1 Pena, Uchupo ngalita ngankumbatila tatemundo, akapeta kulela. 2 Peniya, Uchupo ngalaghila akaghanga bhake bhampakaye ntela tatemundo akotokubhola. Na bhene ngateila yene. 3 Lihengo lyukupakaya malelo ntela ngalitoila machiko makome ncheche kwa lihengo lyenio. Akamichile hele ngabhalelita malelo gha Yakobu kwa machiko makome chaba.

4 Pughajhomokila kulela malelo, Uchupo ngalonge na bhando bha nyumba jha Falao, "Ninnyopangane, chonde munnobholele Falao naha, 5 ‘Tate pabhandikila kuwegha. Mipalwa mukanjika mu linkwembe lihembite mukilambo chuku Kaanane. Kwa yene najhopa anyeketele nyende nakachike atate bhango, peniya namujha.’ "

6 Falao ngalonge, "Nnyende makachike atate bhino ngita channapanikiya."

7 Yene, Uchupo ngajhenda kunchika tatemundo, ngachindikichwa na akatumiche bhoha bha nyumba jha Falao, pamonga na akanahota bha paudamo na ilongoche yoha yuku Michile. 8 Nyumba jhoha jha Uchupo na akalongomundo na nyumba jhoha jha tatemundo, mu kilambo chuku Goshene ngabhaileka yana pamonga na mambelele na mbuhe na ng'ombi yabhe. 9 Helahela ngabhalongohina nabho bhibhahobhokii falache na mutuka iitwa na maponda, likibha lilongo likolongwa hake.

10 Pubhaikita palubhanja lukuhebhela mahuno lwa Atade, kwiye jha lukemba lwaku Yoludane, ngabhalelita malelo kwa ungolongonde hake, na Uchupo ngantendila matanga tatemundo jwajhomwike kwa machiko chaba. 11 Akakaanane akolo kilambo chenio, pubhabhona bhakalela malelo ghakatendika palubhanja lukuhebhe mahuno lwa Atade, ngabhalonge, "Kulela kongo kwa Akamichile, chakaka kukolongwa hake!" Yene chehemo jhenio ngabhaikema, Abele Michile, ndi mana chehemo jhene jhibhii kwiye jha lukemba lwaku Yoludane pikemwa Abele Michile.

12 Yana ya Yakobu ngabhantendila tate gwabhe ngita chabhalaghila, 13 ngabhantola ade kukilambo chuku Kaanane na ngabhanchika mu linkwembe lilibhii munng'onda gwako kola ku Makipela, kola ku Mamule. Nkwembe gwenio na nng'onda gwenio Ulaamo akate kuhemela kwa Akafulone Akahite, kupala ibhaha chehemo jhake jha kuchikila. 14 Pajhomolila kunchika tatemundo, Uchupo ngabhujha ku Michile pamonga na akalongo mundo na bhando bhoha bhubhanchindikicha kunchika tatemundo.

15 Bhahe, pughapetita malelo gha tate gwabhe, akalongomundo ngabhapwepwelina kubhehe, "Pange jhe Uchupo natuchimwa nu kutulepechela ghanganandela ghoha ghutuntendila." 16 Yene, ngabhampelikila Uchupo chalamo, bhalongila, "Tate gwino kabula jhukuwegha, akalaghii naha, 17 tunnobholele naha, Uchupo pambala kuwe ne, ‘Chonde, malekekeye akalongo bhino malemo ghabhe na ubhoho ghoha ghubhantendii.’ Ngohe, chonde tunnyopa mutulekekeye ulemo ghutuntendii twe takatumiche bha Chapanga." Uchupo pajhohina gheniya, ngalela.

18 Peniya, akalongomundo ngabhannyendila ngabhannyinamila nukulonge, "Nnola, twe ndi akabhanda bhino."

19 Nambo Uchupo ngabhalobholila, "Mangajhoghopa jhe! Bho, nenga ndi Chapanga jwahadabuu bhando? 20 Mangota mapala kundende ghanganandela, nambo Chapanga ngaghalambiya kubhehe ghambone kupala bhando bhange bhabha ghome ngita chimulola deleno. 21 Mangajhoghopa jhe. Nenga nanimpela chakulya mangota na yana hino." Peniya, ngabhapepicha nu kulonge nabho maha.

22 Uchupo ngajhendilila kutama ku kilambo chuku Michile pamonga na akalongo bhoha bha tate mundo. Uchupo ngatama yaka miya jhimo na likome limo. 23 Uchupo ngaibhona yana na ichokolo ya Efulaimo. Hele ngaipokela yana ya Makile, mwana jwa Manache. 24 Uchupo ngabhalobholila akalongo mundo kubhehe, "Ne, ngohe mandikii kuwe. Nambo Chapanga nahwikilila kuntangatila mangota nu kummowa mu kilambo chenje nu kumpeleka mu kilambo channaghila kumpe Ulaamo na Ichaka na Yakobu." 25 Peniya, Uchupo ngailapila yana ya Ichilahele, kulonge, "Chapanga papakuika kuntangatila, ntola ihupa jhango kubhoka pamba, mmoka nayo." 26 Uchupo ngajhomwika kwenio ku Michile, akibha na yaka miya jhimo na likome limo. Ngabhaupikiya ntela malelo ghakoto kubhola, ngabhabheka mu lichanduko kwenio ku Michile.