1 Bhahe, Salai nhwanamundo Ulaamo kuhumii makacho akibha anampapi jhe mwana. Nambo akibha na ntumiche mwikeghe liina lyake Ajile, jwahumii ku Michile. 2 Yene, Salai ngannobholila Ulaamo, "Umanye kubhehe Bhambo Chapanga andei ngoto kupapa. Ngohe, nng'oloke na Ajile ntumiche jwango Ajile, pange jhe nambata mwana kuhumii kwa jwenio." Ulaamo ngajheketila chalongii Salai. 3 Bhahe, Ulaamo patamita ku kilambo chuku Kaanane kwa yaka kome. Peniya, Salai ngantoila ntumiche gwake Ajile, jwakibha Mmichile na ngampila Ulaamo abhe nhwanamundo. 4 Ulaamo ngagholwika na Ajile, na Ajile ngapata ndumbo. Nambo Ajile pamanye kubhehe nandumbo, ngatumbu kuloka na kunpucha Salai.

5 Salai ngannobholila Ulaamo, "Mwe, umanye ghunitendelwa kwa nhwalo gwino. Ne nganimpila ntumiche jwango, nambo papatita ndumbo tugha, andenda kumbucha! Bhambo Chapanga ahadabule panakate jhango na mwenga!"

6 Nambo Ulaamo panyangwila Salai, "Ntumiche jwino abhii mukindendeke gwino. Muntende chimipala mabhene." Peniya, Salai ngang'ahita Ajile, ade nganyogholwika.

7 Ntumiche jwa Bhambo Chapanga jwa kunane ngankole Ajile pachembwe cha mache kunjenga, chembwe chenio kikibha pandela jhijhenda ku Shulu. 8 Ntumiche jwenio pankonya Ajile, "Ajile, ntumiche jwa Salai! Mibhoka koo na mijhenda koke?"

Ajile pajhangwila, "Natila akalongwa bhango Asalai."

9 Ndi ntumiche jwenio jwa Chapanga pannobholila Ajile, "Nkelebhuke kwa nkolongwa gwino Salai na mukannyenyekeye." 10 Ntumiche jwenio jwa Bhambo Chapanga ngajhendilila kulonge, "Mbakujhonjekeya ibheluko hino ibha twe yangabhalangika. 11 Mwenga ngohe mmii na ndumbo nampapa mwana munalome. Liina lyake namtina Ichumaile, mana Chapanga ajhoine malagho ghino. 12 Nambo mwana gwino Ichumaile chatama na lighoho ngita liponda lyangakolekeka, chakwapana na kila mundo, na kila mundo nakwapa nako. Natama kanjika na akalongo mundo."

13 Peniya, Ajile ngampila liina Bhambo Chapanga jwalonge nako, "Mwenga ndi Ma Chapanga Jwimulola," kwa mana awachila kubhehe, "Chakaka pamba nimwene jwenio Jwamwona nenga." 14 Ndi nhwalo kilibha chela kikemwa Beli Lai Loi, mana ghake kilibha cha Jwabhii Ghome Jwamwona nenga. Kilibha chenio kibhii panakate jha muche gwa Kadeshe na ku Belede.

15 Ajile ngampapila Ulaamo mwana munalome. Ulaamo ngantina liina lya Ichumaile. 16 Ulaamo akibha na yaka makome nane na chita kipinde Ajile pampapita Ichumaile.