1 Machiko ngaghapeta, akatumiche bhabhele bha Falao ngabhalemwiya nkolo jwabhe. Akatumiche bheniya akibha ntumiche jwa kutengenecha yukunywegha na nkolongwa jhu kuteleka mabumunda. 2 Falao ngabhachimwa akatumiche bhake bhabhele bheniya, 3 ngabhatabhita mukipungo munyumba jha nkolongwa jwa ulonda, chehemo papungitwa Uchupo. 4 Nkolo jwa ulonda ngahaghuu Uchupo bhatumikila. Na bhene bhakapungwitwe kwa machiko twe.

5 Lichiko limo kilo, panakate jha bheniya bhabhele. Nkolongwa jwa kutenganecha yukunywegha na jhola nkolongwa jhukutengenecha mabumunda gha munahota nkolongwa jwaku Michile, ngabhalota maloto mu kipungo, kila mundo maloto ghake na mana ghake. 6 Uchupo pajhawila kwalola lukela, bhoha bhabhele bhakibha nu nhechuko hake. 7 Yene, Uchupo ngabhakonya, akatumiche bheniya, bhubhakibha mu kipungo pamo na jwenio unyumba jwa ananhota bhake, "Kilebhe ghane nhechwikinge naha deleno?"

8 Ngabhannyangwila, "Tubhii nuhechuko nhwalo twabhoa tulotii maloto mu kipungo mwone, nambo abhii jhe mundo jwakutolongole mana jha maloto gheniya."

Peniya, Uchupo ngabhalongole, "Bho, kumanya mana jha maloto ndi lihengo lya Chapanga jhe? Ajha, njimulila maloto ghena."

9 Peniya, nkolongwa jwa kutengenecha yukunywegha ngachimulila maloto ghake, ngalonge, "Mumaloto ghango ngunubhona nchabibo nnonge jhango, 10 na gwenio nchabibo ukibha na ndabhe itato. Kipinde putumbwila kuipuka mahamba, malobha ghake pighatoloka ngibhonikina kihagho cha chabibo kijhelite. 11 Mulobhoko lwango nikibha ngamwii kikombe cha Falao, peniya ngamagwila chabibo nu kuminyii mu kikombe chenio, ngannipila Falao."

12 Uchupo ngannobholila ntumiche jwenio, "Mana jha maloto ghino ndi jhenje, ndabhe itato ndi machiko matato. 13 Mu machiko matato, Falao nampiya mu kipungo na kummeka kabhele palihengo lino. Mihoto kumpe kabhele kikombe Falao mulubhoko lwino ngita chiteila makacho. 14 Nambo chonde ninnyopa manganibhilila ilebhe pipakunyendela telatela. Undendela telatela na kungamuwa nnonge jha Falao, kupala mbite mu kipungo mwone. 15 Mana nenga nikatoilwe kwa makakala kukilambo chango cha Akaebulaniya na pa Michile pano kibhii jhe chindeile chikimbalwa ndabwe mu kipungo."

16 Nkolo jhu kuteleka mabumunda pajhoha maloto gha nnyake kuhalala, ngalonge, "Ata nenga nikalotite maloto! Mu maloto ghango nikibha ndwekile itandabhala itato ya mabumunda ghamaha. 17 Mu kitandabhala chu kunane pakibha na yakulya twe ikabanikwe kunhwalo gwa Falao. Nambo ijhune ikibha ihonywila muitandabhala pamuto gwango!"

18 Uchupo ngannobholila, "Mana jha maloto ghino ndi ghanga, itandabhala itato ndi machiko matato. 19 Mu machiko matato gheniya, Falao nampiya mu kipungo kupala anhekete muto gwino na yegha jhino anhwomeka panane jha nkongo, na ijhune ihonyola yegha jhino."

20 Puliikita lichiko lyutato, ikibha ngombokelo lichiko lya kubhelukwa kwa Falao, jwenio ngabhalenganikiya ilongoche yake yoha unyagho gwa kubhelukwa. Ngabhampiya mukipungo, mundo jwake jhukutengenecha yukunywegha na mundo jwake jhukutengenecha mabumunda, ngabhabheka nnonge jha akatumiche bhake. 21 Falao ngammujhichila lihengo lyake ntengenecha yukunywegha kupala Falao antumikila kumpe kikombe. 22 Nambo ntengenecha mabumunda jhola ngaheketwa muto, yegha jhake ngaihomekwa pankongo, ngita Uchupo pachimulila. 23 Nambo nkolo jhukutengecha yukunywegha, ngannibhilila Uchupo hilu ankombwike jhe.