1 Peniya, Akaichumaile bhala ngabhantola Uchupo ade ku Michile, nu kunchuluchila Mmichile jhumo jwakemwa Potifa. Jwenio ndi akibha ntumiche jwa Falao na nkolo jwa bhalonda. 2 Bhambo Chapanga akibha pamonga na Uchupo, ngantangatila mu kila kilebhe chahengita. Uchupo ngahengita mahengo munyumba jha munahota gwake Mmichile. 3 Munahota jwenio ngammanya kubhehe, Bhambo Chapanga abhii pamonga na Uchupo, ndi jwantangatila mu ilebhe yoha yateila Uchupo. 4 Uchupo ngajheketilwa hake nnonge jha Potifa, ngabhe ntumiche jwakanjika na ngantenda nnonda na nnyemelela jwa ilebhe yake yoha. 5 Kutumbulii Potifa pammeka Uchupo kubhehe nnonda na nnyemelela jwa ilebhe yake, Bhambo Chapanga ngaipe mota yoha ibhii nkate jha Mmichile jwenio. Mota ya Bhambo ikibha mu kila chakibhanacho Potifa pakajhake nu kung'onda. 6 Kwa nhwalo gwenio, Potifa ngampe Uchupo ukindendeke mu ilebhe yake yoha, na Potifa ngaleka kutumika kwa chochoha nambo nga chakulya chake tugha.

Uchupo akibha kangombo jhuna yegha jhina makalala na jwanyahinyahi.

7 Palonge pandina, aanabha bha Potifa ngang'ana Uchupo, ngannobholila, "Nng'oloke nanenga!" 8 Nambo Uchupo ngakana. Pannobholila mwikeghe jwenio, "Nenga angamwii ukindendeke mu kila kilebhe chochoha unyumba jhake jhenje, kila kilebhe chakwete angamwiye nenga nyemelele. 9 Pakajhango pano abhii jhe jhuna ukindendeke kumbeta nenga, anahota gwango anhibhiliki jhe kilebhe chochoha nambo nga mwe tugha maanamundo. Nahobhole kutenda gwanganandela nkolongwa gwenio nukuntende malemwa Chapanga?" 10 Mwikeghe jwenio ngajhendilila kumpembekeya Uchupo kila lichiko, nambo Uchupo ngakana kugholoka nako.

11 Lichiko limo, Uchupo ngajhingii munyumba kuhenga lihengo. Nkate akibha jhe na ntumiche jhojhoha. 12 Peniya, aanabha gwa Potifa ngakamula nng'olole gwa Uchupo nu kulonge, "Nhwike nng'oloke na nenga!" Nambo Uchupo nganneke nng'olole gwake mulubhoko lwa mwikeghe jwenio nu kutilii panja. 13 Mwikeghe jwenio palola kubhehe Uchupo aulekite nng'olole gwake mulubhoko lwake nu kutilii panja, 14 ngabhakema akatumiche bha pakajhake na kwalobholela, "Nnola! Mwibulaniya jwatuletii one kwa bhoha twenga. Ngaika kwango kumbala kunnimba, nambo ne ngangemita nnete. 15 Pajhohina nnete gwango, ngajhileka nng'olole gwake nu kutilii panja!"

16 Mwikeghe jwenio ngaibheka nng'olole gwenio ade pabhujha nnganamundo. 17 Nganchimulila nnganagwake nhwalo gwenio, "Ntumiche jwa Kiebulaniya jhummutuletii anhikilile kupala ambe one. 18 Nambo tu pungemita nnete, kupala bhando bhatangatile, ngajhileka nng'olole gwake nu kutilii panja."

19 Potifa pajhohina malobhe gha nhwanamundo, ngayoma hake. 20 Ngantola Uchupo nu kuntabha mu kipungo, chehemo jhibhatabhitwe, akapungwa bha akanahota akakolongwa. 21 Nambo Bhambo Chapanga ngabhehe na Uchupo pamonga, ngampe mota na nkolongwa jwa kipungo ngahanganichwa nako. 22 Yene, nkolongwa jwa kipungo ngammeka Uchupo kubhehe nkolo jwa akapungwa bhoha, kila kilebhe chikitendwa mwenio, kiteilwa kwa ukindendeke gwake. 23 Nkolongwa jwa kipungo jwenio akatei jhe kabhele kilebhe chochoha chankamwiywe Uchupo, nhwalo Chapanga akibha pamonga na Uchupo ngantangatila mu kila kilebhe chateila.