela ngankoma Onane. 11 Peniya, Yuda ngannobholila kamwana mundo kubhehe, "Mmujhe kwa tate gwino, ntame manhwela ade papakuhamula manango Shela." Yuda apwelila kubhehe Shela hele nakomwa ngita akahacha mundo. Yene Tamali ngabhujha kajhake.

12 Machiko ghamahele, nhwana mundo Yuda bite Shuwa ngajhomwika. Yuda pajhomolila kulela malelo ghake ngabhoka na nkoche mundo Hila, ku muche gwa Adulame, ngajhenda ku Timuna kuheketa mangoma gha mambelele ghake. 13 Tamali pajhoha kubhehe nkowano mundo abhii undela kujhenda ku Timuna kuheketa mangoma mambelele ghake, 14 ngaula ngobho ya malelo ya unahwela na ngakipuka kitambala kupala angamanyikana jhe, yene ngatama pannyango gwa kujhingilila ku Enaimu, chenda jhibhii undela jhuku Timuna. Ateila yene palola kubhehe Shela akibha akolite, nambo jwenie Tamali akalangii jhe abhehe nhwana mundo.

15 Yuda ngammona Tamali, ahambwika nngongola, mana akibha akitandite kumiho jhake. 16 Peniya, Yuda changamanya ngannyendila kamwana mundo, paupele jha ndela ngannobholila, "Mbala ng'oloke na mwenga."

Tamali pankonya, "Naumbela nike anda nnyeketile kugholoka na mwenga?"

17 Yuda nganyanguu, "Nanimpela mbuhe kubhoka muipugho yango."

Tamali ngannobholila, "Naumbela nike kutama nacho ade pumba kuleta mbuhe."

18 Yuda ngankonya, "Mipala kutama nacho kilebhe ghane?"

Tamali ngajhangwila, "Umbe pete nu lughojhe lwake pamo na nkongocho ghunkamwile." Peniya, Yuda ngampila ilebhe yenie yoha, ngagholwika nako. Tamali ngabhila na ndumbo. 19 Peniya, Tamali ngabhujha kajhake ngaula kitambala chake, ngawala kabhele ngobho yake yunahwela.

20 Yuda pantuma nkoche mundo Hila ampelekele mwikeghe jwenie mbuhe, kupala ammujhichile ilebhe yake, nambo Hila ankolii jhe mwikeghe jwenio. 21 Hila ngabhakonya akolo muche ghola gwa Enaimu, "Abhii kojhe mwikeghe nngongola jwatamita muupele jha ndela pahina na pambano?"

Bhene ngabhannyangwila, "Chehemo jhenje, panabhehe jhe na mwikeghe nngongola."

22 Peniya, nkoche mundo jhola ngabhujha kwa Yuda kunnobholela, "Nimpatite jhe! Kabhe akolo muche manobholii kubhehe panabhe jhe na mwikeghe jhojhoha nngongola."

23 Yuda ngalonge, "Mneke atole ilebhe yene, anda jhe bhando apakutubheka tuhekwa. Mabhene nnolite kubhehe nganimpelikila mbuhe, nambo mumwenii jhe."

24 Puipetita myehe mitato bhando ngabhannobholila Yuda, "Tamali, kamwana gwino, ngohe angongola, abhii na ndumbo."

Yuda ngaamulicha, "Mupikiye panja, ajhochwe mwotu ade aweghe."

25 Pibhakibha bhampikiya panja, Tamali ngalaghila bhando bhajhende kwa nkowano mundo kulonge, "Ngwete ndumbo jwa mundo jhuna ilebhe henge. Ku yene, milolokeye maha ilebhe henge ya ghane? Pete jhenje nu lughojhe lwake na nkongocho ghone."

26 Yuda ngaimanya ilebhe yenio, ngalonge, "Tamali jwaumbone palonge jha Chapanga kuliku nenga. Nhwalo nimpi jhe mwanango Shela abhehe ungana gwino." Kuhumii lichiko lyenio Yuda agholwike jhe kabhele na Tamali.

27 Lichiko lya kupapa Tamali puliikita, ngimanyikina kubhehe ndumbo jhikibha jha mabhela. 28 Pulitumbwila lipyanda lya kupapa mwana jhumo ngapiya lubhoko lwake panja, na nkunga ngalutabha luche lukele lubhoko lwenio, ngalonge, "Jhonjo ndi mwana jwa litibho." 29 Nambo mwana jweno pawinicha lubhoko lwake nkate, unnung'una mundo ngatumbuu kubhelukwa. Nkunga ngalonge, "Mbone mwe mpetite kwa makakala?" Kuyene, ngankema mwana jweno Pelesi. 30 Peniya, ngabhelwika unung'una abhii na luche lukele mulubhoko lwake, na jwenio ngakemwa Zela.