1 Akɛnɛ Kristo na amanehlu ngɛ he lo mi he je ɔ, nyɛ hu nyɛɛ le kaa nyɛ maa na amanehlu; nɔ fɛɛ nɔ nɛ naa amanehlu ngɛ he lo blɔ fa mi ɔ, e kɛ yayami po tako mi. 2 Nɛ e di je nɛ ɔ mi akɔnɔ níhi a se hu, se mohu, e baa e je mi ngɛ Mawu suɔmi nya. 3 Nyɛ pee níhi fuu nɛ wɔ jali peeɔ ngɛ be nɛ be ɔ mi, kaa ajuama bɔmi, akɔnɔ níhi a se dimi, da demi kɛ fiɛmi sakasakahi.

4 Jehanɛ ɔ, e peeɔ wɔ jali ɔmɛ nyakpɛ kaa nyɛɛ kɛ mɛ kpa jamɛ a sakasaka je mi bami ɔ nɛ lɔ ɔ he je ɔ, a jɛɔ nyɛ. 5 Se mohu a maa bu akɔtaa kɛ ha Mawu, nɔ nɛ maa kojo hɛ kali kɛ ni gbogboehi tsuo ɔ. 6 Enɛ ɔ he je nɛ a fiɛ Manye Munyu ɔ ngɔ tsɔɔ ni gbogboehi tete po, nihi nɛ a kojo mɛ momo nɛ a gbla a tue be mi nɛ a ngɛ je mi ɔ, se a fiɛ kɛ ha mɛ bɔ nɛ pee nɛ a he a klaa amɛ a yi wami.

7 Je ɔ nyagbe ɔ su ta, lɔ ɔ he ɔ, nyɛ hɛ nɛ ka si nɛ nyɛɛ hɛɛ sɔlemi kɛ pɛɛ kpami mi. 8 Titli ɔ, nyɛɛ suɔ nyɛ he saminya, ejakaa suɔmi haa yayamihi fuu a nɔ. 9 Nyɛɛ pee nyɛ si bi nubwɔ kɛ nyɛ tsui kulaa .

10 Nɛ nyɛɛ ngɔ dloomi ni kpakpahi nɛ Mawu kɛ dloo nyɛ ɔ kɛ ye kɛ bua nyɛ si bi kaa sɔmɔli kpakpahi. 11 Nɔ nɛ fiɛɛ ɔ, e fiɛ Manye Munyu ɔ kɛ hɛ dɔ kɛ he wami kaa munyu nɛ je Mawu ngɔ. Ke nɔ ko ngɛ e nyɛmi wae ɔ, e pee kɛ e tsui kulaa ngɛ he wami bɔ nɛ Mawu kɛ ha lɛ ɔ nya. Konɛ nɔ́ tsuaa nɔ mi ɔ, a gu Yesu Kristo nɔ kɛ wo Mawu hɛ mi nyami. E nɔ ji anunyami ɔ kɛ he wami ɔ kɛ yaa neneene. Amen.

12 Anyɛmimɛ nɛ a suɔ,nyɛ nya nɛ ko kpɛ nyɛ he ngɛ amanehluhi nɛ ngɛ nyɛ nɔ bae ɔ he. A ji kahi nɛ a kɛ ngɛ nyɛ kae nɛ a kɛ tsu nyɛ he. 13 Se mohu nyɛ bua nɛ jɔ kaa nyɛ hu nyɛ ngɛ Kristo amanehlu ɔ eko nae, konɛ nyɛ na bua jɔmi babauu ngɛ e bami ligbi ɔ nɔ, be mi nɛ a ma je e anunyami ɔ kpo ɔ.

14 A gbaa nyɛ, ke Kristo he je nɛ a jɛɔ nyɛ ngɛ. E ji jɔɔmi kɛ ha nyɛ, ejakaa Mawu anunyami mumi ɔ ngɛ nyɛ nɔ. 15 Nyɛ ti nɔ ko nɛ ko na amanehlu kaa nɔ gbelɔ loo julɔ loo yayami peelɔ loo nɔ ko nɛ e kɛ e he woɔ ni kpahi a sane mi. 16 Se ke nɔ ko ngɛ nɔ́ nae kaa Kristo se nyɛɛlɔ ɔ, e ko pee lɛ zo, se mohu e je Mawu yi. 17 Ejakaa be nɛ a maa je kojomi ɔ sisi ɔ e su ta, nɛ a kɛ maa je Mawu bi ɔmɛ a nɔ. Nɛ ke a kɛ wɔ je sisi kekle ɔ, ni nɛmɛ nɛ bui Manye Munyu ɔ tue ɔ, kɛ a nyagbe maa ba kɛɛ? 18 Nɛ kaa bɔ nɛ Ngmami ɔ de ɔ, "Ke dalɔ yi wami hemi maa wa a, lɛɛ jije yayami peelɔ maa da?"

19 Enɛ ɔ he je ɔ, nɔ tsuaa nɔ nɛ naa amanehlu ngɛ Mawu suɔmi nya ni peemi mi ɔ, e ya nɔ nɛ e pee kpakpa a, nɛ e to e klaa a kɛ wo bɔlɔ anɔkualetsɛ ɔ dɛ mi.